Pangotea i Yesus
2:1-7
2
1 Tempo eea Mbagou Bete i Agustus noparentai sumawee todea ri Kambagoua Roma mopasua sanga-ra bona rareke kadea-ra. 2 Eimo paramulana popabila todea to nipowia bula ni Kirenius newali gubernur ri propinsi Siria. 3 Pade sumawee tou tempo ee nanculi ri ngata-ra mopasua sanga bona ratulisi.4 Pade neongko-mo i Yusuf lako ri ngata Nazaret ngamba Galilea, nalou ri ngata Betlehem ngamba Yudea, pangotea Mbagou Daud, sabana i Yusuf to nipomulika ni Daud. 5 I Yusuf nalou ri Betlehem ante simpokono-na i Maria. Tempo ee i Maria bula-na notiana.
6 Karata-ra ri Betlehem narata-mo tempona i Maria moana. 7 Nipoanaka-namo sadua ana baleilo, ana-na ulumbua, pade nibungu-na ante bua pade nidule-na ri pangkondia nu bimba, apaa tado naria nirata-ra sou pearia to nakaloa.
Topoewu-topoewu
2:8-20
8 Kawengina ee, naria topoewu-topoewu to natida ri tongo mpada bula-ra nojaga bimba. 9 Ncamole-mole neongamo malaeka ni Pue nokongkore ri ngayo-ra pade pewanta lako si Pue nabaa nampaindo-ra, nangkajadika naeka mpuu-ramo. 10 Agiana nanguli malaeka ee: “Nemo maeka komi! Sabana yaku ei narata nangkeni kareba belo si komi, kareba to mampakadonu mpuu sumawee tou. 11 Eo ei ri ngata Daud nipoanakamo tou to mampakasalama komi, Ia-mo i Pue, Mbagou Topepakasalama to nitipa nu Allatala. 12 Eimo pampetonondina: Ikomi kana mampotomuka sadua ana kodi nibungu ante bua, pade nidule ri rara pangkondia nu bimba.”
13 Ncamole-mole malaeka ee see niporoasi nu malaeka-malaeka ntanina, nangune Allatala. Niuli-ra:
14 “Raunemo Allatala to noncunda ri kalangkoana!
Pade ri wongko dunia, masanamo katuwu nu manusia to nampakadonu rara ni Pue!”
15 Nipaleisi-rapa nu malaeka-malaeka ee nanculi ri suruga, nombeulikakamo topoewu-topoewu ee: “Malou-tamo ri ngata Betlehem mangkalio kajadia to nadupa ee, ewa to niuli ni Pue si kita.”
16 Nagasi-gasi-ramo nalou, pade nampotomuka i Maria ante i Yusuf, pade ana kodi ee ranca-na nidule ri pangkondia nu bimba. 17 Pangkalio nu topoewu-topoewu ana kodi ee, nipatuntu-ramo pura sumawee nuanu to niulikaka-ra nu malaeka nancambelai Ana kodi ee. 18 Pade sumawee tou namoleara pura, namparonge nuanu to niuli nu topoewu-topoewu ee. 19 Agiana sumawee kajadia ee niboli ni Maria ri rara-na pade nipeirara mpuu-na. 20 Pade nanculi-mo topoewu-topoewu ee ri tongo mpada nangune pade nampemabose lako Allatala, apaa sumawee nuanu nironge pade nikalio-ra, nasimbei ante nuanu niulikaka-ra nu malaeka ee.
I Yesus nitindi pade niwei si Pue – I Simeon pade i Hana
2:21-
21 Naganapa uwalu eo lako ri eo pangotea-Ya nitindimo ana ee. Pade nisangara-Yamo i Yesus, sanga to niuli nu malaeka nu Allatala sintou tadopa nipotianaka-Ya nu tina-Na.
22 Naratamo tempona i Yusuf pade i Maria mowia ada mampakagasa koro mantutu parenta Taurat. Nikeni-ramo ana ee ri Yerusalem bona rawei si Pue. 23 Apaa naria nitulisi ri rara parenta ni Pue ewa ei: “Butu dua ana ulumbua baleilo, kana rawei si Pue.” 24 Pade isira mbii madota mowia penomba-ra ante rombaa tonci wuko ba rombaa tonci banggebodo, ewa to nipakatatapu ri rara parenta ni Pue.
25 Tempo ee ri Yerusalem naria sadua to nisanga i Simeon. Ia ei tou to nabelo, to naeka ri Allatala pade nopea tempona Allatala mampakasalama Israel. Inosa Gasa namporoasi-ya, 26 pade niulikaka-yamo nu Inosa Gasa Allatala, tadopa mamate-ya ande tadopa na-kalio Mbagou Topepakasalama to nitipa ni Pue. 27 I Simeon nikeni nu Inosa Gasa Allatala, nesua ri karawaa Sou nu Allatala. Tempo ee mbii i Yusuf pade i Maria nangkeni mpesua i Yesus, ana kodi ee bona mowia susa to nipeparentai nu parenta Taurat. 28 Naopu posusa ee nialamo ni Simeon ana ee nisulengku-na, pade nangune Allatala:
29 “Eo ei, Pue, nipadupa-Mumo potipa-Mu.
Palambaka-kumo batua-Mu ei mamate mantutu lolita-Mu.
30 Sabana nikalio-kumo Topepakasalama lako si-Ko.
31 Topepakasalama ee nipasadia-Mu bona mampakasalama sumawee tou ri dunia:
32 ewa pewanta to mampakabaa tou-tou tado to Yahudi to natuwu ri rara nu kadedia bona mamei si-Ko,
pade Ia kana mampakarata pampemabose ri todea-Mu to Israel.”
33 Tina tuama nu Ana ee namoleara namparonge nuanu to niuli ni Simeon nancambelai Ana-ra. 34 Naopu ee nitiroi-ramo ni Simeon pade nanguli si Maria, tina nu Ana ee: “Ana ei nipelisi-mo nu Allatala bona mampakaropu pade mampakasalama madea to Israel. Ia kana majadi pampetonondi lako ri Allatala, bona mampopatora manusia lako ri kasalaa-ra, agiana madea tou mampoara-Ya, 35 pade Ana ei kana mampakasongka nuapa to nipekiri nu tou-tou nancambelai Allatala ri rara-ra, pade iko Maria kana marata tempona rara-mu kana madua ewa to nitosu nu taono nabaka.”
36 Naria mbii isee sadua nabi bangkele natua-mo. Sangana i Hana, ana ni Fanuel, lako ri muli ni Asyer. Pitu mpae-yapa noncamboko, 37 nabalu-mo i Hana, pade tempo ee umuru-na uwalu mpulu aopo mpae-mo. Tado naria-ya nangoka lako ri karawaa Sou nu Allatala. Eo bengina-ya ri Sou ee nenomba ri Allatala ante nosambaya pade nopuasa. 38 Nosintou ante tempo ee narata mbii i Hana, nangune Allatala pade nololita nancambelai ana ee ri sumawee tou to nampopea tempona Allatala mobebasi Yerusalem.
39 Naopu-pa i Yusuf pade i Maria nowia sumawee parenta ni Pue, nanculi-ramo ri Nazaret ri ngamba Galilea. 40 Nantambei-mo bete nu Ana ee pade natambei karoso-Na. Ana ee napande mpuu pade nipotowe mpuu nu Allatala.
I Yesus ri karawaa Sou nu Allatala
41 Butu-butu mpaena totua ni Yesus nalou ri Yerusalem mantutu posusa Eo Bete Paskah. 42 Naganapa umuru ni Yesus sampulu rompae, nalou-ramo ri posusa ee nantutu ada-ra. 43 Naopupa posusa ee nanculi-ramo, agiana i Yesus, naboli ri YerusalemYa-dapa, tado nincani nu tina tuama-Na. 44 Niuli-ra nolumako nantutu tou ntanina-Yada. Sayo bujuru ee-ramo nolumako pade lako nionco-rada i Yesus riolo nu sarara-ra pade tou-tou to nincanika-ra. 45 Agiana tado nipomberataka-ra i Yesus, jadi nanculiki mbii-ramo ri Yerusalem nangonco-Ya. 46 Rarana tolu eo-ra neonco, nirata-ra Ya-mo ri karawaa Sou nu Allatala, ranca-Na noncunda namparonge topande ri Buku Taurat pade nombepepekutana ante isira. 47 Sumawee tou to namparonge-Ya nololita namoleara, apaa kapande-Na nesono pade sono-Na ee nakono pura. 48 Iwee mbii totua-Na namoleara nangkalio-Ya. Pade nanguli-mo tina-Na: “Bobu, nuapa pade iweetu-mo pampowia-Mu ka? Tuama-Mu pade tina-Mu nalimpu nangonco-Ko!” 49 Nesono i Yesus: “Nuapa pade nionco-mi Ku? Apa tado nincani-mi bakote Yaku ei kana meari ri sou nu Tuama-Ku?” 50 Agiana tado nipaha-ra sono ni Yesus ee. 51 Naopu ee nanculi-mo i Yesus namporoa-ra nalou ri Nazaret, pade natundu ri totua-Na. Sumawee kajadia ee niboli nu tina-Na ri rara-na.
52 Nantambei-mo kabete bo kapande ni Yesus, pade nampakadonu Allatala bo tou-tou.