I Yesus nampakaori sadua to nadua bose
8:1-4
8
1 Nesompomo i Yesus lako ri bulu, pade nadea mpuu tou nantutu-Ya. 2 Tempo ee naratamo sadua to nadua bose notumbukotu ri ngayo ni Yesus, pade nanguli: “Tuama, ande madota-Ko, mamala Mu-pakaori dua-ku ei.”3 Nikakamu-mo ni Yesus tou ee pade nanguli: “Madota-Ku, kaorimo-ko.” Bulawee ee mbii naorimo dua nu tou ee. 4 Pade nangulimo i Yesus ri tou ee: “Nemo mu'uli basiyema-yema nuanu to najadi ei, agiana koumo-ko, popakaliomo koro-mu ri tobalia bona na-kalio bakote naorimo dua-mu. Maopu ee kenimo penomba to nipeparentai ni Musa, bona mopadupa ri tou-tou bakote mpuu-mpuu naorimo dua-mu.”
I Yesus nampakabelo batua nu tadulako ri ngata Kapernaum
8:5-13
5 Tempo ni Yesus nesua ri ngata Kapernaum, naratamo sadua tadulako nampotomuka-Ya pade nerapi tulungi si-Ya. 6 “Tuama, batua-ku nadua ntomo ri sou-ku. Tadomo nipakule-na nembangu apaa napungku pade napepa mpuu nirasai-na.” 7 Nangulimo i Yesus si-ya: “Tulou Ku-damo mampakabelo-ya.” 8 Nesono tadulako ee si Yesus: “Tadomo Tuama, tado masipato-ku mantarima-Ko ri sou-ku, kawule parentamo bona malali dua-na, ia kana mabelo. 9 Apaa yaku ei mbii kana matundu ri parenta nu maradika-ku. Pade ri mpanou-ku naria mbii surodado-surodado to kana matundu ri parenta-ku. Ande ku-tudu sadua surodado: Kou-ko, malou mpuu-yamo, pade ande ku'ulikaka tou ntani: Tumei-ko isei, mamei mpuu-yamo. Pade ande ku-parenta sadua batua-ku: Powia ei, na-powia mpuu-mo.” 10 Pamparonge ni Yesus nuanu to niuli nu tadulako ee, namoleara-Yamo. Pade nanguli-Yamo ri tou-tou to nantutu-Ya: “Nangepemia tou ei. Lako riolo nu sumawee to Israel, tadopa naria nirata-Ku kaparisayaa nabete ewa kaparisayaa nu tou ei. 11 Ku'ulikaka komi: Madea ngoni tou tado to Yahudi majadi todea nu Allatala. Isira marata lako ri mataeo bo kasoloa pade madonu moroa-roa ante i Abraham, i Isak pade i Yakub ri rara Poparentaa nu Allatala. 12 Agiana to Yahudi to kakono-konona majadi todea ri rara Poparentaa nu Allatala kana ratadiaka ri kadedia to nakawao lako ri Allatala. Isee-ramo kana mokeo pade mantodosaka kapepaa.” 13 Pade nangulimo i Yesus ri tadulako ee: “Panculi-moko, nuapa to niparisaya-mu etu kana madupa.”
Bulawee ee mbii nabelomo batua-na ee.
I Yesus nampakabelo matua ni Petrus bangkele pade tou-tou ntanina
8:14-17
14 Naopu ee naloumo i Yesus ri sou ni Petrus. Isee nikalio-Na matua ni Petrus bangkele naleta, apaa nampakoko. 15 Nikakamumo ni Yesus pale-na, pade narontomo pampakoko-na ee see. Nembangu-yamo pade nopamula-yamo nolayani i Yesus.
16 Moliwo malerupa, nadea tou to nipesua nu wao tuwu nikeni si Yesus. Pade ante lolita-Na sampama ngkola, i Yesus nowura wao-wao tuwu ee, bo nampakabelo mbii sumawee to nadua. 17 Sumaweena ee nipowia ni Yesus, bona madupa nuanu to niuli ni nabi Yesaya, ewa ei: “Ia nangkolo kapepaa-ta pade nampakabelo dua-ta.”
Nancambelai pantutu i Yesus
8:18-22
18 Pangkalio ni Yesus nadea mpuu tou nantoleliki-Ya, nitudu-Namo ana-ana guru-Na mewote ri sambote nu rano. 19 Pade naratamo sadua topande ri Buku Taurat si Yesus pade nanguli: “Guru, yaku madota mantutu-Ko, riumba-umba-Ko malou.” 20 Nesonomo i Yesus: “Serigala naria pearia-na, pade tonci naria pouruana, agiana Yaku, Ana nu Manusia tado naria pearia-Ku maleta.”
21 Pade naria mbii sadua topetutu ntanina nanguli: “Pue, paliu-ku ulu manculi. Ande mamatedamo tuama-ku pade rapatana, pade ku tutuda-Ko.” 22 Agiana nesono i Yesus: “Tutu-Kumo, pade palambakamo tomate motana singka tomate.”
Ngolu mpamburu nipopeuntu
8:23-27
23 Naopu ee, nencawimo i Yesus ri rara nu duanga pade nitutu nu ana-ana guru-Na. 24 Bula-ra noduanga, ncamole-mole naratamo ngolu mpamburu ri rano ee, nangkajadika duanga-ra nitampe nu balumba bete. Tempo ee i Yesus bula-Na naluru naleta. 25 Naloumo ana-ana guru-Na nampalike-Ya pade nanguli: “Pue, tulungi, mamate-tamo ei!” 26 Pade nangulimo i Yesus si sira: “Nuapa pade naeka komi, tado mpuu niparisaya gaga mi-Ku!” Naopu ee nokongkoremo i Yesus pade nangontika ngolu bo balumba ri rano ee. Bulawee ee mbii neuntumo ngolu pade rano ee mpuu-mpuu namparoo. 27 Nangkalio kajadia ee, namolearamo ana-ana guru-Na. Pade nanguli-ramo, “Tou nuapa Ya-da ei, pade nangkajadikamo ngolu bo balumba natundu ri parenta-Na!”
Rodua to nipesua nu wao tuwu nipakabelo
8:28-34
28 Naratamo i Yesus ri sambote nu rano ri ngata to Gadara. Karata-ra isee neongamo rodua tou lako ri dayo namei nampotomuka i Yesus. Tou rodua ee to nipesua nu wao tuwu, nabia mpuu-ra, nangkajadika tadomo naria tou nanaa noliu i see. 29 Nongare-ramo: “He Ana nu Allatala, Mu-kia-ka ei? Mu-duasi ami-kamo noudamo tadopa tempona?” 30 Najungku isee, nadea mpuu boe bula-ra nangonco kondia-ra. 31 Jadi, wao tuwu to nampesua tou rodua ee nerapi si Yesus: “Ande kana Mu-popesuwu-ka lako ri tou rodua ei, tudu-kamo mesua ri boe-boe emei.” 32 Nanguli i Yesus: “Koumo komi!” Jadi nesuwumo wao-wao tuwu ee lako ri tou rodua ee, pade nesua ri boe-boe ee. Nokumbenomo boe-boe ee pade nengkawantu lako ri tingke nu bulu pade nanawu ri rara nu rano, pade nalome. 33 Pangkalio nu topoewu-topoewu boe ee kajadia ee, nokumbeno-ramo nalou ri rara ngata, pade nopatuntu sumawee nuanu najadi ri boe-ra, pade nopatuntu mbii nuanu to najadi ri tou rodua to nipesua nu wao tuwu ee. 34 Namparonge ee, sumawee tou ri ngata ee nalou nampotomuka i Yesus. Notomu-rapa ante i Yesus, niperapi-ramo ante mpuu-mpuu bona mangkosu i Yesus lako ri ngata-ra ee.