Topande nangkalio betue lako ri mataeo
2:1-12
2
1 I Yesus nipoanaka ri ngata Betlehem ri tana Yudea ri tempo poparentaa nu mbagou Herodes. Naopu pampoanaka i Yesus, naratamo topande nangkalio betue lako ri mataeo ri Yerusalem. 2 Nepekutana-ramo: “Riumbamo Ana to nipoanaka bona majadi mbagou nu to Yahudi ee? Nikalio-ka betue-Na nembere ri mataeo, ee-mo sabana pade namei-kamo ei bona mampenombai-Ya.” 3 Agiana nirongepa ni mbagou Herodes, nabatoro-yamo, iwee mbii sumawee tou ri Yerusalem. 4 Pade nitudu-namo sumawee tobalia-tobalia ri matana pade topande-topande ri Buku Taurat namei notobu, pade nampekutana-ra: “Riumba ngata pangotea Ana to majadi Mbagou Topepakasalama ee?” 5 Pade nesono-ramo: “Ri ngata Betlehem ri tana Yudea, apaa naria nitulisi nu nabi ngkoulu ewa ei: 6 Iko Betlehem, ri tana Yehuda, noudamo nakodiko, ikomo ngata to neliu kabetena lako ri ngata-ngata ri tana Yehuda. Apaa lako siko ngoni kana meumba sadua Topangkeni to moewu todea-Ku to Israel.” 7 Pamparonge ni Herodes lolita ee, nipokio bongo-bongo-namo topande nangkalio betue lako ri mataeo ee pade nampekutana-ra ipia tempo pembere nu betue to nikalio-ra ee. 8 Naopu ee nitudu-na ra-mo malou ri Betlehem ante netetesi: “Koumo komi ri Betlehem, onco mpuu-mpuu Ana ee. Pade ande mirata-Yapa, ulikaka-ku, bona yaku mbii malou mampenombai-Ya.”9 Naopu-rapa namparonge lolita nu mbagou ee neongko-ramo. Pade nikalio mbii-ramo betue ee nampokouluka-ra pade neuntu ri toto nu sou pearia nu Ana ee. 10 Pangkalio-ra betue ee, nadonu-ramo. 11 Pade nesua-ramo ri rara nu sou ee. Nikalio-ra Ana ee noroa ante tina-Na i Maria, pade nenomba-ramo si-Ya. Nibolesi-ramo pambolia gagu-ra ee pade niwei-ramo penomba-ra si-Ya. Penomba ee bulawa, dupa pade mur. 12 Naopu ee nipopatora-ramo nu Allatala ri rara nu pangipi-ra, bona nemo manculi-ra si Herodes, jadi nantutu dala ntani-ra damo nanculi ri ngata-ra.
Noencu ri Mesir
2:13-15
13 Nanculi-pa topande nangkalio betue ee, naratamo malaeka ni Pue si Yusuf ri rara pangipi-na pade nanguli: “Pematamo-ko Yusuf, kenimo Ana etu ante tina-Na bulawee ee malou ri tana Mesir, apaa i mbagou Herodes kana mangonco Ana etu bona napatesi. Katidamo komi ulu ri tana Mesir duuna marataki lolita-Ku si-ko.” 14 Nematamo i Yusuf, pade kawengina ee mbii nikeni-namo Ana ee ante tina-Na nalou ri tana Mesir. 15 Neari ramo isee duuna namate i mbagou Herodes. Nuanu ee najadi bona madupa lolita ni Pue to niparata nu nabi ngkoulu ewa ei: “Lako ri Mesir Kupokio Ana-Ku.”
Ngana-ngana ri Betlehem nipatesi
2:16-18
16 Nincani-pa ni Herodes bakote topande nangkalio betue lako ri mataeo ee nobagiu-ya, nasodo mpuu-yamo. Pade nipetudui-namo bona mopatesi sumawee ngana baleilo to lako niote duuna to noumuru rompae ri ngata Betlehem bo ri ngata-ngata ntani riolona ee. Umuru nu ngana-ngana to nipatesi ee nantutu lolita nu topande nangkalio betue lako ri mataeo ee. 17 Kajadia ee nopadupa lolita ni Pue to niparata ni nabi Yeremia ngkoulu ewa ei:
18 “Ri Rama nironge wotu nokeo bo notumangi.
I Rahel nampokeosi ana-ana-na.
Tado nadota-ya nipakawoeka rara-na, apaa ana-ana-na tadomo naria.”
Nanculi lako ri Mesir
2:19-23
19 Namatepa i Herodes, bula ni Yusuf ri Mesir-dapa narata mbiimo malaeka ni Pue si Yusuf ri rara pangipi-na. 20 Nanguli malaeka ee: “Pematamo-ko, kenimo Ana ante tina-Na etu manculi ri tana Israel, apaa tou-tou to madota mopatesi Ana etu namatemo.” 21 Jadi nematamo i Yusuf, pade nikeni-namo Ana ee ante i Maria nanculi ri tana Israel. 22 Agiana nirongepa ni Yusuf bakote i Arkhelaus, ana ni Herodes nosambei tuama-na najadi mbagou ri Yudea, naekamo i Yusuf nalou isee. Nololita mbiimo i Pue si Yusuf ri rara pangipi-na, nangkajadika nalou-yamo ri ngamba Galilea. 23 Pade neari-ramo ri ngata Nazaret. Nuanu ee najadi bona madupa lolita nu nabi-nabi nancambelai Ana ee: “Ia kana rakasangai to Nazaret.”