Nancambelai pambei petulungi
6:1-4
6
1 “Toramo, nemo mipowia ada nu agama-mi ri ngayo nu tou dea bona rakalio nu tou. Apaa ande ewa ee inggu-mi, ikomi tado mamparata tombo lako ri Allatala, Tuama-mi ri suruga. 2 Jadi ande mambei komi petulungi ri to netowei, nemo rapoperingi nuanu ee, ewa to nipowia nu tou to nabelo wongko. Isira nambei petulungi ri to netowei ri sou-sou penombaa bo ri dala, bona raune nu tou. Peune lako ri tou ee-mo tombo to nitarima-ra. Tado naria ntanina. 3 Agiana ande ikomi mambei petulungi, weimo bongo-bongo, nemo rapoperingi ri tou. 4 Palambaka-mo petulungi-mu ee tado nancani nu tou ntani, aga Tuama-mu ri Suruga ngkola manguncani. Nikalio-Nada nuanu nipowia-mu bongo-bongo ee pade kana mambeika-ko tombo.”Nancambelai sambaya
6:5-15
5 “Ande ikomi mosambaya, nemo ewa inggu nu tou to nabelo wongko. Nipobelo-ra nosambaya mpokongkore ri sou penombaa pade ri porompengaa nu dala bona rakalio nu tou dea. Peune lako ri tou ee-mo tombo to nitarima-ra. Tado naria ntanina. 6 Agiana ande ikomi mosambaya, pesuamo komi ri rara kamara pade wuntamo wombo, pade posambayamo komi ri Tuama-mi to tado nikalio ee. Mangkajadika Tuama-mi to nangkalio nuanu nipowia-mi bongo-bongo ee kana mambei tombo si komi.
7 Ande mosambaya komi nemo rapakalanga-langa ewa tou-tou to tado nanguncani i Pue. Niuli-ra perapia-ra ee ratarima sabana sambaya-ra to nalanga ee. 8 Nemo ewa isira. Nincanimo nu Tuama-mi ri suruga nuapa to niparalou-mi, sintou tadopa niperapi-mi. 9 Jadi posambayamo komi ewa ei:
Tuama-ka ri suruga,
Rapemabosemo sanga-Mu,
10 Pakaratamo Poparentaa-Mu,
pajadimo dota-Mu
ri dunia ewa ri suruga.
11 Weikaka-ka pangkondi to kaparolou eo ei.
12 Ampungi-ka lako ri kasalaa to nipowia-ka, ewa ikami mbii nampa'ampungi to nasala si kami;
13 pade nemo Mukeni-ka ri rara nu pesori,
agiana pakabebasi-kamo lako ri kuasa to nadaa.
[Apaa Iko-da to nangkakamu Poparentaa pade kakuasaa pade pampemabose duuna masae-sae. Amin.]
14 Ande ikomi mampa'ampungi tou to nowia sala si komi, Tuama-mi ri suruga mbii moampungi kasalaa-mi. 15 Agiana ande ikomi tado moampungi kasalaa nu tou si komi, Tuama-mi ri suruga mbii tado moampungi kasalaa-mi.”
Nancambelai Kapuasa
6:16-18
16 “Ande mopuasa komi, nemo momonto lence-mi ewa tou to nabelo wongko. Nitungkei-ra nekimonto bona nancani nu tou dea bakote napuasa-ra. Toramo, nitarima-ramo tombo nu puasa-ra ee. Tadomo naria ntanina. 17 Agiana ande ikomi mapuasa, mbanoimo lence-mi pade sisirimo wulua-mi, 18 bona tado nancani nu tou bakote nopuasa komi, aga Tuama-mi to tado nikalio ee ngkola manguncani. Nikalio-Nada nuanu nipowia-mi bongo-bongo ee pade kana mambei tombo si komi.”
Nancambelai gagu ri suruga
6:19-24
19 “Nemo mopasintobu gagu ri dunia komi, apaa mamala nakondi nu ipe bo matagaraa, pade napangio nu tou. 20 Pegoliana, pasintobumo gagu ri suruga, apaa tado mamala nakondi nu ipe bo matagaraa, pade tado napangio nu tou. 21 Apaa riumba gagu-mi maria, isee mbii rara-mi!”
22 “Mata nirapaika pajanaa nu koro. Ande mata-mu mabaa, sumawee koro-mu mabaa mpose. 23 Agiana ande mata-mu magawua, sumawee koro-mu madedi mbongo. Jadi ande pajanaa ri rara nu koro-mu madedi, madedi mbongo mpuu kadedia ee!”
24 “Tado-namo saduaa to mamala mobago ri rodua maradika. Sabana kana meliu-pa pampotowe-na to sadua-na pade to ntanina. Ba kana matundu-yapa ri maradika to sadua-na pade ri to ntanina. Iwee mbii-da ante ikomi. Tado mamala komi mampobagoka Allatala pade mampobago-ka mbii gagu ri dunia.”
Nancambelai pokantabu nu rara
6:25-34
25 Ee-mo sabana Ku'ulikaka komi: “Nemo mokantabu rara-mi mancambelai katuwu-mi, nuapa to mi-kondi, pade mi'inu, ba nuapamo to mi-popowaru. Apaa katuwu-mi neliu lako ri kondia pade woto-mi neliu lako ri powaru. 26 Kaliomo tonci ri laerawa, isira tado nantuda, tado nepae, pade tado mbii namboli pae ri rara liko. Noudamo iwee Tuama-mi ri suruga nambeikaka-ra kondia. Nedamorauli ikomi, neliupa pampotewa-Na komi lako ri tonci-tonci. 27 Ante pokantabu nu rara-mi, tado mamala komi mampakalanga umuru-mi kambana saodi mpuumo. 28 Nuapa pade nokantabu rara-mi nancambelai powaru-mi? Penotomo bunga-bunga bakung to natuwu ri tongompada. Bunga-bunga ee tado nobago pade tado nandousi. 29 Agiana i Mbagou Salomo to nasugi mpuu ee, tado nowaru ewa kabelo nu bunga-bunga ee. 30 Jadi ande Allatala nampakagaya kawoko ri tongompada to natuwu eo ei pade kaneilenapa rasuwe ri rara apu, nedamorauli ikomi. Nuapa pade tado gaga neparisaya komi? 31 Nemo mokantabu rara pade manguli: Nuapamo to ta-kondi pade ta-inu, ba nuapamo ta-popowaru? 32 Sumaweena ee nuanu to nionco oa nu tou-tou to tado nanguncani Allatala. Agiana ikomi nemo mokantabu rara-mi, apaa tuama-mi ri suruga nanguncani sumawee kaparalouaa-mi. 33 Jadi, pesimbukuimo ulu bona Allatala moparenta ri rara ngkatuwu-mi, pade powiamo dota-Na, mangkajadika sumawee nuanu ntanina kana nawei nu Allatala si komi. 34 Eemo sabana, nemo mokantabu rara-mi mancambelai eo kaneilena, apaa eo kaneilena naria dododa kasusaana. Eo ei maganamo kasusaana, nemo ratambei oa.”