Nancambelai potangara tou
7:1-5
7
1 “Nemo motangara tou ntani, bona ikomi dodo mbii tado ratangara nu Allatala. 2 Apaa beiwa potangara-mi tou ntani, iwee mbii potangara komi nu Allatala. Posuka to nipake-mi nosuka tou ntani, ee mbii ngoni napake nu Allatala mosuka komi. 3 Nuapa pade tibe nu kou ri rara mata nu sarara-mu nikalio-mu, bo baloti ri mata dodo-mu tado nikalio-mu? 4 Beiwamo komi manguli ri sarara-mi, keni tumei ku-lali tibe nu kou ri rara mata-mu etu, bo ee ri rara mata dodo-mu naria baloti. 5 Hee, tou to nabelo wongko, lali ncala ulu baloti lako ri mata-mu, bona marawa pekalio-mu pade mamala-dako molali tibe nu kou lako ri mata nu sarara-mu.”Nancambelai nuanu nagasa pade nasuli olina
7:6
6 “Nemo mambei nuanu to nagasa ri dike, bona tado megoli-ya pade mosoko-komi. Pade nemo muwei mutiara-mu ri boe, bona tado nalisa-lisa nu boe mutiara ee.”
Nancambelai kadupa nu sambaya
7:7-11
7 “Perapimo, ikomi kana raweika. Oncomo, ikomi kana mamparata. Kadomo, kana raungkeka komi wombo. 8 Apaa butu dua tou to merapi kana mantarima, tou to nangonco kana mamparata, pade tou to nokado kana raungkeka wombo. 9 Naria riolo-mi ei sadua tuama nambei watu ri ana-na, ande ana-na merapi roti? 10 Ba nambei ule, ande ana-na merapi bou? 11 Noudamo nadaa komi, nincani-mida nambei nuanu nabelo ri ana-ana-mi. Nedamorauli Tuama-mi ri suruga! Neliu ntotopa pambei-Na nuanu nabelo ri tou to nerapi si-Ya.”
Dala to nakono
7:12-14
12 “Nuapapa to mi-podota bona napowia nu tou si komi, powia ewa ee mbii si sira. Ee mo poko nu parenta Taurat pade pepatuduki nu nabi-nabi.
13 Pesuamo komi ri wombo to napii, sabana wombo pade dala malou ri naraka nabete bo nawea, pade nadea tou madota molumako isee. 14 Agiana napii bo nakaja wombo bo dala to mangkeni tou ri katuwua nabelo. Pade aga saodi ngkola tou to namparata wombo bo dala ee.”
Nancambelai pepatuduki to nepakapusa
7:15-23
15 “Maingada komi ri nabi-nabi to tado nakono. Isira mamei si komi ewa bimba, agiana kakono-konona isira ee ewa serigala naoro. 16 Ikomi kana manguncani inggu-ra lako ri nuanu to nipowia-ra. Walaa mporui tado nampopesuwu wua anggur, pade kawoko mporui tado nampopesuwu wua ara. 17 Kou to nabelo mampopesuwu wua nabelo, pade lako ri kou to tado nabelo mampopesuwu wua nadaa. 18 Kou nabelo tado mampopesuwu wua nadaa, pade kou tado nabelo tado mamala mampopesuwu wua nabelo. 19 Kou to tado nampopesuwu wua nabelo, kana ratowo pade ratadi ri rara nu apu. 20 Iwee mbii ante nabi-nabi to tado nakono. Ikomi kana manguncani inggu-ra lako ri nuanu to nipowia-ra.
21 Tado sumawee tou to nampokio-Ku: Pue, Pue, majadi todea ri rara nu Poparentaa nu Allatala, agiana kawule tou to nampowia dota nu Tuama-Ku ri suruga. 22 Ri Eo Kaopu nu dunia madea tou manguli si Yaku: Pue, Pue, ikami noparatamo lolita nu Allatala ante sanga-Mu. Pade ante sanga-Mu mbii niwura kamo seta bo nipowia-kamo kadupaa-kadupaa. 23 Agiana kana Ku sonoi-ra: Tado naria komi nincani-Ku. Pangani komi lako isei, ikomi to nowia nuanu nadaa!”
Rongaya parawatu
7:24-27
24 “Butu dua tou to namparonge lolita-Ku ei, pade nipowia-na, ia nasimbei ante tou napande, to nopatinda sou-na ri wumbu nu parawatu. 25 Tempo nu uda nadungku, pade naratamo ue bose bo ngolu mpamburu namparumpa sou ee, sou ee tado napongka apaa nipatinda ri wumbu nu parawatu. 26 Pade butu dua tou to namparonge lolita-Ku ei pade tado nipowia-na, ia nasimbei ante to nadoyo, to nopatinda sou-na ri wongko nu bone. 27 Tempo nu uda nadungku pade naratamo ue bose bo ngolu mpamburu namparumpa sou ee, sou ee napongka pade nabete mpuu karusakana.”
Kakuasa ni Yesus
7:28-29