I Yesus nipesori
4:1-13
4
1 I Yesus nikuasai Inosa Gasa ri tempo-Na nampawia ue Yordan. Inosa Gasa nangkeni-Ya ri tongo mpada bei. 2 Isee-Yamo nipesori nu Mbagou Seta rarana aopo mpulu eo kasaena. Rarana aopo mpulu eo ee, tado-namo nuapa nikondi-Na. Kaopuana naoro-Yamo. 3 Nanguli Mbagou Seta ee si-Ya: “Ande Ana nu Allatala-Ko, tudumo watu ei majadi roti.” 4 Nesono i Yesus: “Naria nitulisi: Manusia matuwu tado wule lako ri roti ngkola.”5 Naopu ee nikeni-mo nu Mbagou Seta ee i Yesus ri kalangkoana, pade sampiga mata nipopakalioka-Yamo nu Mbagou Seta sumawee kambagoua ri dunia. 6 Nanguli Mbagou Seta ee: “Sumawee kakuasaa pade kasugia ei kana kuweikaka-Ko, apaa sumaweena ei niwei si yakumo pade yaku mamala mambei ba siyema-yema to ku-podota. 7 Ande menomba-Ko si yaku, sumawee ei kana kuweikaka-Ko.” 8 Agiana nesono i Yesus: “Naria nitulisi: ‘Penombai-mo Pue Allatala-mu, pade Ia ngkola to mulayani.’ ”
9 Naopu ee nikeni-mo nu Mbagou Seta ee i Yesus ri Yerusalem pade nitudu-na mokongkore ri wumbu Sou nu Allatala pade nololita si-Ya: “Ande Ana nu Allatala-Ko, pengkanawu-Ko lako iseetu. 10 Apaa naria nitulisi: ‘Allatala kana mantudu malaeka-malaeka-Na mojaga-Ko belo-belo. 11 Pade malaeka-malaeka ee kana modokoi-Ko ante pale-ra bona tado matesunu paa-Mu ri watu.’ ”
12 Nesono i Yesus: “Naria nitulisi: ‘Nemo mu-pesori Pue, Allatala-mu!’ ”
13 Naopu-pa Mbagou nu Seta nampesori i Yesus ante ngila ngayana, nipawia-namo i Yesus pade nopea tempo to nabelo mampesori nculi i Yesus.
I Yesus nanculi ri ngamba Galilea
4:14-15
14 Naopu ee nanculi-mo i Yesus ri Galilea pade nikuasai-Yamo nu Inosa Gasa. Kareba nancambelai-Ya nowole-mo ri sumawee ngamba ee. 15 Pade nepatuduki-Yamo ri sou-sou penombaa nto Yahudi, pade sumawee tou nangune-Ya.
I Yesus nipoara ri Nazaret
4:16-30
16 Nalou mbiimo i Yesus ri ngata Nazaret, pearia-Na lako kodi. Ri Eo Peuntua nto Yahudi, nantutu kabiasaa-Na nalou-Yamo ri sou penombaa to Yahudi. Nokongkore-Yamo nobasa Buku Nagasa, 17 pade niweikaka-Yamo buku ni nabi Yesaya. Nibuka-Namo buku ee, pade nirata-Namo nuanu to nitulisi ewa ei:
18 “Inosa Gasa ni Pue naria si Yaku,
sabana nipelisi-Na Ku-mo bona mampopowole Kareba Belo ri tou to netowei.
Nitudu-Na Ku-mo
19 bona moparata pepakabebasi ri tou to nitawani
pade mampopekalio toburo,
mampakabebasi tou to nipoewewe,
pade mampopokareba tempo karata ni Pue
mampakasalama todea-Na.”
20 Niliko nculi-mo ni Yesus buku ni Nabi Yesaya ee, pade nipopanculi-Na ri topobago ri sou penombaa ee, pade noncunda-Yamo. Sumawee tou ri rara nu sou penombaa to Yahudi ee nangolole-Ya. 21 Pade nopamulamo i Yesus nololita si sira, ewa ei: “Nuanu nitulisi ri rara Buku Nagasa ee, eo ei nipeponui-Kumo tempo-mi namparonge ei.”
22 Lolita-lolita to niuli-Na nabelo mpuu, nangkajadika-ra namoleara namparonge pade noparikonoi-Ya. Nanguli-ra: “Tado ana ni Yusuf-Ya ei?”
23 Pade nanguli-mo i Yesus si sira: “Tantu ikomi ei mangulikaka-Ku lolita ewa ei: Dokutoro, pakaori-mo koro dodo-Mu. Nuanu to nadupa-mo nironge-ka nipowia-Mu ri ngata Kapernaum, powia mbii ee isei ri ngata pangotea-Ko ei.” 24 Pade nanguli mbii-Yamo: “Ku'ulikaka komi, tado naria nabi to nibila ri ngata pangotea dodo-ya. 25 Ku'ulikaka komi: Ri tempo katuwua ni nabi Elia, sintou tado naria uda nadungku rarana tolu mpae santongo, najadi oro mpei ri sumawee ngamba. Ri tempo ee nadea tobalu-tobalu ri Israel. 26 Noudamo iwee, tado nitudu nu Allatala i nabi Elia malou ri kambana saduamo lako ri tobalu-tobalu ee, agiana kawule nalou ri sadua tobalu ri Sarfat ri ngamba Sidon. 27 Iweetu mbii ri tempo katuwua ni nabi Elisa nadea tou to nadua bose ri Israel agiana tado-namo saduaa to nipakaori, kawule sadua ni Naaman to Siria ee to nipakaori.”
28 Sumawee tou ri sou penombaa to Yahudi ee nasodo mpuu namparonge nuanu ee. 29 Nokongkore pura-ramo pade nowura i Yesus nalou ri sawaliku nu ngata ee, nikeni-ra ri tingke bulu ri pongata-ra ee. Isira ei madota motumbanaka-Ya ri ngembana. 30 Agiana i Yesus nampaboru-ra pade nampanganika-ra.
I Yesus ri rara sou penombaa nto Yahudi ri Kapernaum
4:31-37
31 Naopu ee nalou-mo i Yesus ri ngata Kapernaum ri ngamba Galilea. Isee-Ya nopatuduki tou-tou ri Eo Peuntua to Yahudi. 32 Namoleara-ra namparonge pepatuduki-Na, apaa lolita-Na naponu ante kuasa. 33 Ri rara nu sou penombaa nto Yahudi ee naria sadua to nipesua nu wao tuwu. Tou ee nongare: 34 “Hee Yesus, to Nazaret, nuapa to Mupodota Mupowia si kami? Mamei mampakaropukada-Ko? Nincaniku-da yema-Ko: Iko-mo suro to nagasa lako ri Allatala!”
35 Agiana niwurarasiya ni Yesus: “Kalino-ko! Pesuwu-ko lako ri tou etu!” Pade niwomboka-mo nu wao tuwu ee tou to nipesua-na ee ri ngayo nu sumawee tou ee, pade nesuwu-mo wao tuwu ee lako ri tou to nipesua-na ee, pade tado-mo niduati-na oa.
36 Sumawee tou namoleara, pade nombeulikaka, nanguli-ra: “Nangepe-mo pololita-Na. Nopasu pade nakuasa, namala niparenta-Na wao-wao tuwu nesuwu, pade nesuwu mpuu-ramo.” 37 Pade nowolemo kareba nancambelai i Yesus ri sumawee ngamba ee.
I Yesus nampakaori matua ni Simon Petrus pade tou-tou ntanina
4:38-41
38 Naopu ee nipawia-mo ni Yesus sou penombaa to Yahudi ee, pade nalou ri sou ni Simon. Matua bangkele ni Simon bula-na nampakoko, pade tou-tou nerapi si Yesus bona mampakabelo-ya. 39 Nalou-mo i Yesus ri paletaa nu matua ni Simon bangkele ee, pade nipakabelo-Na ya-mo. Pade nemata-mo matua ni Simon ee nolayani-ra.
40 Nasolopa eo, sumawee tou nangkeni si Yesus sarara-sarara-ra to nantodosaka ngila-ngaya nu dua. Pade niuntu-mo ni Yesus pale-Na ri butu dua-ra pade nampakabelo-ra. 41 Nadea mbii wao tuwu to nesuwu lako ri tou-tou, nongare lako: “Iko-mo Ana nu Allatala!”
Agiana niwurarasi-ra ni Yesus pade tado nipaliu-Na nololita, apaa nincani-ra Ia-mo Mbagou Topepakasalama.
I Yesus nepatuduki ri ngata-ngata ntanina
4:42-44
42 Ri tempo nu eo nembere nipawiamo ni Yesus ngata ee pade nalou ri pearia nakalinoaa. Nopamulamo tou-tou nangonco-Ya, niratara-Yapa nipesimbukui-ramo notahangi-Ya bona nemo Na-paleisi-ra. 43 Agiana nanguli i Yesus si sira: “Kareba Belo nancambelai beiwa Allatala moparenta kana Ku-popowole mbii ri ngata-ngata ntanina, apaa ee-mo sabana pade nitudu-Kumo nu Allatala namei ri dunia.”
44 Pade nipopowolemo ni Yesus Kareba Belo lako ri Allatala ri rara nu sou-sou penombaa nto Yahudi ri sumawee ngamba Yudea.