Kareba Belo to nitulisi
Ni Matius
Tutura to nampomulika i Yesus Kristus
1:1-17
1
1 Eimo tutura nancambelai i Yesus Kristus, muli ni Daud, muli ni Abraham. 2 I Abraham tuama ni i Isak, i Isak tuama ni Yakub, i Yakub tuama ni Yehuda pade sarara-sarara-na, 3 i Yehuda tuama ni Peres pade i Zerah, tina-ra i Tamar, i Peres tuama ni Hezron, i Hezron tuama ni Ram, 4 i Ram tuama ni Aminadab, i Aminadab tuama ni Nahason, i Nahason tuama ni Salmon, 5 i Salmon tuama ni Boas, tina-na i Rahab, i Boas tuama ni Obed, tina-na i Rut, i Obed tuama ni Isai, 6 i Isai tuama ni mbagou Daud. I Daud tuama ni Salomo, tina-na balu ni Uria, 7 i Salomo tuama ni Rehabeam, i Rehabeam tuama ni Abia, i Abia tuama ni Asa, 8 i Asa tuama ni Yosafat, i Yosafat tuama ni Yoram, i Yoram tuama ni Uzia, 9 i Uzia tuama ni Yotam, i Yotam tuama ni Ahas, i Ahas tuama ni Hizkia, 10 i Hizkia tuama ni Manasye, i Manasye tuama ni Amon, i Amon tuama ni Yosia, 11 i Yosia tuama ni Yekhonya pade sarara-sarana-na tempo potawani-ra ri Babel. 12 I Yekhonya tuama ni Sealtiel, i Sealtiel tuama ni Zerubabel, 13 i Zerubabel tuama ni Abihud, i Abihud tuama ni Elyakim, i Elyakim tuama ni Azor, 14 i Azor tuama ni Zadok, i Zadok tuama ni Akhim, i Akhim tuama ni Eliud, 15 i Eliud tuama ni Eleazar, i Eleazar tuama ni Matan, i Matan tuama ni Yakub, 16 i Yakub tuama ni Yusuf baleilo ni Maria to nampoanaka i Yesus, to niuli mbii Kristus.17 Jadi lako si Abraham duuna si mbagou Daud sampulu aopo lapi mulia. Lako si Daud duuna ri tempo to Yahudi nitawani ri Babel sampulu aopo lapi. Lako ri tempo to Israel nitawani ri Babel duuna ri pampoanaka i Yesus Kristus sampulu aopo lapi mbii mulia.
Pampoanaka i Yesus Kristus
1:18-25
18 Eimo jarita nancambelai pampoanaka i Yesus Kristus: Tempo ee i Maria to majadi tina ni Yesus ngoni, nombepokono ante i Yusuf. Agiana tadopa noncamboko-ra, notianamo i Maria. Potiana-na ee lako ri kuasa nu Inosa Gasa. 19 I Yusuf simpokono-na ee, sadua to nabelo rara-na. Ee-mo sabana i Yusuf madota mobole pombepokono-ra ee bongo-bongo. Agiana tado nadota-ya mopakaeya i Maria ri ngayo nu tou dea. 20 Bula ni Yusuf nampekiri patuju-na ee, naratamo malaeka ni Pue ri rara nu pangipi-na pade nangulikaka-ya: “Yusuf, muli ni Daud, nemo maeka-ko mampobangkele i Maria. Apaa ana nipotianaka-na etu najadi lako ri kuasa nu Inosa Gasa. 21 Ia kana mampoanaka sadua ana baleilo. Ana ee ngoni kana mu-sanga i Yesus, apa Ia-mo ngoni to mampakasalama todea-Na lako ri jeko-ra.”
22 Sumawee ee najadi bona madupa lolita ni Pue to niparata nu nabi ngkoulu: 23 “Sadua torandaa kana motiana pade mampoanaka sadua ana baleilo. Ana ee rasanga i Imanuel.” Batuana “Allatala mamporoasi-ta.”