Tutura nancambelai popatesi i Yohanes Topebaptis
14:1-12
14
1 Ri tempo ee i Herodes, mbagou to nakuasa ri ngamba Galilea, namparonge kareba nancambelai i Yesus. 2 Nangulimo i Herodes ri pangka-pangka bete to nampangawa-ya: “Tantu ei-mo i Yohanes Topebaptis to natuwu mpanculimo lako ri kamatea-na! Ee-mo sabana pade naria kuasa-Na nowia kadupaa.” 3 Sabana impia netudumo i Herodes mosoko i Yohanes pade mosilu-ya bo mopasua-ya ri rara ntarungku. I Herodes nowia ewa ee sabana i Herodias, bangkele nu sarara dodo-na, i Filipus. 4 Apaa nadea ngkanimo i Yohanes ei nangulikaka i Herodes ewa ei: “Tado mamala-ko moncamboko ante i Herodias!” 5 I Herodes madota mopatesi i Yohanes, agiana naeka mbii-yada ri tou dea, apaa niuli-ra i Yohanes ee nabi. 6 Tempo ni Herodes nowia susa eo pangotea-ya, ana ni Herodias torandaa nogale-gale ri ngayo nu torata-na. Pogale-galena ee nampakadonu mpuu rara ni Herodes, 7 nangkajadika notipamo i Herodes ri ana torandaa ee ante nosumpa bakote nuapa-pa naperapi, kana raweikaka-ya. 8 Apaa niasui nu tina-na, nangulimo ana toranda ee: “Yaku merapi woo ni Yohanes Topebaptis mu-weikaka-ku bulawee ee, raboli ri wongko nu baki!” 9 Namparonge perapia ee, nasusa mpuumo rara ni Herodes. Noudamo iwee apaa bila nataloulu-yamo nosumpa ri ngayo nu torata-na, nipetudui-namo bona perapia nu ana torandaa ee raweikaka-ya. 10 Nitudu-namo surodado-na malou ri rara ntarungku motompo woo ni Yohanes. 11 Naopu ee woo ni Yohanes ee nikeni mpesua, niboli ri wongko nu baki pade niweikaka ana toranda ee. Ana torandaa ee mbiipa nangkeni woo ee ri tina-na. 12 Namparonge kajadia ee, naratamo ana-ana guru ni Yohanes nangala bata ni Yohanes pade nitana-ra. Naopu ee nalou-ramo nanguli kajadia ee si Yesus.I Yesus nopakondi alima njobu tou
14:13-21
13 Nironge-pa ni Yesus kareba kamate ni Yohanes, nangkosu-Yamo lako ri pearia ee ante nencawi duanga sadua-Na, nalou bona mopatani ri pearia to nakalinoaa. Agiana nironge-pa nu tou-tou nuanu ee, nipaleisi-ramo ngata-ngata-ra pade nodala ntana-ramo nalou nantutu i Yesus. 14 Pesompo ni Yesus lako ri duanga, nikalio-Na nadea mpuu tou nampopea-Ya. Nesuwumo towe rara-Na, pade nipakabelo-Namo tou-tou to nadua.
15 Nakinowia-pa, naratamo ana-ana guru ni Yesus pade nanguli si-Ya: “Nakinowiamo ei pade pearia ei nakalinoaa. Agina Mu-tudumo tou-tou ei manculi, bona mamala-ra mangoli kondia ri ngata-ngata riolona ei.” 16 Nesono i Yesus: “Weetumo malou-ra, ikomi-damo to mambeikaka-ra kondia.” 17 Nesono ana-ana guru-Na: “To naria si kami ei kawule alimaongu roti pade rombaa bou!” 18 Nanguli i Yesus: “Kenimo tumei.” 19 Naopu ee nitudu-Namo tou dea ee noncunda ri kawoko. Niala-Namo alimaongu roti pade bou rombaa ee, pade nantingara langi bo nosukuru ri Allatala. Naopu ee nitibe-tibe-Namo roti ee ante pale-Na pade niweikaka-Na ana-ana guru-Na bona rabagi-bagika-ra ri tou dea ee. 20 Pade nangkondi-ramo pura duuna nabosu. Naopu ee nipasintobumo nu ana-ana guru ni Yesus labi nu kondia ee, naria sampulu rombakatepa labina. 21 Tou to nangkondi tempo ee naria alima njobu dea-ra, tadopa nibila bangkele bo ngana-ngana.
I Yesus nolumako ri wongko ue
14:22-23
22 Naopu ee nipasosimo ni Yesus ana-ana guru-Na mencawi duanga pade mokoulu-ramo mewote rano, apaa Ia nantudu tou dea ee-dapa bona manculi ri ngata-ra. 23 Nanculi-pa tou dea ee, naloumo i Yesus sadua-Na ri pobuluana bona nosambaya. Tempo ee nadedimo, i Yesus isee oa Ya-dapa sadua-Na. 24 Ranca-Na isee, duanga to nisawi nu ana-ana guru-Na nakawao ri pentongoanamo. Duanga ee nitampe nu balumba, apaa narimboso ngolu newui lako ri ngayo nu duanga. 25 Rapa-rapana tinti tolu parabaa, naratamo i Yesus si sira nolumako ri wongko nu ue, 26 Pangkalio-Ya nu ana-ana guru-Na nolumako ri wongko nu ue, nabatoro-ramo pade naeka. Nanguli-ra: “Edou seta!” Pade nokalara-ramo nikeni nu eka-ra. 27 Agiana nagasi-gasimo i Yesus nangulikaka-ra: “Karoo komi! Yaku-da ei, nemo maeka!” 28 Pade nongaremo i Petrus nosonoi-Ya: “Pue ande Iko-da etu, tudu-kumo mamei si-Ko ante molumako ri wongko nu ue.” 29 Nanguli i Yesus: “Kameimo-ko.” Pade nesompomo i Petrus lako ri duanga, nolumako ri wongko nu ue pade namei si Yesus. 30 Agiana nikalio-napa ngolu ri rano ee nabete, naeka-yamo pade kalolo-loloa-yamo, nongare-yamo: “Pue, tulungi-ku!” 31 Nagasi-gasimo i Yesus noulu pale-Na pade nosoko-ya, pade nanguli: “Petrus, Petrus, iko ei tado neparisaya gaga, nuapa pade nokarara-ko si Yaku?” 32 Naopu ee nencawimo i Yesus bo i Petrus ri duanga, pade ngolu mbii neuntumo. 33 Ana-ana guru-Na to ri rara nu duanga ee notumbukotu nenomba si-Ya pade nanguli: “Nakono mpuuda, Iko-mo Ana nu Allatala!”
I Yesus nampakabelo tou-tou to nadua ri Genesaret
14:34-36
34 Naratara-pa ri sambote nu rano, nencowe-ramo ri Genesaret. 35 Pangkalio nu tou-tou isee bakote to narata ee i Yesus-da, nipopowole-ramo kareba karata ni Yesus ee ri sumawee ngamba ri ngata ee. Pade nikenimo sumawee tou nadua si Yesus. 36 Pade nerapi-ramo si-Ya bona mamala motui powaru ndoe-Na, kambana doe-namo. Pade sumawee to notui doe nu powaru ndoe-Na najadi nabelo.