9
1 Pade nangulimo i Yesus si sira:
“Kakono-konona,
lako riolo-mi ei maria tou tadopa mamate,
ande tadopa na-kalio Allatala Moparenta ante kuasa-Na.”
I Yesus nipemabose ri wumbu bulu
9:2-13
2 Aono eo naliu naopu ee,
nikenimo ni Yesus i Petrus ante i Yakobus bo sarara-na i Yohanes,
nalou ri bulu nalangko.
Karata-ra ri bulu ee,
nikalio-ra i Yesus nobali tari-Na.
3 Powaru-Na najadi nabula ngea nerangkila.
Tado-namo saduaa ri dunia ei to namala notoposi powaru-na namposimbei kabula nu powaru ni Yesus.
4 Naopu ee nikalio-ra i Elia pade i Musa neonga pade nampololitaka i Yesus.
5 Pade niulimo ni Petrus si Yesus:
“Guru,
nasana mpuu-ka isei.
Beiwa ande kapowia bambaru-ta,
sangkou si-Ko,
sangkou mbii si Musa pade sangkou mbii si Elia.”
6 Pade niuli ni Petrus ewa ee apaa tado-mo nincani-na nuapa na-uli,
apaa neliu gaga eka-ra.
7 Pade naratamo gawu nampakaolu-ra,
pade nironge-ramo wotu nu Allatala nololita:
“Eimo Ana towea-Ku.
Ronge-Yamo.”
8 Sampiga mata nikalio-ra tado-mo naria i Musa pade i Elia,
kawule sadua ni Yesus-damo namporoa-ra.
9 Ranca-ra nesompo lako ri bulu ee,
nitetesi-ramo ni Yesus:
“Nemo mi-uli ba siyema-yema nuapa nikalio-mi ee see,
ande tadopa matuwu nculi-Ku,
Ana nu Manusia lako ri kamatea.”
10 Nuanu niuli ni Yesus ee nipeirara mpuu-ra,
pade nipololita mboto-ramo nuapa batuana i Yesus nanguli,
matuwu nculi-Ya lako ri kamatea-Na.
11 Pade nepekutana-ramo si Yesus:
“Nuapa pade topande ri Buku Taurat nanguli,
i Elia kana marata mpanculi mampokoului Mbagou Topepakasalama?”
12 Nesono i Yesus:
“Nakonoda panguli-mi etu,
i Elia kana marata mokoulu bona mampakabelo ngila ngayana.
Agiana beiwa ante Yaku,
Ana Manusia?
Ewa naria nitulisi ri rara Buku Nagasa Ana nu Manusia kana mangkolo madea kapepaa pade rakanene nu tou.
13 Ku'ulikaka komi,
narata amimo i Eliaa,
agiana nipoewee-wee nu tou-ya,
ewa to nitulisi nu nabi-nabi nancambelai-ya.”
I Yesus mowura wao tuwu lako ri ngana to nawojo
9:14-29
14 Tempo ni Yesus,
i Petrus,
i Yakobus pade i Yohanes nanculi ri ana-ana guru ntanina,
nikalio-ra nadea tou nampolimu-limui ana guru ni Yesus ntanina ee.
Basangkia dua topande ri Buku Taurat nombesono ante ana-ana guru-Na.
15 Pangkalio nu sumawee tou dea ee i Yesus,
nakioma-ramo,
pade nokukumbeno nampotomuka-Ya.
16 Nipekutana-ramo ni Yesus:
“Nuapa nipombebilii-mi ante topande ri Buku Taurat etu?”
17 Naria sadua riolo nu tou dea isee nesono:
“Guru,
yaku ante ana baleilo ei see madota mampotomuka-Ko.
Ana-ku ei tadomo namala nololita,
apaa nipesua nu wao tuwu.
18 Ande butu ngkanina wao tuwu ee mampesuaya,
nawomboka mbiimo koro-na ri tana,
pade nowurancumita ngangana pade nangkiki baga-na,
pade narangkodomo koro-na.
Niperapi-kumo ri ana-ana guru-Mu,
bona mowura wao tuwu ei,
agiana tado nipakule-ra nowura.”
19 Pade niulimo ni Yesus si sira:
“Nangepe gagamo komi tado peparisaya-mi ei,
sangkiapa sae-Ku mamporoasi komi?
Sangkiapa saena pancabara-Ku?
Kenimo ana etu tumei.”
20 Nikeni-ramo ana ee see si Yesus.
Pangkalio nu wao tuwu ee i Yesus,
nipopokasiridi-namo koro nu ana ee,
pade nadungkamo ana ee notingkaduli ri tana,
pade nganga-na nowurancumita.
21 Pade nepekutanamo i Yesus ri tuama nu ana ee:
“Sangkiamo kasaena ana-mu ewa ei?”
Nesono tuama-na:
“Lako ri kakodia-nadapa.
22 Pade naosomo wao tuwu ee nampesimbukui mopatesi-ya ante nonawu-ya ri rara apu ba ri rara ue.
Ande mamala-Ko powiamo banuapa-pa,
potowe pade tulungika kami.”
23 Agiana niontika-ya ni Yesus:
“Nuapa pade niuli-mu ande mamala-Ku!
Nuapa-pa mamala rapowia,
asala mu-parisaya Ku.”
24 Pade nongaremo tuama nu ana ee:
“Tua,
niparisaya-kumo Ko.
Tulungikua-ku bona maroso ntoto poparisaya-ku Ko!”
25 Pangkalio ni Yesus kadea-deaa oamo tou narata nosintobu,
niparentamo ni Yesus wao tuwu ee:
“Hee wao tuwu to nepakawongo pade nepakawojo,
Ku-parentako,
pesuwumo-ko lako ri ana ei pade nemo oa mupesua-ya!”
26 Nongaremo wao tuwu ee,
pade nipopokasiridi-namo ana ee,
nesuwu-yamo lako ri ana ee.
Ana ee nikalio ewa tomate,
nangkajadika nadea tou nanguli:
“Namate-yamo.”
27 Pade nikakamumo ni Yesus pale nu ana ee pade nibao-Na bona mamala memata.
Pade nokongkoremo ana ee.
28 Pesua-ra ri sou pearia-ra tado-namo yema ri sou ee,
wule isira ngkola.
Nepekutana-ramo si Yesus:
“Nuapa sabana pade ikami tado namala nowura wao tuwu ee?”
29 Nesono i Yesus:
“Wao tuwu ewa ee,
tado mamala rawura ante nuapa-pa ntanina,
ande tado ante sambaya.”
Pepoparonge karongkanina nancambelai kapepaa ni Yesus
9:30-32
30 I Yesus ante ana-ana guru-Na nampawia ngata ee pade nopapola polumako-ra noliu ri ngamba Galilea.
Tado nadota-Ya rancani ntou riumba pearia-Na,
31 sabana i Yesus ranca-Na nopatuduki ana-ana guru-Na:
“Yaku,
Ana Manusia kana rawei ri kakuasa nu manusia,
pade kana rapatesi,
agiana ri eo katolu eona kana matuwu nculi-Ku.”
32 Ana-ana guru-Na tado nanguncani nuapa to nipatudukika-ra ni Yesus,
agiana naeka-ra nampekutana-Ya.
Yemapa neliu kabetena ri olo nu ana-ana guru
9:33-37
33 Naliu ee naratamo i Yesus pade ana-ana guru-Na ri ngata Kapernaum.
Ri sou-rapa,
nipekutanamo ni Yesus ana-ana guru-Na:
“Nuapa-da see nipombebilii-mi ranca nolumako ee see?”
34 Agiana Tado naria-ra nesono,
sabana ri tongo dala ee see isira nampombebilii yema neliu kabetena riolo-ra.
35 Noncundamo i Yesus,
pade nipokio-Namo sampulu rodua ana-ana guru-Na ee.
Pade niulikaka-Na ramo:
“Yema to madota majadi panakouluna,
ia kana majadi topopuri ntoto pade kana majadi batua nu sumawee tou.”
36 Pade nialamo ni Yesus sadua ngana kodi,
nipopokongkore-Na ri ngayo-ra.
Nikalipuimo ni Yesus ana ee,
pade niuli-namo ri ana-ana guruNa:
37 “Yema-yema mampadokoi sadua ngana kodi ewa ei,
ri rara nu sanga-Ku,
ia nampadokoi-Ku.
Pade yema-yema mampadokoi-Ku,
tado Yaku nidokoi-na,
agiana nampadokoi-Ya to nantudu-Ku.”
Sadua tou tado ana guru ni Yesus nowura seta
9:38-41
38 Pade nangulimo i Yohanes si Yesus:
“Guru,
naria nikalio-ka sadua tou nowura wao tuwu ri rara nu sanga-Mu.
Agiana nitagi-ka ya apaa tado tou lako si kita.”
39 Pade nangulimo i Yesus:
“Nemo mitagi-ya,
apaa tado maria saduaa tou mowia nuanu nadupa lako ri rara nu sanga-Ku,
mamala mangkanene-Ku.
40 Yema-yema tado nangewa-ta,
ia-mo to namposambira-ta.
41 Ku'ulikaka komi:
Kakono-konona,
yema-yema mampanginui komi sancangkiri ue sabana ikomi topantutu Mbagou Topepakasalama,
tou ee kana mantarima tombo-na.”
Nuanu nampaka jeko tou
9:42-50
42 “Yema-yema mampakapusa sadua ana kodi to namparisaya-Ku agilounamo raloeka watu pogilia ri tambolo-na pade ratadiaka ri tasi.
43 Ande pale-mu mowia jeko,
tompo-mo pale-mu etu.
Agilounapa mopale sambira-ko matuwu ante Allatala aga nemo mopale rombira-ko mesua ri naraka,
ri apu tado maria kamateana.
44 [Isee ngoni ule ntana tado mamate pade apuna tado maria kamateana duu-na masae-sae].
45 Iweetu mbii ande paa-mu mampakeniko mowia jeko,
tompo paa-mu etu.
Agilouna mopaa sambira-ko matuwu ante Allatala aga nemo mopaa-rombirako mesua ri naraka.
46 [Isee ngoni ule ntana tado mamate ante apu tado mbii maria kamateana duu-na masae-sae].
47 Pade ande mata-mu mampakeniko mowia jeko,
sungki mata-mu.
Agilouna momata sambira-ko mesua ri Poparentaa nu Allatala,
aga nemo momata rombira-ko ratende ri naraka.
48 [Isee ngoni ule ntana tado mamate ante apu tado mbii maria kamateana duu-na masae-sae].
49 Sumawee manusia rapesori ante kapepaa ewa kapane nu apu.
50 Unu nabelo ami-yada,
agiana ande matawo-damo,
ante nuapa-pa komi mampakapaga nculiya?
Etumo ikomi kana matuwu ewa unu pade matuwu mosingkabelo ante tou ntani.”