To Farisi pade to Saduki nerapi pampetonondi
16:1-4
16
1 Naria basangkia dua to Farisi pade to Saduki namei si Yesus madota mopanawu-Ya. Isira nerapi bona Napowia kadupaa, bona majadi pampetonondi-ra bakote mpuu-mpuu-Yada to narata lako ri Allatala. 2 Nesono i Yesus: “Ande masolo eo pade malei langi, niuli-mi mabelomo eo. 3 Ande sangkabaa pade nalei langi bo nakulimua, mi-uli eo ei kana madungku uda. Ikomi nanguncani nampetonondi kabelo bo kadaa nu eo, agiana tado nincani-mi nampetonondi nuanu nipowia nu Allatala ngkapuri ei! 4 Nadaa pade nasilaka mpuu komi tou-tou to natuwu ngkapuri ei. Ikomi nerapi-Ku mampowia kadupaa. Agiana tadomo maria kambana sangayaa mpuumo kadupa rapowiaka komi. Sampaledamo rapopakalioka komi aga kadupaa ewa to najadi si nabi Yunus ngkoulu.” Naopu nanguli ewa ee, nipawia-ramo ni Yesus. Nancambelai ragi nu to Farisi bo to Saduki
16:5-12
5 Tempo nu ana-ana guru ni Yesus nalou ri sambote rano, nikalingani-ra nangkeni roti. 6 Nanguli i Yesus si sira: “Mainga-da komi ri ragi nu to Farisi pade to Saduki.” 7 Namparonge lolita ni Yesus ee, nombepololitakamo ana-ana guru-Na: “Pade iwee lolita-Na, apaa ikita tado nangkeni roti.” 8 Nincani-da ni Yesus nuanu nipololita-ra. Jadi nanguli-Yamo: “Nuapa pade nampololita tado karia nu roti komi? Tado mpuu neparisaya gaga komi! 9 Tado oa-pa nincani-mi? Tado-mo nitora-mi roti alima to nitibe-tibeka-Ku tou alima njobu ee? Sangkia mbakatepa labina nipasintobu-mi? 10 Pade beiwa mbii ante roti papitu to nikondi nu tou aopo njobu ee? Sangkia mbakatepa labina nipasintobu-mi?. 11 Nuapa pade tado nincani-mi bakote Yaku tado nololita nancambelai roti si komi? Mainga-da komi ri ragi nu to Farisi bo to Saduki!” 12 Kaopuana ana-ana guru ni Yesus ee nanguncani bakote i Yesus nantudu-ra mainga, tado mainga ri ragi to nipopowia roti, agiana mainga ri pepatuduki-pepatuduki nu to Farisi bo to Saduki.
Pangakua ni Petrus
16:13-20
13 Naloumo i Yesus ri ngamba najungku ngata Kaisarea Filipi. Isee-Ya nampekutana ana-ana guru-Na: “Mantutu panguli nu tou, yema Ana nu Manusia ee?” 14 Nesono ana-ana guru-Na: “Naria tou nanguli i Yohanes Topebaptis. Naria mbii tou nanguli i Elia. Naria mbii tou ntanina nanguli i Yeremia, ba sadua nabi.” 15 Nepekutanamo i Yesus si sira: “Ande pamparata-mi ikomi dodo, yema-Ku ei?” 16 Nesono i Simon Petrus: “Iko ei Mbagou Topepakasalama, Ana nu Allatala To Natuwu.” 17 Nanguli i Yesus: “Norasi mpuu-ko, Simon ana ni Yunus! Apaa tado manusia nampopanguncanika-ko nuanu etu, agiana Tuamaku to ri suruga-da. 18 Etumo, bona mu-ncani, iko-mo i Petrus, watu to naroso. Todea-Ku kana Ku patinda ri wongko nu watu ee. Todea to tado mamala nadagi nu kuasa kamatea! 19 Yaku kana mambeikaka-ko gunci nu Poparentaa nu Allatala. Nuapa to mu-petagii ri wongko nu dunia, ee mbii rapetagii ri suruga. Pade nuapa to nipomakono-mu ri wongko nu dunia, ee mbii rapomakono ri suruga.” 20 Naopu ee nipopatoramo ni Yesus ana-ana guru-Na bona nemo rapopanguncanika-ra bayema-yema mpuumo bakote Ia-mo Mbagou Topepakasalama.
Pepopanguncanika paramulana kapepaa ni Yesus pade dala mantutu-Ya
16:21-28
21 Nopamula lako isee, nipanotosimo ni Yesus ri ana-ana guru-Na, bakote Ia kana malou ri ngata Yerusalem pade kana mantodosaka kapepaa-kapepaa lako ri topangkeni-topangkeni to Yahudi, tobalia-tobalia ri matana pade lako ri topande-topande ri Buku Taurat. Ia kana rapatesi, agiana ri eo katolueona, Ia kana rapatuwu mpanculi. 22 Namparonge lolita ee, nidisi-Yamo ni Petrus ri siawe-na pade nanguli: “Kana napakakawao ni Pue nuanu ee lako si-Ko. Nemo majadi nuanu ee ri koro-Mu!” 23 Neilimo i Yesus pade nanguli si Petrus: “Panganiko, apaa pekirimu ni pesua nu Mbagou Seta! Iko aga nampabato-Ku. Pekiri-mu etu aga pekiri nu manusia, tado pekiri nu Allatala!”
24 Naopu ee nangulimo i Yesus ri ana-ana guru-Na: “Tou to madota mantutu-Ku, kana napawia sumawee dota rara dodo-na, mosimbu salib-na, pade mantutu oa-Ku. 25 Apaa tou to madota mampotowe tuwu-na, ia kana mamate. Agiana tou to madota mambei tuwu-na si Yaku, kana mamparata tuwu liu-liu. 26 Nuapamo lotuna mamparata sumawee isi nu dunia ei, agiana tado mamparata tuwu liu-liu? Tado naria banuapa-pa to mamala rapoposula tuwu liu-liu ee. 27 Tadomo masae, Ana nu Manusia, moroa-roa ante malaeka-malaeka-Ku kana marata ante kuasa nu Tuama-Ku. Ri tempo ee Yaku kana mampabalasi butu dua tou mantutu nuanu to nipowia-na. 28 Bona mi-ncani, lako riolo-mi ei maria to tadopa mamate, ande tadopa nakalio Ana nu Allatala marata majadi Mbagou.”