Pepatuduki ni Yesus ri wumbu bulu
Pasal 5-7
Lolita nancambelai kasanaa
5:1-12
5
1 Pangkalio ni Yesus tou dea ee, nentode-Yamo ri pobuluana. Noncunda-Yapa isee, naratamo sumawee ana-ana guru-Na. 2 Pade nopamula-Yamo nopatuduki-ra, nanguli-Ya:3 “Masanamo tou to netowei katuwu-ra ri pangkalioaa nu Allatala,
apaa isira eemo to majadi todea nu Allatala!
4 Masanamo tou to nasusa rara-na,
apaa Allatala kana mampakawoe rara-na.
5 Masanamo tou to naede rara-na;
apaa isira kana mantarima sumawee to nitipa nu Allatala.
6 Masanamo tou to madota mpuu matuwu mantutu dota nu Allatala,
apaa Allatala kana mampakaosa rara-na.
7 Masanamo tou to nampotowe tou ntani,
apaa ia mbii kana napotowe nu Allatala.
8 Masanamo tou to nagasa rara-na,
apaa ia kana mangkalio Allatala.
9 Masanamo tou to nangkeni posingkabelo;
apaa ia kana rakasangai ana-ana nu Allatala.
10 Masanamo tou to niduasi sabana i sira nampowia dota nu Allatala,
apaa isiramo to majadi todea nu Allatala.
11 Masanamo komi ande rakanene ba raduasi ba narei nu tou sabana ikomi to pantutu-Ku.
12 Nabi-nabi to natuwu nokoulu lako si komi nipowia ewa ee mbii. Jadi pakadonu-donumo rara-mi ande nuanu ee majadi si komi, apaa mabete mpuu tombo to mi-rata ri suruga.”
Unu nu dunia pade kabaasa nu dunia
5:13-16
13 “Ikomi ei-mo unu nu dunia. Ande unu ee majadi matawoomo, ante nuapa mampakapaga nculi-ya? Tado-mo naria lotuna, aga ratadiaka pade nalisa-lisa nu tou.
14 Ikomi ei-mo kabaasa nu dunia. Ngata to naria ri wumbu bulu tado mamala matewunika. 15 Tado naria tou to nopatuwu pajanaa, pade niladuna-na nu batili, agiana kana nauntu ri pambolia pajanaa, bona mampakabaa sumawee to ri rara ncou. 16 Iwee mbiida kabaasa lako si komi kana mewanta ri ngayo nu tou, bona rakalio-ra parabuata-parabuata-mi to nabelo, pade mangune Tuama-mi ri Suruga.”
I Yesus pade parenta nu Taurat
5:17-46
17 “Nemo mi-uli Yaku ei narata bona mogempu parenta Taurat pade pepatuduki nu nabi-nabi ngkoulu. Yaku narata tado mogempu ee, agiana mampopakalio kadupana. 18 Toramo ei! Sinungka nu langi bo dunia maria-dapa, tado-namo sangayaa isi nu parenta ee ragempu, ande tadopa madupa pura sumawee pepatuduki nu parenta ee. 19 Ee-mo sabana, yema-yema to mogempu noudamo sangaya ngkola isi nu parenta Taurat, noudamo parenta kodi ntotona, pade mopatuduki tou ntani mowia ewa ee mbii, ia nireke tou to nakodi mpuu riolo nu todea nu Allatala. Agiana, yema-yema mantutu sumawee parenta Taurat pade mopatuduki tou mowia ewa ee mbii, ia kana rareke tou to nabete riolo nu todea nu Allatala. 20 Jadi, toramo: Ikomi tado mamala majadi todea nu Allatala, ande tado meliu katundu-mi mowia dota nu Allatala lako ri topande ri Buku Taurat bo to Farisi!”
21 Nincani-mida parenta to niuli ri totua-ta ngkoulu ewa ei: Nemo mepatesi, yema-yema mepatesi kana ratangara. 22 Agiana tempo ei Ku'ulikaka komi, yema-yema masodo ri tou ntani, kana ratangara, pade yema-yema mopangkatu tou ntani, kana ratangara ri ngayo nu Topotangara Agama. Pade yema-yema mangulikaka tou ntani nadoyo, masipato ratadiaka ri rara apu naraka.
23 Jadi, ande rapana mesua komi ri Sou nu Allatala mangkeni penomba-mi, pade mambela mi-tora bakote naria tou to nadua rara-na si komi, 24 pawiamo ulu penomba-mi ee ri ngayo meja penombaa, pade koumo komi ulu mosingkabelo ante tou ee. Maopu ee-da pade manculikida komi mambei penomba-mi ee.
25 Ande rapana maria tou mampangaduka komi ri potangaraa, posingkabelomo komi ante tou ee ranca-mi molumako malou ri potangaraa. Apaa, ande tado mosingkabelo mpanculi komi ante ia, tou ee kana mampangaduka komi ri topotangara, pade topotangara ee mbii mambei komi ri surodado-na, pade surodado ee mopasua komi ri rara tarungku. 26 Ku'ulikaka komi: Tado mamala komi rasuwuraka lako ri rara tarungku ee, ande tadopa mi-bayari pura sumawee waya-mi.”
27 “Nincani-mimo bakote naria parenta ewa ei: Nemo mobualo. 28 Agiana Ku'ulikaka komi: Yema-yema mangkalio bangkele pade madota mampogou-ya, tou ee nobualo-yamo ante bangkele ee ri rara nu pekiri-na. 29 Ande mata ngkana-mu mampakeni-ko mowia jeko, sungkimo pade tadimo mata ee! Aginamo sangaya parewa nu koro-mu malali, aga nemo sumawee koro-mu ratadiaka ri rara naraka. 30 Ande pale ngkana-mu mampakeni-ko mowia jeko, tompo pade tadiakamo pale-mu ee! Aginamo sangaya parewa nu koro-mu malali, aga nemo sumawee koro-mu ratadiaka ri rara naraka.”
31 “Naria mbi pepatuduki ngkoulu ewa ei: Yema-yema madota mampogaaka bangkele-na, ia kana mambei sura pogaa ri bangkele-na. 32 Agiana Ku'ulikaka komi: Yema-yema mampogaaka bangkele-na, ntanono bangkele-na ee tado naria nogou sala ante baleilo ntani, batuana ia nampopobualo bangkele-na. Pade yema-yema mamponcambokoka bangkele to nipogaaka ee, ia mbii nobualo.”
33 “Nincani-mimo bakote naria parenta to niuli ri totua-ta impia ewa ei: Nemo motipa-tipaa. Nuapa to nitipa-mu ante nosumpa ri ngayo nu Allatala, kana mu-powia. 34 Agiana tempo ei Ku'ulikaka komi: Nemo mpuu mosumpa ante mangkasangai langi, apaa langi poncundaa nu Allatala. 35 Nemo mosumpa ante mangkasangai dunia, apaa dunia lampi paa nu Allatala. Nemo mosumpa ante mangkasangai Yerusalem, apaa Yerusalem ee-mo ngata nu Mbagou Bete. 36 Iwee mbiida nemo mosumpa ante mangkasangai woo-mu, apaa iko dodo tado mamala mowia wulua-mu majadi mabula ba mawuri, noudamo kambana sancila. 37 Ande i komi madota mowia banuapa-pa ulimo io, pade ulimo tado ande tado madota komi.
38 “Nincani-mimo parenta impia to nanguli ewa ei: Mata rasambei nu mata, ngisi rasambei nu ngisi. 39 Agiana tempo ei Ku'ulikaka komi: Nemo mobalasi tou to nampowia nuanu nadaa si komi. Pegoliana ande tou mosapa peli ngkana-mu, weikaka mbii-ya peli ngkabeo-mu nasapa. 40 Pade ande maria tou mopangaduka komi ri topotangara pade mamperapi powaru-mu, weikaka mbii-ya powaru ndoe-mu. 41 Ande maria tou mantudu komi molemba dagana-na sakilo kawaona, lembamo dagana-na ee rokilo kawaona. 42 Ande maria tou merapi nuanu to naria siko, weikaka-ya. Pade nemo mbii mampoarai tou to madota meodo banuapa-pa siko.”
43 “Nincani mbii-mimo pepatuduki to nanguli ewa ei: Potowe-mo singkapada manusia-mu pade podaamo bali-mu. 44 Agiana tempo ei Ku'ulikaka komi: Potowemo bali-mu, pade sambayanimo tou-tou to nampaduasi komi, 45 bona i komi majadi ana-ana nu Tuama-mi ri suruga. Apaa Allatalamo to nampopembere eo bo nampakadungku uda ri tou to nadaa to tado natundu ri lolita nu Allatala, nasimbei ewa ri tou to nabelo to natundu ri lolita nu Allatala. 46 Ande ikomi kawule mampotowe tou to nampotowe komi, nuapa pade nabalasi nu Allatala parabuata-mi ee? Apaa topedusu balasitee to nadaa inggu-ra, nampotowe mbii tou to nampotowe-ra. 47 Pade ande ikomi kawule metabe ri wega-wega-mi ngkola, nuapa-mo pelabiana? Tou-tou to tado nanguncani Allatala mbii mamala mowia ewa ee! 48 Tuama-mu ri suruga nampotowe sumawee manusia ante rara mpuu-Na. Ikomi mbii kana ewa ee.”