I Yesus nopakondi tou aopo njobu
8:1-10
8
1 Sauatu eo notobu mbiimo tou dea namporoa i Yesus.
Tadomo naria kondia-ra,
pade nipokiomo ni Yesus ana-ana guru-Na pade nanguli:
2 “Natowemo rara-Ku nangkalio tou dea ei.
Tolu eo ei-ramo namporoasi-Ku,
pade kondia-ra naopumo.
3 Ande Kutudu-ra manculi ngkaoro edou,
malimpu ri dala-ramo.
Apaa naria mbii-ra edou tou narata lako ri kakawaosana.”
4 Nesonomo ana-ana guru-Na:
“Ri pearia nakalinoaa ei,
riumba-tamo mangala kondia ta-popopakondi-ra edou?”
5 Nepekutanamo i Yesus ri ana-ana guru-Na:
“Sangkia ongupa roti-mi etu?”
Nesono-ra:
“Papitu.”
6 Pade nitudumo ni Yesus tou dea ee moncunda ri tana,
pade niala-Namo roti pitu ongu ee see,
pade nosukuru ri Allatala.
Naopu ee,
nitibe-tibe-Namo roti ee pade niweikaka-Na ana-ana guru-Na bona rabagi-bagika tou dea ee.
Naopu ee nibagi-bagimo nu ana-ana guru-Na ri tou dea ee.
7 Naria mbii si sira basangkia mbaa bou kodi,
niala-Namo bou-bou ee pade nosukuru ri Allatala,
pade nitudu-Na ana-ana guru-Na mobagika-ra ante bou ee mbii.
8 Pade nangkondi-ramo duuna nabosu.
Naopu-ra nangkondi nipasidoro-ra labina,
naponu papitu mbakatepa.
9 Ba maria aopo njobu to pangkondi ee see.
Naopu ee nitudu-ramo ni Yesus manculi.
10 Pade nencawimo i Yesus ante ana-ana guru-Na ri duanga,
nalou ri ngamba Dalmanuta.
To Farisi nerapi pampetonondi
8:11-13
11 Naratamo basangkia dua to Farisi nombesono ante i Yesus bona mamala-Ya rapanawu-ra.
Niperapi-ra si Yesus mowia kadupaa,
bona majadi pampetonondi bakote Ia-mo to narata lako ri Allatala.
12 Nokanguamo i Yesus pade nesono:
“Nuapa sabana pade tou ngkapuri ei nerapi pampetonondi lako si Yaku?
Ku'ulikaka komi,
kakono-konona tado-namo sangayaa pampetonondi Ku-weikaka komi.”
13 Naopu ee nipawia-ramo ni Yesus,
nencawi-Yamo ri duanga newote mbii-ramo ri sambote nu rano ee.
Ragi to Farisi bo ragi ni Herodes
8:14-21
14 Ana-ana guru ni Yesus nangkalingani nangkeni roti,
naria saongu ngkola roti ri duanga-ra.
15 Pade nipopalinga-ramo ni Yesus:
“Maingada komi ngoni ri ragi to Farisi bo ragi ni Herodesa.”
16 Jadi nombepololitakamo ana-ana guru-Na.
Nanguli-ra:
“Ia nololita ewa elouria,
apaa tado naria roti-ta.”
17 Nincanida ni Yesus nuapa nipololita-ra,
pade nanguli-Yamo si sira:
“Nuapa pade nampololita tado karia nu rotimo komi?
Tadopa nincani-mi pade tado oapa nanoto rara-mi?
Napombo mpuu pekiri-mi.
18 Nomatada komi,
agiana tado nekalio,
notalinga,
agiana tado neronge?
Tadomo nitora-mi,
19 potibe-tibe-Ku roti alima ongu nopakondi tou alima njobu?
Sangkia mbakatepa labina nitobu-mi?”
Nesono-ra:
“Sampulu rombakate.”
20 “Pade potibe-tibe-Ku roti pitu ongu nopakondi tou aopo njobu,
sangkia mbakatepa labina nitobu-mi?”
Nesono-ra:
“Pitu mbakatepa.”
21 Pade niulikaka-ramo ni Yesus:
“Tado oapa nanoto rara-mi?”
I Yesus nampakaori sadua toburo ri Betsaida
8:22-26
22 Naratamo i Yesus bo ana-ana guru-Na ri ngata Betsaida.
Nikenimo sadua toburo si Yesus,
pade niperapi-ra Na-untu pale-Na ri toburo ee bona mamala-ya mekalio.
23 Pade nikakamumo ni Yesus pale ntoburo ee,
nikeni-Na nangkosu lako ri ngata ee.
Naopu ee niteilusi-Namo mata ntou ee.
Niuntu-Namo pale-Na ri mata nu tou ee,
pade nampekutana-ya:
“Namalamo-ko nangkalio banuapa-pa?”
24 Neolole-yamo,
pade nanguli:
“Iyo,
namala-kumo nangkalio tou-tou,
agiana nikalio-ku ewa puu-puu ngkou nolumako.”
25 Niuntu nculi mbiimo ni Yesus pale-Na ri mata ntou ee,
pade nekalio mpuumo tou ee pade naorimo mata-na,
nangkajadika sumawee nuanu nikalio-na nanoto puramo.
26 Pade niulimo ni Yesus ri tou ee:
“Panculimo-ko ri sou-mu,
pade nemo oa malouko ri ngata edou.”
Pangakua ni Petrus
8:27-30
27 I Yesus bo ana-ana guru-Na nalou ri ngata-ngata ri olo nu Kaisarea Filipi.
Ranca-ra nolumako nipekutana-ramo ni Yesus:
“Ande panguli nu tou,
yema-Ku ei?”
28 Nesono-ra:
“Naria to nanguli i Yohanes Topebaptis,
naria to nanguli i Elia,
naria mbii to nanguli:
sadua lako ri olo nu nabi.”
29 Nepekutana mbii-Yamo:
“Ande pamparata-mi,
yema-Ku ei?”
Nesono i Petrus:
“Iko ei-mo Mbagou Topepakasalama.”
30 Pade nitagi-ramo ni Yesus,
bona nemo rauli-ra ba siyema -yema nancambelai-Ya.
Pepopanguncanika paramulana nancambelai kapepaa ni Yesus pade dala mantutu-Ya
8:31-9:1
31 Naopu ee,
nopamulamo i Yesus nopatuduki sumawee ana-ana guru-Na:
“Yaku,
Ana Manusia,
kana mangkolo kapepaa pade napoara nu topangkeni-topangkeni to Yahudi,
tobalia-tobalia ri matana,
pade topande ri Buku Taurat.
Pade rapatesi-ra,
agiana kana matuwu nculi-Ku ri eo katolu eona.”
32 Kapepaa-Na ei niuli pura-Namo si sira tado-mo naria nitalendusi-Na.
Namparonge elouria,
nidisi-Yamo ni Petrus pade niposodo-na.
33 Nipeilimo ni Yesus sumawee ana-ana guru-Na,
pade niposodo nculi-Namo i Petrus:
“Pangani-ko,
Mbagou nu Seta!
Pekiri-mu etu aga pekiri nu manusia,
tado pekiri nu Allatala.”
34 Naopu ee nipokio-Namo tou dea isee bo ana-ana guru-Na,
pade nanguli-Yamo si sira:
“Yema to madota mantutu-Ku,
kana na-pawia sumawee dota dodo-na,
pade mosimbu salib-na,
mantutu oa-Ku.
35 Apaa yema mampotowe inosa-na,
tado mamparata tuwu liu-liu,
agiana yema mantunduka-Ku bo mantunduka Kareba Belo lako ri Allatala noudamo rapatesi,
ia kana mamparata tuwu liu-liu lako ri Allatala.
36 Nuapamo bundu nu tou mangkakamu sumawee gagu ri dunia ei,
pade maopu ee mamate-yamo bo tado mbii mamparata tuwu liu-liu?
37 Apaa gagu nuapamo to mamala rapoposula tuwu liu-liu ee?
38 Ande yema maeya mampangaku sanga-Ku bo lolita-Ku ri tongo-tongo nu tou ngkapuri ei to najeko bo to tado nantutu Allatala,
Yaku,
Ana Manusia mbii kana maeya mampangaku-ya ri tempo-Ku marata nculi ante kakuasa nu Tuama-Ku,
naporoasi nu malaeka-malaeka nagasa.”