I Yesus nipesori
4:1-11
4
1 Naopu ee i Yesus nikeni nu Inosa Gasa nalou ri tongo mpada bei bona napesori nu Mbagou Seta. 2 Rarana aopo mpulu eo bo aopo mpulu mbengi i Yesus tado nangkondi. Kaopuana naoromo-Yamo. 3 Naratamo Mbagou Seta si Yesus pade nanguli: “Ande Ana nu Allatala-Ko, tudumo watu-watu ei majadi roti.” 4 Nesono i Yesus: “Ri rara nu Buku Nagasa naria nitulisi: Manusia tado matuwu kawule lako ri kondia ngkola, agiana lako ri butu mpama lolita to niuli nu Allatala.” 5 Naopu ee nikenimo nu Mbagou Seta ee i Yesus nalou ri Yerusalem, ngata to nagasa, pade nitudu-na mokongkore ri wumbu Sou nu Allatala. 6 Pade nangulimo Mbagou Seta ee si Yesus: “Ande Ana nu Allatala-Ko, pengkanawu-Ko lako isei, apaa naria nitulisi ri rara nu Buku Nagasa ewa ei: ‘Allatala kana mantudu malaeka-malaeka-Na mantalendusi-Ko, isira kana mosombo-Ko ante pale-ra, bona tado mabela watu paa-Mu. ’ ” 7 Nesono i Yesus: “Naria mbii nitulisi ri rara Buku Nagasa, Nemo-mu pesori Allatala-mu.” 8 Naopu ee nikeni mbiimo nu Mbagou Seta ee i Yesus ri wumbu bulu to nalangko mpuu pade nampopakalioka i Yesus sumawee kambagouaa ri dunia ante sumawee kasugiana. 9 Pade nangulimo Mbagou Seta ee si Yesus: “Sumaweena ei kuweikaka-Ko, ande madota-Ko menomba si yaku.” 10 Agiana nesono i Yesus: “Pangani-ko, Mbagou Seta! Ri rara Buku Nagasa nitulisi: Penombaimo Pue, Allatala-mu. Kawule Ia ngkola to masipato mu-penombai!” 11 Naopu ee nanganimo Mbagou Seta ee lako si Yesus, pade naratamo malaeka-malaeka ni Pue nampalayani-Ya.
I Yesus neonga ri Galilea
4:2-17
12 Nironge-pa kareba bakote nipasua ri tarungkumo i Yohanes, noencumo i Yesus ri Galilea. 13 Nipaleisi-Namo ngata Nazaret, pade neari ri ngata Kapernaum ri soso nu rano Galilea ri tana nu muli ni Zebulon pade i Naftali. 14 Apaa i Yesus nowia ewa ee, nadupamo nuanu to niuli ni Nabi Yesaya:
15 “Tou to neari ri tana nu muli ni Zebulon pade i Naftali, dala malou ri rano, ri sambote nu ue Yordan, tana Galilea tana nu tou tado to Yahudi!
16 Tou-tou ee natuwu ri rara nu kadedia, agiana nikalio-ramo kabaasa to newanta! Tou-tou ee mbii neari ri dunia tomate, agiana niwanta-ramo nu kabaasana!”
17 Lako ri tempo ee nopamulamo i Yesus noparata ri tou-tou ewa ei: “Pancoromo komi lako jeko-jeko-mi, apaa tadomo masae marata tempona Allatala moparenta majadi Mbagou!”
I Yesus nampokio ana-ana guru-Na to paramulana
4:18-22
18 Ranca ni Yesus nolumako ri soso nu talinti rano Galilea, nikalio-Namo rodua toposoko bou, isira ee i Simon to nisanga mbii i Petrus, pade i Andreas sarara-na. Tempo ee bula-ra nosoko bou ri rano ee, apaa ee-mo bago-ra. 19 Nangulimo i Yesus si sira: “Tumeimo komi, tutu-Kumo, ikomi ngoni kana Kupatuduki mangonco tou ntanina bona majadi topantutu-Ku.” 20 Namparonge ee, bulawee ee mbii nipawia-ramo jala-ra pade nitutu-ramo i Yesus. 21 Naopu ee nipapolamo ni Yesus nolumako, nikalio mbii-Namo rodua toposarara, i Yakobus pade i Yohanes ana ni Zebedeus. Isira ee bula-ra nampowiaki jala-ra ri rara duanga noroa ante tuama-ra. Nipokio mbii-ra ni Yesus. 22 Namparonge pepokio ee, bulawee ee mbii nipawia-ramo duanga-ra bo tuama-ra, pade nitutu-ramo i Yesus.
I Yesus nepatuduki pade nadea tou nipakabelo-Na
4:23-25
23 Ri Galilea, nalou-mo i Yesus nampebutu sumawee ngata ri ngamba ee pade nepatuduki ri sou-sou penombaa to Yahudi bo noparata Kareba Belo to nampololita Poparentaa nu Allatala. Ia mbii nampakabelo tou-tou to nadua pade to tado nasingkama katuwu-ra. 24 Kareba nancambelai i Yesus ee nowole ri sumawee ngamba Siria, nangkajadika nadea tou namei si Yesus. I sira nangkeni sumawee tou to nantodosaka ngila ngaya nu dua bo kasusaa-ra, to nipesua nu wao tuwu, to nadua lintua, pade to napungku. Sumawee-ra nipakabelo pura ni Yesus. 25 Nadea mpuu tou nantutu i Yesus tempo ee. Naria to narata lako ri Galilea, lako ri Dekapolis, lako ri Yerusalem pade lako ri Yudea pade to lako ri sambote nu ue Yordan.