Parenta nu Allatala pade ada to Yahudi
15:1-20
15
1 Basangkia dua to Farisi pade basangkia dua topande ri Buku Taurat lako ri ngata Yerusalem namei si Yesus. Nepekutana-ramo si-Ya: 2 “Nuapa pade ana-ana guru-Mu nolali ada nu totua-ta ngkoulu? Nangkondi-ra tado noelasi ncala pale-ra nantutu ada-ta!” 3 Nesono i Yesus: “Nuapa pade ikomi mbii nolali parenta nu Allatala, pade nantutu ada nu totua-midamo? 4 Allatala nanguli: Bilamo tuama pade tina-mu, pade yema mopangkatu tuama-na bo tina-na, kana rasuku mate. 5 Agiana ikomi nepatuduki bakote tadomo raparalou mampabila tuama-ta bo tina-ta, asala taulikaka-ra ewa ei: Nuapa to masipato kuweikaka komi totua, naopumo nipopenomba-ku ri Allatala. 6 Tou to nanguli ewa ee tado-mo naparalou mampabila totua-na. Jadi nangkakamu ada nu totua-midamo, lolita nu Allatala nipandaente-mimo. 7 Ikomi to nabelo wongko! Nakono mpuumo nuanu to nipoawili ni Yesaya nancambelai komi:8 Iweei lolita nu Allatala:
Tou-tou ei nenomba si Yaku kawule ri wiwi-ra,
agiana rara-ra nakawao lako si Yaku.
9 Tado mpuu naria lotu-ra nenomba si Yaku.
Apaa parenta nu manusia-da nipepatudukii-ra,
tado parenta lako si Yaku.”
10 Naopu ee nipokiomo ni Yesus tou-tou isee pade nanguli si sira: “Ronge bona mincani! 11 Nuanu to nesua ri nganga tado mowia tou marumu, agiana nuanu to nesuwu lako ri nganga-da to mampakarumu-ya.” 12 Naopu ee naratamo ana-ana guru-Na namei si-Ya pade nanguli: “Nincani-Muda bakote tou-tou to Farisi etu nakodi rara-ra namparonge lolita-Mu ewa ee?” 13 Nesono i Yesus: “Sumawee tinuda to tado nituda nu tuama-Ku ri suruga kana rawuka tudu ri lari-na. 14 Weetumo rapeili to Farisi etu. Isira etu topangkeni-topangkeni naburo, pade ande toburo monini toburo, rodua lou-ra kana manawu ri rara nu lowu.”
15 Nangulimo i Petrus: “Guru, panotosika-ka porapaika etu!” 16 Nesono i Yesus si sira: “Tado oa-pa nincani-mi? 17 Apa tado nincani-mi, bakote nuanu to nesua ri rara nu nganga nesompo ri rara ntei, pade nipopesuwu nculi mbii? 18 Agiana nuanu to nesuwu lako ri rara nu nganga, neumba lako ri rara, pade ee-mo to nampakarumu tou. 19 Apaa lako ri rara neumba pekiri-pekiri nadaa, to nampakeni tou nepatesi, nobualo, nogousala, nangio, nanguli lolita tado nakono pade netunturaka. 20 Sumawee nuanu ee-mo to nampowia tou majadi marumu, tado mangkondi ante pale tado raelasi ncala.”
Bangkele to Kanaan to neparisaya
15:21-28
21 Naopu ee nipaleisimo ni Yesus pearia ee pade nalou ri ngamba to najungku ngata Tirus pade Sidon. 22 Naria sadua bangkele to Kanaan ri ngamba ee, namei si Yesus ante nongare-ngare lako nanguli: “Pue, muli nu Mbagou Daud, potowe-ku! Ana-ku bangkele nipesua nu wao tuwu, napepa mpuu nirasai-na.” 23 Tado ntoto nisonoi ni Yesus bangkele ee. Pade naratamo ana-ana guru-Na pade nerapi si-Ya: “Guru, tudumo bangkele etu mangani. Apaa ia kawule nongare-ngare netutu ri bengo-ta!” 24 Nesono i Yesus: “Yaku nitudu kawule mamei ri to Israel, peliu-liuna ri to Israel to napusa.” 25 Namei-mo bangkele ee notumbukotu ri ngayo ni Yesus pade nanguli: “Tulungi-ku, Pue.” 26 Nesono i Yesus: “Tado nabelo mangala kondia nu ngana pade ratadika dike.” 27 Nesono bangkele ee: “Nakono, Pue. Agiana dike mbii nangkondi sewu to nanawu lako ri meja nu tumpu-na.” 28 Pade nangulimo i Yesus si-ya: “Tina, nabete mpuu kaparisayaamu! Madupamo nuanu to nipodota-mu!” Bulawee ee mbii nabelomo ana nu bangkele ee.
I Yesus nampakabelo tou-tou to nadua
15:29-31
29 Nipaleisimo ni Yesus pearia ee, pade nolumako ri soso nu talinti rano Galilea pade nentode ri bulu pade noncunda isee. 30 Nadea tou namei si-Ya nangkeni to napungku, to nalope, to naburo, to nawojo, pade nadea mbii-pa to dua ntanina. Niuntu-ramo tou-tou to nadua ee ri ngayo ni Yesus, pade nipakabelo pura ni Yesus. 31 Tou dea to naria isee namoleara mpuu nangkalio to nawojo namalamo nololita, to nalope nanoromo polumako-na, to napungku namalamo nolumako, pade to naburo namalamo nekalio. Pade niune-ramo Allatala nu to Israel.
I Yesus nopakondi tou aopo njobu
15:32-39
32 Naopu ee nipokiomo ni Yesus ana-ana guru-Na pade nanguli: “Natowemo rara-Ku ri tou dea ei. Tolu eo ei-ramo nantutuKu, tadomo naria kondia-ra. Tado madota-Ku mampalambaka-ra manculi ngkaoro, malimpu-ra ngoni ri dala.” 33 Pade nepekutanamo ana-ana guru-Na si-Ya “Rimba-tamo mamparata kondia ri pearia nakalinoaa ei bona raweikaka tou iwei gagamo kadeana ei?” 34 Nipekutana-ramo ni Yesus; “Sangkiaongu roti to naria si komi?” Nesono-ra: “Papitu, pade bou kodi basangkia mbaa.” 35 Nitudumo ni Yesus tou dea ee moncunda ri tana. 36 Pade niala-namo roti papitu ante bou ee, pade nosukuru ri Allatala. Naopu ee nitibe-tibe-Namo roti pade bou ee ante pale-Na, pade niwei-Na ri ana-ana guru-Na. Naopu ee nibagi-bagimo nu Ana-ana guru-Na ri tou dea ee. 37 Sumawee tou ee nangkondimo duuna nabosu. Naopu-ra nangkondi, nipasintobumo nu ana-ana guru-Na labi nu kondia ee, naponu papitu mbakatepa. 38 Kadea nu baleilo to nangkondi tempo ee naria aopo njobu, tadopa nibila bangkele bo ngana-ngana. 39 Naopu ee nitudumo ni Yesus tou dea ee manculi. Pade nencawi-Yamo duanga nalou ri ngamba Magadan.