I Yohanes Topebaptis
3:1-12
3
1 Basangkia mpae naliu naopu ee, narata mo i Yohanes Topebaptis ri tongo mpada bei ri Yudea pade nopangara: 2 “Pancoromo komi lako jeko-jeko-mi, apaa tado-mo masae Allatala marata moparenta ewa mbagou.” 3 I Yohanes ei-mo to nitulisi ni Nabi Yesaya ri rara nu awili-na ewa ei:“Naria wotu nopangara ri tongompada bei nanguli:
Pakasadiamo dala ni Pue,
pakanoro dala Na-polumakoi.”
4 I Yohanes nampake powaru lako ri wulu nu unta, pampou peko-na lako ri kuli nu binata, pade kondiana bati bo manisa nu oani wana. 5 Nadea tou lako ri Yerusalem, lako ri sumawee ngamba Yudea pade ngata-ngata to najungku ri ue Yordan namei si Yohanes. 6 Isira nampangaku jeko-jeko-ra, pade nibaptis-ramo ni Yohanes ri ue Yordan.
7 Nadea mbii to Farisi pade to Saduki namei si Yohanes bona rabaptis. Agiana pangkalio-ra ni Yohanes narata, nanguli-yamo si sira: “Ikomi tou to nadaa! Yema to nanguli bakote ikomi mamala mabebasi lako ri suku nu Allatala to kana marata ngoni? 8 Popakaliomo ante parabuata-mi bakote ikomi nancoromo lako ri jeko-jeko-mi. 9 Nemo mi-uli apaa ikomi muli ni Abraham, suku nu Allatala ee tado mambela si komi. Ku'ulikaka komi, lako ri watu-watu ei mbii, mamala napajadi nu Allatala muli ni Abraham! 10 Pesuku nu Allatala nasimbei ewa baliu, to nasadiamo rapopotowo kou duuna marata ri larina. Butu mpu kou to tado nowua nabelo kana ratowo pade ratadiaka ri rara nu apu. 11 Yaku nobaptis komi ante ue bona majadi pampetonondi bakote nancoromo komi lako ri jeko-jeko-mi. Agiana Ia to marata mopuri ngoni, mobaptis komi ante Inosa Gasa bo apu. Neliupa kabete nu kuasa-Na lako si yaku. Mobolesi pampou sapatu-Na tado masipato-ku. 12 Ri pale-Na naria tapi rapake motapisi gando-Na duuna marawa. Gando kana Na-tobu ri rara liko, agiana sumawee kulina kana Na-tunu ri rara nu apu to tado naria kamateana.”
I Yesus nibaptis ni Yohanes
3:13-17
13 Tempo ee naratamo i Yesus lako ri Galilea namei ri ue Yordan. Narata isee nalou Ya-mo si Yohanes pade nerapi bona rabaptis. 14 Agiana tado nadota i Yohanes nobaptis i Yesus. Nanguli i Yohanes: “Kakono-konona yaku eida to mampopebaptis si-Ko. Nuapa pade Iko-da namei si yaku” 15 Agiana nangulimo i Yesus: “Baptis-Kumo, apaa nuanu eimo to mampakadupa sumawee to nipodota nu Allatala” 16 Naopu i Yesus nibaptis pade neumba-Yapa lako ri rara nu ue, bulawee ee mbii nategeamo langi pade nikaliomo ni Yesus Inosa Gasa nesompo ewa tonci banggebodo neuntu si-Ya. 17 Naopu ee nirongemo wotu nu Allatala lako ri langi nanguli: “Eimo Ana towea-Ku. Ia-mo to nampakawoe rara-Ku.”