Kareba Belo to nitulisi
ni Markus
I Yohanes Topebaptis
1:1-8
1
1 Eimo paramulana Kareba Belo nancambelai i Yesus Kristus Ana nu Allatala.
2 Ewa naria nitulisi ri rara buku ni nabi Yesaya,
ewa ei:
“Kalio,
Yaku,
Pue Allatala nantudu suro-Ku mampokouluka-Ko,
bona mampasadia dala-Mu.
3 Naria sadua tou nopangara ri tongo mpada bei,
nanguli:
“Pakasadiamo dala nakaratai ni Pue,
pade pakanoro dala Na-polumakoi.”
4 Mampeganai lolita ee,
i Yohanes Topebaptis neonga ri tongo mpada bei noparata lolita nu Allatala:
“Ikomi kana mancoro lako ri jeko-mi pade kana rabaptis bona Na'ampungi nu Allatala jeko-mi.”
5 Pade naratamo tou-tou lako ri ngamba Yudea ante sumawee todea ri ngata Yerusalem si Yohanes.
Nampangaku jeko-ra pade nibaptis-ramo ni Yohanes ri ue Yordan.
6 I Yohanes ei nampake powaru to nipowia lako ri wulu nu unta.
Pampou peko-na lako ri kuli nu binata,
pade kondia-na bati bo manisa nu oani wana.
7 Eimo kareba to niparata-na ri sumawee tou:
“Mariapa ngoni to marata mopuri to neliu kakuasa-Na lako si yaku.
Motumpa bona mobolesi popou sandala-Na tado masipato-ku.
8 Yaku nobaptis komi ante ue,
agiana Ia marata mopuri ngoni mobaptis komi ante Inosa Gasa.”
I Yesus nibaptis ni Yohanes
1:9-11
9 Tempo ee,
narata-mo i Yesus lako ri Nazaret,
ngamba Galilea,
pade nibaptis-Yamo ni Yohanes ri ue Yordan.
10 Pencore-Na lako ri rara ue,
nikalio-Na langi nogaa pade Inosa Gasa ewa tonci banggebodo nesompo pade nampeuntui-Ya.
11 Naopu ee,
nironge-mo wotu nu Allatala lako ri suruga nanguli:
“Iko-mo Ana towea-Ku.
Iko-mo to nampakawoe rara-Ku.”
Nipesori ri tongo mpada bei
12 Naopupa i Yesus nibaptis,
nikeni-Yamo nu Inosa Gasa ri tongo mpada bei.
13 Rarana aopo mpulu eo,
aopo mpulu mbengi-Ya natida ri tongo mpada bei ee nipesori nu Mbagou Seta.
Ia natida isee namporoa binata-binata naila,
pade malaeka-malaeka nolayani-Ya.
I Yesus narata ri Galilea
1:14-15
14 Nisokopa i Yohanes pade nitarungku,
naloumo i Yesus ri ngamba Galilea,
pade noparata Kareba Belo lako ri Allatala radou.
15 Niuli-Na:
“Naratamo tempona mopamulamo Allatala moparenta.
Pancoro-mo komi lako ri jeko-jeko-mi,
pade parisayamo Kareba Belo lako ri Allatala.”
I Yesus nampokio ana-ana guru to paramulana
16 Ranca ni Yesus nolumako ri soso talinti rano Galilea,
nikalio-Na i Simon ante sarara-na i Andreas,
bula-ra nosoko bou ri rano nampake jala,
apaa ee-mo bago-ra.
17 Niulikaka-ra ni Yesus:
“Tumeimo komi,
tutu-Ku,
bona Ku-pajadi komi topojala manusia.”
18 Namparonge ee,
nipaleisi-ramo jala-ra pade nalou-ramo nantutu i Yesus.
19 Naopu ee,
nipapolamo ni Yesus nolumako,
nikalio mbii-Namo i Yakobus ante i Yohanes,
ana-ana ni Zebedeus.
Isira ei ri rara duanga,
bula-ra notampalangi kabongkaa nu jala-ra.
20 Pangkalio-ra ni Yesus,
nipokio-ramo ni Yesus.
Pade nipaleisi-ramo tuama-ra ri rara duanga ante sumawee tou to nampobagoka-ra.
Pade nalou-ramo nantutu i Yesus.
I Yesus ri rara nu sou penombaa to Yahudi ri Kapernaum
21 Naratamo i Yesus ante ana-ana guru-Na ri Kapernaum.
Ri tempo nu eo Peuntua to Yahudi,
nesuamo i Yesus ri rara sou penombaa to Yahudia pade nopatuduki lolita nu Allatala.
22 Sumawee tou ri rara sou penombaa ee namoleara namparonge pepatuduki-Na.
Apaa Ia nepatuduki ante naponu kuasa,
tado ewa pepatuduki nu topande ri Buku Taurat.
23 Tempo ee ri rara nu sou penombaa ee,
naria sadua to nipesua nu wao tuwu.
Tou ee nongare:
24 “He Yesus to Nazaret,
Mu kia-ka ei?
Iko namei bona mampakaropu-ka?
Nincani-kuda yema Ko:
Ikomo To Nagasa lako ri Allatala.”
25 Agiana niwurarasi-ya ni Yesus,
nanguli-Ya:
“Kalino-ko pade pesuwu-ko lako ri tou etu!”
26 Jadi,
nironta-rontamo nu wao tuwu ee tou ee,
pade nesuwu lako ri tou ee ante nongare lako.
27 Sumawee tou ri rara nu sou penombaa ee namoleara pade nanguli-ramo:
“Beiwada ei?
Pepatuduki nabou mbiimo ei!
Ia ei nololita ante kakuasa-Na,
sumawee wao tuwu niparenta-Na natundu pura.”
28 Naopu ee,
singoni-ngoni nowoleamo kareba ni Yesus narata ri sumawee ngamba Galilea.
I Yesus nampakabelo matua ni Petrus bangkele bo tou-tou ntanina
29 Pesuwu-ra lako ri sou penombaa to Yahudi ee,
i Yesus ante i Yakobus pade i Yohanes nalou ri sou ni Simon pade i Andreas.
30 Ri sou ee matua ni Simon bangkele nengkadampa ri paletaa apaa nampakoko.
Pesua ni Yesus ri rara nu sou,
niulikaka-Yamo nu tou ri sou ee bakote matua ni Simon nadua.
31 Namparonge ee,
naloumo i Yesus si matua ni Simon,
nokakamu pale-na,
pade nipopembangu-Na.
Nomulei lako ee neuntumo pampakoko-na,
pade nopamula-yamo nolayani-ra.
32 Nakinowiapa,
nanawu leruna,
nadea to dua pade to nipesua nu wao tuwu nikeni si Yesus.
33 Nadea mpuu tou ri ngata ee notobu ri ngayo nu sou ni Simon.
34 Nadea tou nipakabelo ni Yesus,
to nantodosaka ngila ngaya nu dua pade nowura wao-wao tuwu to nampesua-ra.
Agiana tado nipaliu-Na wao-wao tuwu ee nololita,
apaa nincani-rada i Yesus.
I Yesus nepatuduki ri ngata-ngata ntanina
35 Sangkabaa mpisi,
narumondodapa,
nematamo i Yesus pade nesuwu,
nalou ri kalinoaana nosambaya.
36 Agiana i Simon ante roa-roa-na nalou nangonco-Ya.
37 Nirata-rapa i Yesus,
niuli-ramo:
“Sumawee tou nangonco-Ko.”
38 Nesono i Yesus:
“Malou-tamo ri ngata-ngata ntanina riolona ei,
bona mamala-Ku moparata Kareba Belo radou.
Apa eeda patuju-Ku narata.”
39 Naopu ee,
neongkomo i Yesus nalou ri sumawee ngata ri ngamba Galilea,
pade noparata Kareba Belo ri sou-sou penombaa to Yahudi pade nowura wao-wao tuwu to nampesua tou.
I Yesus nampakaori to nadua bose
40 Naria sadua to nadua bose namei si Yesus,
notumbukotu ri ngayo-Na,
pade nerapi ante rara mpuu-na:
“Ande madota-Ko,
mamala Mu-pakaori dua-ku ei.”
41 Natowemo rara ni Yesus ri tou ee pade nitui-Namo tou ee,
pade nanguli:
“Madota-Ku.
Maorimo-ko.”
42 Sampiga mata nalalimo dua bose-na pade naori-yamo.
43 Naopu ee,
nitudu-Namo tou ee manculi pade nitetesi-Na:
44 “Torada,
nemo ngoni mu-popanguncanika tou ntanina kaori nu dua-mu etu,
agiana koumo-ko ri tobaliab ri Sou nu Allatala mampopakalio koro-mu etu pade powiamo tinuwu-mu,
ewa nuanu to nipeparentai ni Musa,
bona mopadupa ri tou-tou bakote naori mpuumo-ko.”
45 Agiana tou ee nalou nampopowole kajadia ee riumba-umba,
nangkajadika nesua bongo-bongo damo i Yesus ri rara ngata bona tado rakalio-Ya nu tou dea.
Jadi neari ri sawaliku nu ngata-Yadamo ri kalinoaana.
Agiana narata oada tou lako ri soki-sokina nampotomuka-Ya.