Kareba Belo to nitulisi
ni Lukas
Popamulana
1:1-4
1
1 Teofilus to nibila,Nadea-mo tou nampewuku notulisi ante nateatoro sumawee kajadia to najadi-mo ri tongo-tongo-ta. 2 Nitulisi-ra nantutu lolita to nituturaka-ta nu tou to nangkalio mata kajadia ee lako ri paramulana, pade nipopowole-ramo kareba-na. 3 Naopu-pa niparesa mpakabelo-belo-ku sumawee kajadia ee lako ri paramulana, nipekiri-ku agina kutulisika-ko tuama bona mateatoro ntoto-pa. 4 Pade nipowia-ku ewa ee, bona mu-ncani ntoto tuama sumawee nuapa nipatudukika-ko nakono mpuu-da.
Popepanguncanika pangote i Yohanes Topebaptis
1:5-25
5 Tempo nu mbagou Herodes noparenta ri ngamba Yudea, naria sadua tobalia sangana i Zakharia. Ia ei sadua lako ri kolompo nu tobalia-tobalia Abia. Bangkelena nisanga i Elisabet, nipomulika mbii nu tobalia. 6 Katuwu-ra ncamboko ei nampakadonu mpuu rara nu Allatala. Isira ei natundu mpuu ri sumawee parenta bo atura nu Allatala. 7 Isira ei tado noana sabana i Elisabet nalalo pade natua-ramo.
8 Sauatu tempo, kolompo ni Abia namparata bago ri Sou nu Allatala, i Zakharia nampowia bagona najadi tobalia ri ngayo nu Allatala. 9 Nantutu kabiasaa-ra, tobalia-tobalia noundi bona mampelisi yema to mesua ri rara Sou nu Allatala. Pade i Zakharia-mo to natepelisi mesua ri rara Sou nu Allatala pade motunu dupa. 10 Bulana notunu dupa, tou dea ri sawalikuna nosambaya. 11 Tempo ee malaeka ni Pue nampopesuwu koro-na si Zakharia. Malaeka ee nokongkore mbira ri ngkana nu meja potunua dupa.
12 Pangkalio ni Zakharia malaeka ee, neingu pade naeka-yamo. 13 Agiana malaeka ee nanguli: “Nemo maeka-ko Zakharia. Nironge-mo nu Allatala sambaya-mu. Bangkele-mu i Elisabet kana mampoanaka sadua ana baleilo, pade ana ee ngoni kana musanga i Yohanes. 14 Kana madonu mpuu-ko pade madea tou ntanina madonu ande rapoanaka-pa ana ee ngoni. 15 Ia kana mewali to bete ri pangkalioa nu Allatala, tado manginu anggur pade sumawee inua to mepakalangu sinungka tuwu-na. Mopamula lako pampotianaka-ya, ia kana nakuasai Inosa Gasa. 16 Madea ngoni to Israel kana nakeni mpanculi ri Allatala, Pue-ra. 17 Ia kana mewali suro ni Pue to naroso pade nakuasa ewa i nabi Elia. Ia kana mampoposingkabelo mpanculi tuama ante ana-ana-na, pade sumawee tou to tado natundu ri Allatala kana nakeni mpanculi ri dala nanoa. Sumawee ee nipowia-na bona mampakasadia todea to nasadia-mo mantarima i Pue.”
18 Pade nanguli-mo i Zakharia ri malaeka ee: “Beiwa bona ku-ncani kakono nuanu niuli-mu etu? Yaku ei natua-kumo, pade bangkele mbii-ku natua-yamo.”
19 Nesono malaeka ee: “Yaku ei-mo i Gabriel. Yaku nolayani Allatala pade Ia-mo to nantudu-ku noparata kareba belo ei si-ko. 20 Nuapa niuli-ku ei kana madupa ande maratapa tempona. Agiana lawi tado niparisaya-mu lolita-ku ei, iko ngoni tado mamala mololita, pade tado mowotu duu-na madupa nuanu niuli-ku ei.”
21 Bulana ee, sumawee tou nopea oa i Zakharia. Namoleara-ra, nuapa pade nasae gaga-ya ri rara Sou nu Allatala? 22 Nesuwu-yapa, tado-mo namala-ya nampololitaka-ra. Aga norae nu palena-damo, pade tado-mo nowotu-ya. Pangkalio-ra i Zakharia ei tado-mo nasowa pololita-na, nincani-mo ntou dea ee bakote naria to nikalio-na ri rara Sou nu Allatala.
23 Naopu-pa pobago ni Zakharia ri Sou nu Allatala, nanculi-yamo ri sou-na. 24 Tadopa nasae naliu ee, notiana-mo i Elisabet bangkele ni Zakharia. Rarana alima mbula i Elisabet ei tado nesuwu-suwu lako ri rara ncou. 25 Nanguli-yamo: “Kaopuana nitulungi-kuda ni Pue, nilali-Namo eya mata-ku lako ri kalalo-ku.”
Popeparonge pangote i Yesus
1:26-38
26 Naganapa aono mbula potiana ni Elisabet, nitudumo nu Allatala malaeka Gabriel nalou ri ngata Nazaret, ri ngamba Galilea. 27 Malaeka Gabriel nitudu malou ri sadua torandaaa, to nisanga i Maria. Torandaa ee nombepokono ante sadua kabilasa to nisanga i Yusuf, muli nu Mbagou Daud. 28 Malaeka ee narata si Maria pade nanguli: “Tabe, ikomo to nitiroi ni Pue! I Pue mamporoasi-ko!”
29 Namparonge lolita nu malaeka ee, nabatoro-mo i Maria, nangkajadika nepekutana ri rara-na, nuapa batua nu petabe ee.
30 Pade nanguli malaeka ee si Maria: “Nemo maeka-ko Maria, sabana nabete mpuu pampotowe-ko nu Allatala. 31 Iko kana motiana pade mampoanaka sadua ana baleilo, ana ee kana mu-sanga i Yesus. 32 Ia rapemabose ri ngayo nu Allatala pade rakasangai Ana nu Allatala To Neliu Kalangkona. Pue Allatala kana mopajadi-Ya mbagou ewa tumpu-Na, Mbagou Daud. 33 Pade Ia kana moparenta majadi mbagou ri muli ni Yakub duu-na masae-sae. Poparentaa-Na ee tado maria kaopuana.”
34 Agiana nanguli i Maria ri malaeka ee: “Yaku ei narandaaku-dapa. Beiwa pade majadi nuanu etu si yaku?”
35 Nesono malaeka ee: “Inosa Gasa masompo si-ko, pade kuasa nu Allatala to neliu kabetena motalendusi-ko. Etumo sabana ana to mupoanaka ee kana rakasangai Nagasa, Ana nu Allatala. 36 Pade mu-tora, sarara-mu i Elisabet, notiana aono mbula-yamo, pade ia kana mampoanaka sadua ana baleilo, noudamo natua-yamo pade niuli ntou nalalo-ya. 37 Sabana tado naria lolita nu Allatala to tado madupa.”
38 Pade nanguli-mo i Maria: “Kakono-konona yaku ei batua ni Pue, madupa-mo nuanu niuli-mu etu ri koro-ku.” Naopu ee nanculi-mo malaeka ee.
I Maria pade i Elisabet
1:39-45
39 Naopu ee, nalou-mo i Maria ri saongu ngata ri ngamba Yudea,b ri pobuluana. 40 Nalou-yamo ri sou ni Zakharia. Pesua-na ri sou ee, netabe-yamo si Elisabet. 41 Pamparonge ni Elisabet petabe ni Maria, nokalemo ana rara-na. I Elisabet nipesua nu Inosa Gasa, 42 pade nongare-mo i Elisabet nanguli: “Lako ri sumawee bangkele iko ei-mo to nitiroi mpuu nu Allatala! Pade ana to mu-poanaka etu ngoni natiroi nu Allatala. 43 Yema ntoto-kuda ei pade namei-mo tina ni Pue nampotomuka-ku? 44 Pamparonge-ku petabe-mu, ana ri rara ntei-ku ei nokale pade nadonu. 45 Nasana mpuumo-ko, apaa namparisaya nuapa niuli ni Pue si-ko ee kana madupa!”
Dodia peune ni Maria
1:46-56
46 Naopu ee nanguli-mo i Maria:
“Rara-ku nangune i Pue,
47 pade inosa-ku nasana, apaa Allatala nampakasalama-ku.
48 Nitora-Na ku-da, batua-Na to netowei ei!
Mopamula eo ei sumawee tou nanguli yaku ei-mo to nitiroi.
49 Apaa Allatala To Neliu Kakuasa-Na nowia sumawee nuanu nadupa si yaku, Nagasamo sanga-Na.
50 Pade towe-Na mesompo oa ri tou to naeka si-Ya.
51 Nipopekalio-Na kakuasa-Na
ante nuanu nipowia mpale-Na pade nampopogampota tou-tou to nalangko rara-na.
52 Mbagou-mbagou nisomponaka-Na lako ri posundaa-ra
pade tou to netowei nipakalangko-Na.
53 To naoro nipakaosa-Na ante sumawee kabeloa,
pade to sugi niwura-Na ante pale ngkaloa.
54 Nitulungi-Namo Israel, batua-Na,
nantutu potipa to nipowia-Na ante tumpu-ta.
55 I Pue tado nangkalingani potipa-Na,
pade nadoli rara-Na si Abraham pade muli-na duu-na masae-sae.”
56 Pade nearimo i Maria ri sou ni Elisabet rapa-rapana tolu mbula kasaena, pade nanculi-yada ri sou-na.
Pangotea i Yohanes Topebaptis
1:57-66
57 Narata-mo tempona i Elisabet moana. Nipoanaka-namo sadua ana baleilo. 58 Pamparonge nu tongki-tongki-ra pade sumawee sarara-na kabelo ni Pue si Elisabet, nadonu-ramo singkei-ngkani ante i Elisabet. 59 Tempo nu ana ee noumuru uwalu eomo, narata-ramo namei bona motindi-ya, pade madota mosanga ana ee i Zakharia mantutu sanga nu tuama-na, 60 agiana nanguli tina-na “Tado! Ana ei kana rasanga i Yohanes.” 61 Nanguli-ra si Elisabet: “Tado naria saduaa sarara-mu nosanga ewa ee.” 62 Pade norae-ramo, nampekutana i Zakharia rasanga yemamo ana-na. 63 Niperapimo ni Zakharia kalambatu pade notulisi: “Sanga-na i Yohanes.” Pade namoleara pura-ramo. 64 Bulawee ee mbii namalamo i Zakharia nololita mpanculi pade nangune Allatala. 65 Tongki-tongki-ra naeka pura, pade kareba ee nowole ri sumawee ngamba ri bulu Yudea. 66 Sumawee tou to namparonge nuanu ee nepekutana ri rara-ra: “Majadi nuapa mia ngoni ana etu?” Sabana i Pue namporoasi-ya.
Dodia peune ni Zakharia
1:67-80
67 I Zakharia, tuama nu ana ee, nikuasai Inosa Gasa nangkajadika niparata-namo awili ni Pue. Nanguliya:
68 “Mamei-tamo mangune i Pue, Allatala to Israel!
Narata-Yamo nantulungi todea-Na pade nampakabebasi-ra.
69 Niwei-Na si kita to Pepakasalama to naroso,
muli ni Daud, batua-Na.
70 Lako ngkoulu niulimo nu nabi-nabi to nipelisi-Na, niweimo ni Pue potipa-Na.
71 Bona mampakasalama-ta lako ri bali-ta pade lako ri kakuasa nu tou-tou to nampodaa-ta.
72 Bona mampopekalio kabelo nu rara-Na ri tumpu-ta, pade mampopatora potipa-Na to nagasa ee kana Na-padupa.
73 Sumpa to niuli-Na si Abraham, tuama-ta, pade Ia mbii notipa,
74 bona ikita mawia lako ri pale nu bali, bona mamala-ta menomba si-Ya tado ante eka-eka,
75 ri rara nu kagasaa pade kakonoa ri ngayo-Na sinungka ngkatuwu-ta.
76 Pade iko ana-ku, kana rakasangai nabi nu Allatala To Neliu Kalangkona. Apaa iko kana molumako mampokouluka i Pue bona mopasadia dala-Na,
77 bona moparata ri todea-Na, isira kana rapakasalama ande na'ampungimo nu Allatala jeko-jeko-ra.
78 Sabana i Pue-ta to doli rara,
pade nepotowe. Etumo sabana kana marata-Ya mampakasalama-ta.
Ewa eo nembere sangkabaa,
79 iwee mbii-Yamo mambei kabaasa-Na ri sumawee tou
to natuwu ri rara kadedia pade kaekaa.
Ia nonini-ta nolumako nantutu dala katuwua to masana.”
80 Ana ni Zakharia ee nantambeimo bete-na pade karoso-na. Neari-yamo ri tongo mpada bei, duu-na marata tempona mampopeonga koro-na ri to Israel.