Parenta nu Allatala pade ada to Yahudi
7
1 Sagontena to Farisi pade basangkia dua topande ri Buku Taurat lako ri ngata Yerusalem,
namei nampotomuka i Yesus.
2 Nikalio-ra basangkia dua ana-ana guru-Na nangkondi ante pale narumu,
apaa tado nembano ncala nantutu atura nu agama to Yahudi.
3 To Farisi ei,
nasimbei mbii ewa to Yahudi ntanina,
tadopa mangkondi-ra ande tadopa mombanoi ncala pale.
Apaa nikakamu mpuu-ra ada ntotua-ra.
4 Ande manculi-ra lako ri potomu tadopa mangkondi-ra ande tadopa rapakarawa ncala sumawee koro.
Nadea mbii-dapa ada-ada ntanina nisosora-ra,
ewa moelasi pangkondia,
pambolia ue pade pakakasa lako ri ngkala.
5 Ee-mo sabana to Farisi pade topande ri Buku Taurat ee nampekutana i Yesus:
“Nuapa pade tadomo nitutu nu ana-ana guru-Mu ada ntotua-ta?
Isira nangkondi tado noelasi ncala pale-ra.”
6 Nisonoi-ra ni Yesus:
“I komi tou-tou to nabelo wongko!
Nakono mpuumo lolita nu Allatala to niuli ni nabi Yesaya nancambelai komi:
Tou-tou ei nenomba si Yaku ante wiwi-ra,
agiana rara-ra nakawao dodo lako si Yaku.
7 Tado nuapa bundu-ra nenomba si Yaku,
apaa nuanu to nipepatudukii-ra parenta nu manusia-da,
kana rauli parenta-Kumo ee.
8 Parenta nu Allatala tado-mo nironge-mi,
nantutu parenta nu manusia-damo komi.”
9 Pade niulikaka mbii-ramo ni Yesus:
“Napande mpuumo komi ei nolali parenta nu Allatala bona mabelo popiara-mi ada ntotua-mi.
10 Naria niuli ni nabi Musa ewa ei:
Bilamo tuama bo tina-mi!
Yema-yema mopangkatu tuama bo tina-na kana rasuku mate.
11 Agiana i komi nepatuduki ewa ei:
Ande tou manguli ri tuama bo tina-na:
Nuapa to masipato ku-weikaka tuama bo tina-ku,
nipopenomba-kumo ri Allatala,
12 ante nuanu ee-damo komi nopatuduki tou ntani bona tado-mo ratulungi-ra totua-ra.
13 Jadi,
ada to nisosora-mi etudamo nipopopatuduki-mi tou,
lolita nu Allatala nilali-mimo.
Nadea mbii-dapa nuanu ntanina nipowia-mi ewa ei.”
14 Naopu ee,
nipokio mbiimo ni Yesus tou dea ee pade niulikaka-Na:
“Rongemo pade peirara bona mamala mi-ncani!
15 Tado namo sangayaa nuanu lako ri sawalikuna to nesua nikondi nu manusia mamala mampakarumu-ya.” [
16 Yema notalinga,
kana na-ronge belo-belo lolita-Ku elou!]
17 Naopu ee,
nesuamo i Yesus ri rara nu sou nampangkosuka tou dea ee,
ana-ana guru-Na nampekutana-Ya nuapa batua nu porapaika to niuli-Na ee.
18 Nisonoi-ra ni Yesus:
“Tado oapa nincani-mi?
Tado namo sangayaa kondia to nikondi nu manusia mamala mampakarumu-ya!
19 Apaa nuanu nikondi ee tado nesua ri rara nu pekiri,
aga nesua ri rara ntei pade nipopesuwu nculi.”
Ante lolita-Na ee,
nipakatantumo ni Yesus bakote butu ngaya nu kondia mamala rakondi.
20 Pade niuli mbii ni Yesus:
“Nuanu nesuwu lako ri pekiri nu tou,
ee-mo to nepakarumu.
21 Apaa lako ri rarana ee,
neumba pampekiri nadaa,
nampakeni tou nogou sala,
mangio,
mepatesi,
22 mebualosi,
nampangaku,
mowia sumawee nuanu nadaa,
netomo,
nakese,
singki rara,
nepangkatu,
langko rara,
pade mekidoyo.
23 Sumawee inggu nadaa ee,
neumba lako ri rara mpekiri pade nampakarumu tou.”
Bangkele lako ri Siro-Fenisia to neparisaya
7:24-30
24 Naopu ee nipawiamo ni Yesus ngata ee,
pade nalou ri ngata najungku ante ngata Tirusa.
Nesua-Yamo ri rara nu sou.
Patuju-Na bona tado nancani ntou dea karata-Na.
Agiana tado namala-Ya nowunika koro-Na.
25 Naria sadua totua bangkele,
to nipesua nu wao tuwu ana-na bangkele.
Pamparonge-na kareba bakote naria i Yesus ri ngata ee,
nalou-yamo si Yesus pade notumbukotu ri ngayo-Na,
26 niperapi-na ante rara mpuu-na si Yesus,
bona mamala mowura wao tuwu to nampesua ana-na.
Totua bangkele ee to Yunani,
niote ri Siro-Fenisia,
to tado to Yahudib.
27 Agiana niulikaka-ya ni Yesus:
“Palambakamo ulu ngana-ngana mangkondi,
apaa tado nabelo kondia niweikaka ngana-ngana ra'ala pade ratadika dike.”
28 Nesono bangkele ee:
“Nakono Tua.
Agiana dike-dike nangkondi sewu-sewu ngkondia to ninawu nu ngana-ngana lako ri wumbu meja.”
29 Nanguli i Yesus si-ya:
“Nakono lolita-mu etu.
Panculimoko,
apaa nesuwumo wao tuwu lako ri ana-mu.”
30 Pade nanculimo totua bangkele ee ri sou-na,
nirata-na ana-na nengkadampa ri paletaa,
pade wao tuwu ee nesuwumo lako ri ana-na.
I Yesus nampakabelo to nawongo
7:31-37
31 Naopu ee nipawiamo ni Yesus ngamba Tirus,
noliu ri ngata Sidon,
nolumako ri ngamba Dekapolis,
nalou ri rano Galilea.
32 Tempo ee naratamo basangkia dua tou si Yesus,
nangkeni to nawongo pade tado nasowa pololita-na.
Nerapi-ra si Yesus bona nauntu pale-Na motui tou ee.
33 Nikenimo ni Yesus to nawongo ee nopatani lako ri tou dea,
pade nipasua-Namo karawe-Na ri kamboa ntalinga tou ee.
Niteilusi-Namo pale-Na,
pade nipopotui-Na dila nu tou ee.
34 Naopu ee nitingara-Namo langi,
pade no'ode inosa-Na,
nanguli-Ya ri tou ee:
“Efata!
c” Batuana:
“Katebukamo!”
35 Bulawee ee mbii nerongemo tou ee,
naledemo dila-na pade nasowamo pololita-na.
36 Pade nitagi-ramo ni Yesus bona nemo rauli-ra ri tou ntani kajadia ee.
Agiana,
iweetu potagi-ra ni Yesus,
iweetu mbii pampopowole-ra kajadia ee ri tou ntani.
37 Sumawee tou to namparonge kajadia ee nakioma pade niuli-ramo:
“Sumawee nuanu nipowia-Na nabelo pura,
to nawongo nipajadi-Na neronge,
pade to nawojo nipajadi-Na nololita.”