I Yesus nantudu pitu mpulu topantutu-Ya ntanina
10:1-12
10
1 Naopu ee nipelisi-mo ni Yesus pitu mpulu topantutu-Ya ntanina, pade nitudu-Na rodua-rodua mampokouluka-Ya malou ri butu ngata pade pearia to Na-kalouii. 2 Nanguli i Yesus si sira ante porapaika ewa ei: “Nadea tou to nantarima Kareba Belo ewa pae natasa-mo kana rapepae. Agiana to mampepae-ya saodi ngkola. Ee-mo sabana, perapi-mo Allatala, tumpu lida bona Na-tudu tou-tou malou mampepae.3 Koumo komi! Pade peirara! Yaku nantudu komi ewa bimba ri tongo-tongo nu serigala. 4 Nemo mangkeni karepe, tasi, ba sandala mpuu-mo. Pade nemo meuntu komi ri tongo dala mampololitaka tou-tou to mi-potomu. 5 Ande mesua komi ri saongu sou, ulimo ncala: Tabe, ikomi sancou ei kana natiroi nu Allatala.’ 6 Pade ande ri rara nu sou ee maria sadua to mampodota kasanaa lako si Pue, ia kana mantarima komi pade ia ante sarara-na sancou ee kana natiroi ni Pue, mantutu lolita-mi ee. Agiana ande ri sou ee tado maria tou mampodota kasanaa lako si Pue, lolita petiroi-mi ee tado madupa si sira. 7 Peari-mo komi ri sou ntou ee ngkola. Nemo moencu-moencu komi. Kondi pade inu-mo nuapa-pa to rajujuka-ra komi. Apaa sumawee topobago masipato mantarima tombo-na.
8 Ande mesua komi ri saongu ngata pade tou-tou isee mantarima komi, kondi-mo nuapa-pa to rajujuka-ra komi 9 Pakabelo-mo tou-tou nadua ri ngata ee, pade popowole-mo ri todea-na: Nopamulamo Allatala moparenta majadi Mbagou ri tongo-tongo-mi. 10 Agiana ande mesua komi ri saongu ngata pade tou-tou ri ngata ee tado mantarima komi, kou-mo komi ri dala-dala bete ri ngata ee pade popangara-mo: 11 Rambu ntana ri ngata ei to nerika ri paa-ka, katampeasi, majadi pepopatora si komi! Agiana bona mi-ncani najungkumo tempona Allatala mopamula moparenta majadi Mbagou ri tongo-tongo-mi. 12 Ku'ulikaka komi, ri eo kaopua nu dunia, suku rapanawu ri todea nu ngata ee kana meliu kantomo-na lako ri suku to nipanawu ri todea nu ngata Sodom.”
I Yesus nampokaranalaka basangkia ngata
10:13-16
13 “Maweso-mo komi, tou-tou ri Khorazim pade tou-tou ri Betsaida! Rapana kadupaa-kadupaa to nipowia-Ku ri tongo-tongo-mi ee nipowiamo ri ngata Tirus pade Sidon, tantu tou-tou radou masae-ramo mancoro lako ri jeko-jeko-ra, pade mopasua powaru pantora tomate pade mamboli rambu ntana ri woo-ra. 14 Ri eo kaopua nu dunia, todea ri ngata Tirus pade Sidon mamparata suku to neliu mpuu kalingaa-na lako ri suku to raweikaka komi. 15 Pade ikomi mbii, todea nu ngata Kapernaum! Nipekiri-mi, ikomi kana naongko nu Allatala duuna marata ri suruga? Tado! Pegolia-na Allatala kana motadi komi ri rara naraka!”
16 Pade nangulimo i Yesus ri topantutu-Ya: “Yema mamparonge komi, ia mbii namparonge-Ku, pade yema nampoara komi, ia mbii nampoara-Ku, pade yema nampoara-Ku, ia mbii nampoara Allatala to nantudu-Ku.”
Panculia nu pitu mpulu topantutu i Yesus
10:17-20
17 Tadomo nasae naopu ee pitu mpulu topantutu-Ya ee nanculi-ramo si Yesus. Ante donu rara-ra nanguli: “Pue, ri rara nu sanga-Mu seta-seta mbii natundu si kami.”
18 Nesono i Yesus: “Nikalio-Ku Mbagou nu Seta nanawu lako ri langi ewa kila. 19 Kakono-konona! Niweikaka-Kumo komi kuasa, bona mamala molisa ule pade topesupi, pade kuasa bona mamala mampadagi sumawee kakuasaa nu bali-mi, mangkajadika tado maria ba nuapa-pa to mamala mampakaweso komi. 20 Noudamo iwee, nemo ulu madonu komi sabana wao-wao tuwu natundu ri parenta-mi. Agiana kadonu-mo komi apaa sanga-mi nitulisi-mo ri suruga.”
Posukuru pade kasanaa
10:21-24
21 Bulawee ee mbii, Inosa Gasa nambeikaka i Yesus kasanaa to neliu mpuu, pade nanguli-Yamo: “Yaku nangune-Ko, Tuama, Pue nu langi pade dunia! Apaa sumawee-na nipontoliro-Mumo ri tou napande pade ri tou-tou to nanguncani sumawee-na. Agiana Iko nopanotosi sumawee nuanu ee ri tou to tado nanguncani nuapa-pa. Iyo, Tuama ee-mo to nipodota-Mu.
22 Ngila-ngayana niweimo nu Tuama-Ku si Yaku. Tado-namo saduaa tou nanguncani-Ku, Ana-Na, sangadina Tuama-Ku. Pade tado-namo saduaa mbii tou nanguncani Tuama-Ku, sangadina Yaku, Ana-Na. Pade tou-tou to Ku-popanguncanika Ya.”
23 Naopu ee neili-mo i Yesus pade nololita ri ana-ana guru ngkola-Nadamo: “Butu dua komi ei nitiroi mpuu nu Allatala, apaa niweikakamo komi loga nangkalio mata nuapa to najadi tempo ei. 24 Ku'ulikaka komi: Nadea nabi pade mbagou madota mangkalio nuanu to nikalio-mi tempo ei, agiana tado namala nikalio-ra. Isira madota mamparonge nuanu to nironge-mi tempo ei, agiana tado namala nironge-ra.”
To Samaria to nadoli rara
10:25-37
25 Sauatu eo nokongkore-mo sadua topande ri Buku Taurat madota mampesori i Yesus, niuli-na: “Guru, nuapa to mamala ku-powia bona mamparata tuwu liu-liu?”
26 Nesono i Yesus: “Nuapa to nitulisi ri rara nu parenta Taurat? Nuapa sono nikalio-mu isee?”
27 Nesono tou ee: “Potowe-mo Pue Allatala-mu ante rara mpuu-mu, ante sumawee tuwu-mu, ante sumawee pekiri-mu, pade ante sumawee karosoa-mu, pade potowe-mo singkapada manusia-mu ewa pampotowe-mu koro-mu.”
28 Nanguli i Yesus: “Nakonomo sono-mu etu. Powiamo ee, bona iko kana mamparata tuwu liu-liu.”
29 Agiana apaa tou ee madota mampakakono koro-na, niuli-namo si Yesus: “Yema singkapada manusia-ku ee?”
30 Nesono i Yesus: “Naria sadua baleilo nesompo lako ri ngata Yerusalem nalou ri ngata Yerikho. Ri polumakoa-na nilawa-yamo nu basangkia dua tou daa pade norampaki sumawee to naria siya ante powaru to nipake-na. Ninampa-ramo tou ee duuna kemamate. Naopu ee nipawia-ramo tou ee saduduana-damo isee.
31 Naria-mo sadua tobalia to Yahudi noliu ri dala ee. Pangkalio-na tou ee, neleli-yamo nolumako mbiira ri sambote nu dala. 32 Iwee mbii ante sadua to Lewi. Ia mbii noliu isee pade nangkalio tou ee, neleli-yamo nolumako mbiira ri sambote nu dala.
33 Naopu ee naria sadua to Samaria ranca-na noliu ri dala ee. Pangkalio-na tou ee, natowe-mo rara-na. 34 Nijungkuki-namo tou ee pade nipakarawa-namo baka nu tou ee, nidundesina ante ue anggur, pade niela-na ante lana zaitun nipopopakulisi-na baka ntou ee, pade niwewe-na. Naopu ee nipasawi-namo tou ee ri keledai-na pade nikeni-na ri sou pearia riolo-na isee, pade isee-yamo nipakulisi. 35 Kaneilena-pa niwei-mo to Samaria ee rompeka doi pera ri tumpu sou pearia ee. Niuli-na: Mupakulisi-yamo. Ande makura-dapa pobayari, manculiku-damo pade kupeganai pobayari-na.”
36 Nipakaopu-mo ni Yesus jarita ee ante pepekutana: “Ande pamparata-mu, riolo-ra totolu ee yema singkapada manusia nu tou nirampaki ee?”
37 Nanguli topande ri Buku Taurat ee: “Tou to nampotowe-ya pade nantulungi-ya.”
Nanguli i Yesus siya: “Koumo-ko pade powia-mo ewa ee mbii.”
I Maria pade i Marta
10:38-42
38 Nipapola-pa ni Yesus ante ana-ana guru-Na polumako-ra, narata-ramo ri saongu ngata. Sadua bangkele ri ngata ee, to nisanga i Marta, nantarima-Ya ri sou-na. 39 Sarara bangkele ni Marta to nisanga i Maria, noncunda najungku ri paa ni Yesus pade namparonge oa pepatuduki-Na. 40 Agiana i Marta nasesewa oa apaa nadea nuanu nipobago-na. Ee-mo sabana, namei-yamo si Yesus pade nanguli: “Pue, nuapa pade nipalambaka-Mumo i Maria tado nadota nampangawa-ku? Tudu-ya mampangawa-ku.”