Lukas 3

I Yohanes Topebaptis

1 Ri mpae kasampulu alimana lako ri poparentaa nu Mbagou Bete Tiberius, i Pontius Pilatus noparenta ri ngamba Yudea, pade i Herodes noparenta ri ngamba Galilea. I Filipus sarara ni Herodes noparenta ri ngamba Iturea pade ngamba Trakonitis pade i Lisania noparenta ri ngamba Abilene. 2 Tempo ni Hanas bo i Kayafas newali tobalia-tobalia bete nololitamo Allatala si Yohanes, ana ni Zakharia ri tongo mpada bei. 3 Pade naloumo i Yohanes ri sumawee ngamba nu ue Yordan pade noparata Kareba Belo lako ri Allatala. Nongaremo i Yohanes: “Mancoro-mo komi lako ri jeko-jeko pade kana rabaptis-da komi bona Allatala moampungi jeko-mi.” 4 Ewa to nitulisi ri rara buku ni Nabi Yesaya:

“Naria tou nopangara ri tongo mpada bei:

‘Pasadia dala ni Pue pade rapakarano dala-Na.

5 Butu lobuna kana raiwu,

butu pobuluana kana rapakarano.

Dala mpaleko-leko kana rapakanoro, pade dala mpalobu-lobu kana rapakarano.

6 Sumawee tou-tou ri dunia kana mangkalio, Allatala mampakasalama manusia.’ ”

7 Nadea tou narata si Yohanes bona rabaptis. Nanguli i Yohanes si sira: “Ikomi tou nadaa ewa ule! Yema nanguli ikomi mamala mabebasi lako ri suku nu Allatala to marata ri eo ngkapurina? 8 Popakaliomo ante inggu-mi ande ikomi nancoromo nowia jeko-mi! Nemo miuli i Abraham tumpu-mi. Ku'ulikaka komi: ‘Lako ri watu-watu ei mbii Allatala mamala mowia muli ni Abraham.’ 9 Baliu nasadiamo rapopotowo kou duu-na ri lari-larina. Butu nu kou to tado nowua nabelo kana ratowo pade ratadi ri rara nu apu.”

10 Tou-tou nampekutana i Yohanes: “Nuapa-da to kana ka-powia?” 11 Nesono i Yohanes: “Tou to norontonga powaru-na, santonga kana na-wei ri tou to tado nowaru, pade tou to naria kondia-ra, kana nabagi-bagi.” 12 Pade narata mbii-mo topedusu-topedusu balasitee si Yohanes nerapi rabaptis. Tou-tou ee nepekutana: “Guru nuapa ntoto-da mamala ka-powia?” 13 Nesono i Yohanes: “Nemo medusu melabi kadeana lako ri nuanu to nipakatatapu.” 14 Naria mbii surodado-surodado nepekutana: “Beiwa-kamo kami ei? Nuapa ntoto-da mamala ka-powia?”

Nesono i Yohanes: “Nemo mampakagali tou pade nemo morampaki doi pade mamparei tou ante nuana to tado nakono. Paosamo rara-mu ante tombo-mu.”

15 Ri tempo ee nombepekutanamo tou-tou ba i Yohanes ei-mo i Mbagou Topepakasalama to nipopea-ra.

16 Ee-mo sabana i Yohanes nangulikaka-ra: “Yaku mobaptis komi ante ue, agiana Ia ngoni marata mopuri nelabipa kakuasa-Na lako si yaku. Mobolesi popou sandala-Na tado masipato-ku. Ia ngoni mobaptis komi ante Inosa Gasa pade apu. 17 Ri pale-Na naria tapi bona motapisi sumawee gando-Na duu-na marawa. Gando ee kana Na-tobu ri rara nu liko. Agiana sumawee kuli nu gando kana Na-tunu ri rara nu apu to tado naria kamateana.”

18 Iwee-mo i Yohanes nopatuduki tou-tou ante ngila ngayana, tempo-na nampopowole Kareba Belo. 19 Agiana i Herodes, mbagou ri ngamba Galilea, niontika ni Yohanes nancambelai poncamboko-na ante i Herodias, bangkele nu sarara-na, pade nancambelai sumawee nuanu nadaa to nipowia-na. 20 Agiana i Herodes nantambeipa kadaa-na pade nopasua i Yohanes ri rara nu tarungku.

I Yesus, Ana nu Allatala, nibaptis

(Mat. 3:13-17; Mrk. 1:9-11; Yoh. 1:32-34)

21 Naopupa sumawee tou nibaptis ni Yohanes, nibaptis mbii-na i Yesus. Ranca ni Yesus nosambaya, nogaa-mo langi, 22 pade Inosa Gasa ewa tonci banggebodo nesompo pade nampesua-Ya. Pade nirongemo wotu nu Allatala nanguli: “Ikomo Ana towea-Ku. Ikomo to nampakawoe rara-Ku.”

To nampomulika i Yesus

(Mat. 1:1-17)

23 Tempo ni Yesus nopamula pobago-Na, umuru-Na tolu mpulu mpae. Lako ri pamparata nu tou, i Yesus ei ana ni Yusuf, ana ni Eli.

24 I Eli ana ni Matat, i Matat ana ni Lewi,

i Lewi ana ni Malkhi, i Malkhi ana ni Yanai,

i Yanai ana ni Yusuf, 25 i Yusuf ana ni Matica,

i Matica ana ni Amos, i Amos ana ni Nahum,

i Nahum ana ni Hesli, i Hesli ana ni Nagai,

26 i Nagai ana ni Maat, i Maat ana ni Matica,

i Matica ana ni Simei, i Simei ana ni Yosekh,

i Yosekh ana ni Yoda, 27 i Yoda ana ni Yohanan,

i Yohanan ana ni Resa, i Resa ana ni Zerubabel,

i Zerubabel ana ni Sealtiel, i Sealtiel ana ni Neri,

28 i Neri ana ni Malkhi, i Malkhi ana ni Adi,

i Adi ana ni Kosam, i Kosam ana ni Elmadam,

i Elmadam ana ni Er, 29 i Er ana ni Yesua,

i Yesua ana ni Eliazer, i Eliazer ana ni Yorim,

i Yorim ana ni Matat, i Matat ana ni Lewi,

30 i Lewi ana ni Simeon, i Simeon ana ni Yehuda,

i Yehuda ana ni Yusuf, i Yusuf ana ni Yonam,

i Yonam ana ni Elyakim, 31 i Elyakim ana ni Melea,

i Melea ana ni Mina, i Mina ana ni Matata,

i Matata ana ni Natan, i Natan ana ni Daud,

32 i Daud ana ni Isai, i Isai ana ni Obed,

i Obed ana ni Boas, i Boas ana ni Salmon,

i Salmon ana ni Nahason, 33 i Nahason ana ni Aminadab,

i Aminadab ana ni Admin, i Admin ana ni Arni,

i Arni ana ni Hezron, i Hezron ana ni Perez,

i Perez ana ni Yehuda, 34 i Yehuda ana ni Yakub,

i Yakub ana ni Ishak, i Ishak ana ni Abraham,

i Abraham ana ni Tera, i Tera ana ni Nahor,

35 i Nahor ana ni Serug, i Serug ana ni Rehu,

i Rehu ana ni Peleg, i Peleg ana ni Eber,

i Eber ana ni Salmon, 36 i Salmon ana ni Kenan,

i Kenan ana ni Arpakhsad, i Arpakhsad ana ni Sem,

i Sem ana ni Nuh, i Nuh Ana ni Lamekh,

37 i Lamekh ana ni Metusalah, i Metusalah ana ni Henokh,

i Henokh ana ni Yared, i Yared ana ni Mahalaleel,

i Mahalaleel ana ni Kenan, 38 i Kenan ana ni Enos,

i Enos ana ni Set, i Set ana ni Adam,

i Adam ana nu Allatala.