I Yesus nantudu sampulu rodua ana guru-Na
9:1-6
9
1 Nipokiomo ni Yesus sampulu rodua ana guru-Na mosintobu. Pade nambeika-ra kuasa bona mamala mowura wao tuwu pade mampakaori ngila ngaya nu dua. 2 Naopu ee nitudu-ramo ni Yesus malou mampololita kareba mancambelai beiwa Allatala moparenta majadi Mbagou, pade mampakabelo tou-tou nadua ante kuasa ni Pue. 3 Nanguli-Yamo si sira: “Nemo mangkeni nuapa-nuapa komi ri polumakoa. Nemo mangkeni tioko, tasi, roti, doi ba powaru posambei. 4 Ba riumba-umba komi ratarima, peari-mo komi isee duu-na mi-paleisi ngata ee. 5 Agiana ande marata komi ri saongu ngata bete bo ngata kodi pade tou-tou isee tado madota mantarima komi, paleisi-mo ngata ee pade tampeasi-mo rambu ntana lako ri palata mpaa-mi bona majadi pepopatora si sira.” 6 Pade neongko-mo ana-ana guru-Na nalou nampebutu ngata-ngata kodi, nampopowole Kareba Belo lako ri Allatala pade nampakabelo tou-tou nadua ante kuasa ni Pue.
I Herodes pade i Yesus
9:7-9
7 Pamparonge ni Herodes kareba nancambelai sumawee kadupaa to nipowia ni Yesus, neingu-yamo pade tado-mo naroo rara-na. Apaa naria basangkia dua tou nanguli bakote i Yohanes Topebaptis natuwu nculi-yamo. 8 Naria mbii tou ntani nanguli ia ei-mo i nabi Elia to neonga mpanculi. Naria mbii tou ntani nanguli i Yesus ei sadua lako riolo nu nabi-nabi ngkoulu to natuwu nculi lako ri kamatea. 9 Agiana nanguli i Herodes: “Nitudu-kumo ngoni mpia tou notompo woo ni Yohanes. Agiana yema-da wea tou ei? To naoso-mo nironge-ku nowia kadupaa.” Ee-mo sabana i Herodes nadea ngkani nampesimbukui bona mamala mangkalio i Yesus.
I Yesus nopakondi tou alima njobu
9:10-17
10 Nanculi-pa ana-ana guru-Na ee, nipatuntu-ramo si Yesus sumawee nuanu to nipowia-ra. Naopu ee nibawei-ramo ni Yesus malou mopatani ri saongu ngata to nisanga Betsaida. 11 Agiana nincani-da ntou dea kalouaa-ra, pade nitutura-Yamo. Nisombo-ramo ni Yesus pade nipololitaka-Na nancambelai beiwa Allatala moparenta majadi Mbagou. Pade Ia mbii nampakabelo sumawee tou nadua riolo-ra.
12 Mapara masolopa eo, narata-mo sampulu rodua ana guru-Na pade nanguli: “Tudu-mo tou dea ei malou ri ngata-ngata kodi pade ri sou-sou ntou riolona ei, bona rarata-ra kondia pade paletaa-ra. Apaa pearia ei ri sokina pade nakalinoaa.”
13 Agiana nanguli i Yesus: “Ikomi-mo to mopakondi-ra.”
Nesono ana-ana guru-Na: “Ha, ande ikami-da mopakondi-ra, tantu ikami-da malou mangolikara kondia! Apaa si kami ei naria kawule alimaongu roti pade rombaa bou.” 14 Rapa-rapana naria ba alima njobu baleilo isee.
Pade nangulimo i Yesus: “Tudu-ramo moncunda santaguna-santaguna, pade butu ntaguna-na alima mpulu kadea-ra.” 15 Ana-ana guru ni Yesus nowia nuapa nituduka-ra ni Yesus, pade noncunda-mo sumawee tou ee. 16 Pade niala-mo ni Yesus alima ongu roti pade rombaa bou ee, pade nantingara langi pade nosukuru ri Allatala. Naopu ee nitibe-tibe-Namo roti pade bou ee ante pale-Na pade niwei-Na ri ana-ana guru-Na bona rabagi-bagika-ra ri tou dea ee. 17 Sumawee tou ee nangkondi duu-na nabosu. Pade nipasidoro-mo nu ana-ana guru-Na labina, naria sampulu rombakatepa.
Pangakua ni Petrus
9:18-21
18 Sauatu eo, ranca ni Yesus nosambaya sadua-Na, namei-mo ana-ana guru-Na si-Ya. Nipekutana-ramo ni Yesus: “Ande panguli nu tou yema-Ku ei?” 19 Nesono-ra: “Naria tou nanguli Iko ei i Yohanes Topebaptis, naria mbii tou nanguli i Elia to natuwu nculi, pade naria mbii tou ntanina nanguli sadua lako riolo nu nabi ngkoulu to natuwu nculi.”
20 Pade nepekutanaki mbii-Ya: “Ande pamparata-mi, yema-Ku ei?”
Nesono i Petrus: “Iko-mo Mbagou Topepakasalama to nitipa nu Allatala.” 21 Pade nitagi mpuu-mpuu-ramo ni Yesus bona nemo rauli-ra ba siyema-yema bakote Ia-mo Mbagou Topepakasalama to nitipa nu Allatala.
Popeparonge paramulana kapepaa ni Yesus pade dala mantutu-Ya
9:22-27
22 Pade nanguli-mo i Yesus: “Yaku, Ana Manusia nipakatatapu ami-mo nu Allatala bona mangkolo pepa pade naporou nu topangkeni-topangkeni to Yahudi pade tobalia-tobalia ri matana, pade to pande-topande ri Buku Taurat.a Maopu ee, Yaku kana mamate rapatesi, agiana ri eo katolu-eona Yaku kana matuwu mpanculi.”
23 Pade nanguli mbii-Yamo ri sumawee ana guru-Na: “Butu dua tou to madota mantutu-Ku, kana napawia kaparalouaa dodo-na mosimbu salib-na butu eo-na, pade mantutu oa-Ku. 24 Sabana butu dua to madota mampakasalama inosa-na, kana malali inosa-na. Agiana tou to mamate rapatesi sabana nantutu-Ku, ia kana mamparata tuwu liu-liu. 25 Nuapa-mo bundu tou mamparata sumawee gagu ri dunia, ande ia morusaka pade mampakaopu katuwu-na. 26 Butu dua to maeya mampangaku-Ku pade pepatuduki-Ku, Yaku, Ana Manusia mbii tado mampangaku-ya majadi topantutu-Ku, tempo-Ku marata ngoni ri rara pampemabose-Ku, pade pampemabose Tuama-Ku, pade pampemabose malaeka-malaeka nu Allatala. 27 Ku'ulikaka komi: Kakono-konona riolo-mi ei, maria tou to tadopa mamate ande tadopa nakalio Allatala moparenta.”
I Yesus nipemabose ri wumbu bulu
9:28-36
28 Naliupa saminggu naopu nopatuduki ngila-ngaya-na ee, nentodemo i Yesus ri saongu bulu noroa ante i Petrus, i Yohanes, pade i Yakobus nalou nosambaya. 29 Ranca ni Yesus nosambaya, nobali-mo lence-Na pade powaruna nabula ngea nerangkila. 30 Pade ncamole-mole neonga-mo tou rodua nololita ante i Yesus, tou ee i Musa pade i Elia. 31 I Musa pade i Elia neonga ante pewanta lako ri suruga pade nololita ante i Yesus, nancambelai beiwa pampeganai ni Yesus liwo nu Allatala ri dala ngkamate-Na ri Yerusalem.
32 Tempo ee i Petrus ante rodua ana guru ntanina naleta naluru. Nematara-pa, nikalio-ra i Yesus newanta ante pewanta lako ri suruga pade rodua nabi ee nokongkore najungku siYa. 33 Nipaleisi-pa ni Musa ante i Elia i Yesus, nanguli-mo i Petrus siYa: “Guru, nasana mpuu-ta isei. Kapatinda-mo wea tolu ongu bambaru isei, saongu siKo, saongu si Musa pade saongu mbii si Elia.” I Petrus nanguli ewa ee, apaa tado-mo nincani-na banuapa nauli.
34 Ranca ni Petrus nololita-dapa, nasompo-mo gawu nampakaulu-ra. Pade naeka-ramo, apaa nitalibungkuni nu gawu ee. 35 Naopu ee, nironge-mo wotu lako ri rara gawu ee, nanguli: “Ei-mo Ana-Ku to nipelisi-Ku. Mironge belo-Ya!”
36 Nalinopa wotu ee, nikalio-ra kawule sadua ni Yesus-damo isee. Naopu kajadia ee, nasae olona ana guru totolu ee tado nopatuntu ba siyema-yema nuapa to najadi to nikalio-ra ee.
I Yesus nowura wao tuwu lako ri sadua ngana to nadua
9:37-43a
37 Kaneilena bula ni Yesus pade ana guru-Na totolu ee nesompo lako ri bulu, ntumulu-ntumulumo tou dea nampotomuka i Yesus. 38 Naria sadua baleilo lako ri tongo-tongo tou dea ee nongare, pade nanguli: “Guru, tulungi ana-ku! Apaa kawule sadua ngkola-na ana-ku! 39 Naoso-yamo nipesua nu wao tuwu, nangkajadika samata nongare-yadamo, koro-na nokasiridi pade nganga-na nowura ncumita. Wao tuwu ee tado nadota nampawia-ya pade samata nampakadua-ya. 40 Niperapi-kumo ri ana-ana guru-Mu bona mowura wao tuwu ee, agiana tado namala-ra nowura-ya.”
41 Nesono i Yesus: “Nangepe gaga-moko komi ei, napusa mpuu pampekiri-mi pade tado namparisaya Allatala! Sangkiapa sae-Ku moroa ante ikomi pade mancabara si komi! Apa tadopa nasae-Ku noroa ante ikomi! Kenimo ana-mu etu tumei!”
42 Kajungku nu ana ee si Yesus, nidungka-yamo nu wao tuwu ee ri tana, pade nipopokasiridi-na. Agiana i Yesus noparenta wao tuwu ee mesuwu lako ri ana ee pade nabelo-mo ana ee, pade niweikaka nculimo ni Yesus ana ee ri tuama-na. 43a Sumawee tou isee namoleara, apaa nikalio-ramo kakuasa nu Allatala to nadupa mpuu.
Pepoparonge karongkanina nancambelai kapepaa ni Yesus
9:43b-45
43b Bula nu tou dea ee namoleara-dapa nangkalio sumawee nuanu nipowiaNa, nololita-mo i Yesus ri ana-ana guruNa: 44 “Ronge pakabelo-belo nuapa to Ku'ulikakaka komi: Yaku, Ana Manusia, kana rawei ri kuasa nu manusia.” 45 Agiana ana-ana guru-Na tado nanguncani nuapa batuana nuanu to niuli ni Yesus ee. Nuanu ee nipontoliro nu Allatala si sira, ee-mo sabana pade tado nincani-ra. Agiana naeka mbii-rada nampekutana si Yesus nuapa batua nu lolita-Na ee.
Yemapa nabete riolo nu ana-ana guru
9:46-48
46 Sauatu eo nombebili-mo ana-ana guru ni Yesus, nampobebilii yema ntoto-da to nabete riolo-ra. 47 Agiana nincani-da ni Yesus rara-ra. Pade niala-mo ni Yesus sadua ngana kodi, nipopokongkore-Na ri siawe-Na. 48 Pade niuli-Namo ri ana-ana guru-Na: “Ande ikomi mantarima ngana kodi ewa ei ante patuju mampemabose-Ku, batuana nitarimami-Kumo. Pade ande nitarimami-Kumo batuana nitarima-mimo Allatala to nantudu-Ku namei ri dunia ei. Apaa yema to nakodi riolo-mi, ia kana majadi to bete.”
Sadua tou to tado ana guru ni Yesus nowura seta
9:49-50
49 Nanguli-mo i Yohanes ana guru ni Yesus: “Pue, nikalio-ka naria sadua tou nowura seta ri rara nu sanga-Mu, agiana nitagi-ka, apaa tado tou lako si kita-ya.” 50 Nanguli i Yesus si Yohanes: “Nemo mitagi-ya, apaa yema to tado mampobali-ta, batuana ia tou namposambira-ta.”
I Yesus pade to Samaria
9:51-56
51 Najungku-pa tempona i Yesus mateongko ri suruga, nibotusi-Namo kana malou-Yada ri Yerusalem. 52 Pade nitudu-Namo tou mampokoului-Ya. Naloumo tou-tou to nitudu-Na ee, pade nesua ri saongu ngata ri Samaria bona mampasadia-ka i Yesus ngila ngaya-na. 53 Agiana tou-tou ri ngata ee tado nadota mantarima i Yesus, sabana malou ri ngata Yerusalem-Yada.b 54 Pangkalio ni Yakobus bo i Yohanes nuanu ee, nanguli-ramo: “Pue, ande madota-Ko, ka-tudu apu mesompo lako ri langi bona mampakaropu-ra?”
55 Nipeili-ramo ni Yesus pade niposodo-Na. 56 Naopu ee nipapola-mo ni Yesus ante ana-ana guru-Na polumako-ra nalou ri ngata ntanina.
Tou to masipato mantutu i Yesus
9:57:62
57 Sauatu eo bula-ra nolumako, naria sadua nanguli si Yesus: “Guru, kana ku-tutu Ko riumba-umba kaloua-Mu.” 58 Nanguli i Yesus: “Serigala naria peariana, pade tonci naria pouruana, agiana Yaku, Ana Manusia tado naria pearia-Ku.”
59 Pade nanguli mbii-Yamo ri tou ntanina: “Tutu-Kumo!”
Agiana nesono tou ee: “Guru, paliu ku'ulu manculi. Ande mamate-damo tuama-ku pade rapatana, maopu ee-da pade ku-tutu Ko.”
60 Pade nanguli-mo i Yesus ri tou ee: “Palambaka-mo tomate motana tomate. Agiana iko, koumo-ko pade popowole oa riumba-umba-ko malou, bakote mopamulamo Allatala moparenta.”
61 Naria mbii to saduana nanguli: “Guru, yaku madota mantutu-Ko, agiana paliuku'ulu malou mopalakana ri sarara-ku.”
62 Agiana niulikaka-ya ni Yesus: “Tou to nopamula-mo nopajeko ri bonde, agiana neili ntubengoya-dapa, tado masipato-ya majadi todea nu Allatala.”