I Yesus nipemabose ri wumbu bulu
17:1-13
17
1 Aono eo naliu lako ee, nikenimo ni Yesus i Petrus ante i Yakobus pade sasara-na i Yohanes, nalou ri bulu to nalangko. Kawule i Yesus ante i sira totolu ee isee. 2 Ri ngayo-ngayo-ra, i Yesus nobali tari-Na. Lence-Na nabaa mpose ewa eo pade powaru-Na nabula ngea nerangkila. 3 Naopu ee ana guru-Na totolu ee nangkalio i Musa bo i Elia nololita ante i Yesus. 4 Nangulimo i Petrus si Yesus: “Pue, nasana mpuu-ta isei. Ande madota-Ko, ku-patinda toluongu bambaru isei, saongu si-Ko, saongu si Musa, pade saongu mbii si Elia.” 5 Ranca ni Petrus nololita-dapa, ncamole-mole nanoumo gawu to nabaa mpose mpuu nampakaulu-ra, pade lako ri rara nu gawu ee nirongemo wotu to nanguli: “Eimo Ana-Ku to nipotowe-Ku. Ia-mo to nampakawoe rara-Ku. Ronge-Yamo!” 6 Pamparonge nu ana-ana guru ni Yesus wotu nololita ee, nateturobo-ramo ri tana, apaa neliu mpuu eka-ra. 7 Agiana nameimo i Yesus pade notui-ra. Nanguli-Ya: “Peongkomo komi, nemo maeka!” 8 Naopu ee nikalio-ra, tadomo naria tou isee, sadua ni Yesus ngkola-damo nikalio-ra.9 Pesompo-ra lako ri bulu ee, nipopatora-ramo ni Yesus: “Nemo ngoni mi-popanguncanika si yema-yema nuapa nikalio-mi isee, ande tadopa tempona Ana Manusia rapatuwu mpanculi lako ri kamatea.” 10 Pade nepekutanamo ana-ana guru-Na: “Nuapa sabana topande-topande ri Buku Taurat nanguli bakote i Elia kana marata mokoulu?” 11 Nesono i Yesus: “Nakono amida lolita-ra ee. I Elia kana marata mokoulu, ia-mo to kana mampasadia ngila ngayana. 12 Agiana Ku'ulikaka komi, naratamo i Elia, agiana tou-tou tado nanguncani-ya, isira noduasi-ya nantutu dota nu rara dodo-ra. Iwee mbii powia-ra Ana nu Manusia.” 13 Lako isee pade nincani-da nu ana-ana guru-Na bakote Ia nololita nancambelai i Yohanes Topebaptis.
I Yesus nampakabelo sadua ana kabilasa to nadua lintua
14 Nanculiki-pa i Yesus bo ana-ana guru-Na ri tou dea ee, naratamo sadua totua baleilo notumbukotu ri ngayo ni Yesus, 15 pade nanguli: “Pue, potowe ana-ku. Ia nadua lintua. Perata nu dua lintua-na nantomo mpuu, nangkajadika naoso-ya nadungka ri rara nu apu pade ri rara nu ue. 16 Nikeni-ku-yamo ri ana-ana guru-Mu, agiana tado namala-ra nampakabelo-ya.” 17 Nesono i Yesus: “Nangepe gaga-mo komi ei! Ikomi mpuu-mpuu tou-tou to norara ntani pade tado neparisaya. Duuna neipia-Ku mamporoasi komi pade mancabara si komi? Kenimo ana etu tumei!” 18 Pade niwura-mo ni Yesus wao tuwu to nampakadua ana ee, pade bulawee ee mbii nabelomo ana ee.
19 Nangkosupa tou dea ee, namei-mo ana-ana guru-Na nampekutana-Ya: “Pue, nuapa sabana pade tado namala-ka nowura wao tuwu ee?” 20 Nesono-Ya: “Sabana ikomi tado neparisaya. Ku'ulikaka komi, noudamo ewa bete nu besa nu besa sesawi ngkola kaparisayaa-mi, mamala komi manguli ri bulu ei: Poencu-ko isemei, kana moencu bulu ee. Tado maria namo sangayaa nuanu to tado mamala mi-powia. 21 [Agiana wao tuwu ewa ei, kawule mamala rawura ante sambaya bo mopuasa.]”
Pepopanguncanika karongkanina nancambelai kapepaa ni Yesus
17:22-23
22 Tempo nu ana-ana guru ni Yesus notobu ri Galilea, nangulimo i Yesus si sira: “Tadomo masae, Ana nu Manusia kana rawei ri kakuasaa nu manusia. 23 Yaku kana rapatesi, agiana ri eo katolueona Yaku kana rapatuwu mpanculi.” Namparonge lolita-Na ee, nentuumo rara nu ana-ana guru-Na.
I Yesus nobayari balasitee nu Sou nu Allatala
17:24-27
24 Narata-pa i Yesus bo ana-ana guru-Na ri Kapernaum, nameimo sadua topedusu balasitee nu Sou nu Allatala si Petrus pade nepekutana: “Nibayari-da nu Guru-mu balasite nu Sou nu Allatala ba tado?” 25 Nesono i Petrus: “Nibayari-Na!” Nanculi-pa i Petrus ri sou pearia-ra, nipokouluimo ni Yesus nampekutana-ya: “Beiwa pamparata-mu Simon? Yema-da to kana mobayari balasitee ri mbagou-mbagou ri dunia ei? Todea-da ba torata-da?” 26 Nesono i Petrus: “Torata” Nanguli i Yesus: “Ande iweetu wea, todea tado-mo mobayari. 27 Agiana noudamo iwee, nemo ta-pakakodi rara nu tou ee. Jadi, koumo-ko ri rano mopeka. Alamo bou to paramulana nambela peka-mu. Ri rara nganga nu bou ee kana mu-rata doi to maganamo rapopobayari balasitee-ta. Alamo doi ee pade bayarimo si sira balasitee-ta.”