Kareba Belo to nitulisi
Ni Yohanes
Lolita nu Allatala to newali manusia
1:1-18
1
1 Lako ri paramulana naria amimo Lolita nu Allatala. Lolita ee noroa-roa ante Allatala. Pade Lolita ee nasimbei ante Allatala. 2 Lako ri paramulana, Ia noroa ante Allatala. 3 Ngila-ngayana nipajadi lako si-Ya. Tado naria sangayaa mpuu nuanu to nipajadi tado lako si-Ya. 4 Lolita ee puu nu katuwua, pade katuwua ee nampakabaa pekiri nu manusia. 5 Kabaasana ee newanta ri rara nu kadedia, pade kadedia ee tado namala nampadagi-ya. 6 Naratamo sadua tou to nitudu nu Allatala, sanga-na i Yohanes. 7 Ia narata nosabiti nancambelai kabaasana ee, bona sumawee tou meparisaya. 8 Tado ia kabaasana ee, agiana ia kawule nosabiti ngkola nancambelai kabaasana ee. 9 Kabaasa mpuu-mpuu to mampakabaa sumawee manusia, marata-mo ri dunia.10 Lolita nu Allatala naria amimo ri dunia. Dunia nipajadi lako si-Ya, agiana dunia tado nanguncani-Ya. 11 Ia namei ri ngata dodo-Na, agiana todea-Na tado nantarima-Ya. 12 Agiana tou to nantarima-Ya bo namparisaya-Ya, niwei-Na kuasa majadi ana-ana nu Allatala, 13 to nipoanaka tado lako ri dota nu manusia, ba lako ri dota rara nu baleilo, agiana lako ri dota nu Allatala.
14 Lolita nu Allatala ee najadi manusiamo pade natida riolo-ta, nikalio-tamo pampemabose-Ya. Pampemabose-Ya ee nitarima-Na lako ri Tuama apaa Ia Ana sadudua nu Tuama. Lako si-Ya-da pade namala-ta nanguncani mpuu-mpuu Allatala bo towe-Na si kita. 15 I Yohanes narata najadi sabi-Na. Nopangara-yamo ri tou-tou: “Ei-Yamo to niuli-ku ri lolita-ku: Ia kana marata matepopuri lako si yaku, agiana neliupa bete-Na lako si yaku, apaa tadopa nipoanaka-ku, naria ami-Yamo.” 16 Nabete mpuu towe ni Yesus Kristus si kita nangkajadika tado naria kaopua nu belo niwei-Na si kita. 17 Parenta ni Pue nitarima-ta lako si Musa. Agiana lako si Yesus Kristus-da pade namala nikalio-ta towe bo kabula rara nu Allatala.
18 Tado naria namo sadua to nangkalio Allatala. Agiana Ia ana sadudua nu Tuama, to nasimbei ante Tuama bo nosingkale rara mpuu ante Tuama. Ia-mo to nampopanguncanika Tuama si kita.
Posabiti ni Yohanes nancambelai koro dodo-na
1:19-28
19 Topangkeni-topangkeni to Yahudi ri ngata Yerusalem nantudu basangkia dua tobalia pade to Lewi malou mampekutana i Yohanes: “Yema-ko ei?”
20 Nipangaku mpuu-mpuu-mo ni Yohanes: “Yaku ei tado Mbagou Topepakasalama.”
21 Pade nepekutana mbii-ramo si-ya: “Ande iweeda, yemada-ko wea? Iko-mo i Elia?” Nesono i Yohanes: “Tado.” Nepekutana mbii-ramo: “Iko-mo nabi to kana marata?” Nesono i Yohanes: “Tado.”
22 Pade nanguli mbii-ramo si-ya: “Ande iweetu wea, ulimo si kami yema-ko ei, bona mamala-ka mambei sono ri tou-tou to nantudu-ka. Nuapa sono-mu nancambelai koro dodo-mu?”
23 Nesono i Yohanes: “Yaku ei-mo tou niuli ni nabi Yesaya impia ewa ei: Naria wotu nopangara ri tongompada bei: Pasadia dala napolumakoi ni Pue.”
24 Riolo nu tou-tou to nitudu ee, naria basangkia dua to Farisi. 25 I sira mbii nampekutana-ya: “Ande tado Mbagou Topepakasalama-ko, tado i Elia, pade tado mbii nabi to kana marata, nuapa pade nebaptis-ko?” 26 Nisonoi-ra ni Yohanes: “Yaku nebaptis ante ue, agiana ri tongo-tongo-mi naria sadua tou to tadopa nincani-mi. 27 Ia narata natepopuri lako si yaku, agiana mobolesi popou sandala-Na tado masipato-ku.”
28 Sumawee nuanu ee najadi ri ngata Betania, ri sambote ue Yordan, pearia ni Yohanes nebaptis.
Yohanes nantudo i Yesus
1:29-34
29 Kaneilena, nikaliomo ni Yohanes i Yesus namei si-ya. Nangulimo i Yohanes ri tou-tou naria isee: “Kalio, etumo Ana Bimba nu Allatala to mogempu jeko nu dunia. 30 Ia-mo to niuli-ku kana marata matepopuri lako si yaku, agiana neliupa bete nu kuasa-Na lako si yaku, apaa tadopa nipoanaka-ku, naria Ya-mo. 31 Impia yaku dodo mbii tado nanguncani-Ya. Agiana patuju-ku namei nebaptis ante ue bona todea to Israel manguncani-Ya.” 32 Pade nisabiti mbii ni Yohanes ewa ei: “Nikalio-ku Inosa Gasa nesompo ewa tonci banggebodo lako ri langi pade neuntu si-Ya. 33 Tempo ee tadopa nincani-ku bayema-Ya. Agiana Allatala to nantudu-ku mebaptis ante ue nangulikaka-kumo: Ande mu-kalio Inosa Gasa masompo, pade meuntu ri sadua tou, Ia ee-mo to kana mebaptis ante Inosa Gasa. 34 Nikalio dodo-kumo sumaweena ee, pade nosabiti bakote Ia-mo Ana nu Allatala.”
Ana-ana guru ni Yesus to paramulana
1:35-51
35 Kaneilena nokongkore mbiimo i Yohanes isee noroa ante rodua ana guru-na. 36 Pangkalio-na i Yesus noliu isee, nanguli-yamo: “Kalio, etumo Ana Bimba nu Allatala!” 37 Ana guru-na rodua ee namparonge nuanu niuli-na ee, pade nalou-ramo nantutu i Yesus. 38 Nipeilimo ni Yesus bengo-Na, pade nangkalio-ra nantutu-Ya. Nepekutana-Yamo: “Nuapa nionco-mi?” Nesono-ra: “Rabi, riumba-Ko neari?” (Rabi ei batuana Guru.) 39 Nesono-Ya: “Kameimo komi mangkalio dodo.” Nalou mpuu-ramo nangkalio pearia-Na, pade neari-ramo i see namporoa-Ya. Tempo ee rapa-rapana tinti aopo kinowiana. 40 Sadua lako ri rodua to namparonge nuanu to niuli ni Yohanes pade nalou nantutu i Yesus ee, sanga-na i Andreas, sarara ni Simon Petrus. 41 Nagasi-gasi-mo i Andreas ei nangonco i Simon sarara-na, pade nangulikaka-ya: “Notomu-kamo ante i Mesias!” (Mesias batuana i Kristus, Mbagou Topepakasalama.) 42 Pade nikenimo ni Andreas i Simon si Yesus. Niololemo ni Yesus i Simon pade nanguli: “Iko i Simon, ana ni Yohanes. Iko kana rasanga i Kefas.” (Kefas ande ri basa Ibrani batuana Petrus, nibatuasi watu roso.)
43 Kaneilena nibotusimo ni Yesus meongko malou ri Galilea. Notomu-Yamo ante i Filipus, pade nangulikaka-ya: “Tumei-ko mantutu-Ku!” 44 I Filipus ei lako ri ngata Betsaida, ngata pearia ni Andreas bo i Petrus. 45 Naopu ee, notomumo i Filipus ante i Natanael pade nangulikaka-ya: “Notomu-kamo ante tou to niuli ni Musa ri rara Buku Taurat, pade to nipoawili nu nabi-nabi. Tou ee i Yesus, ana ni Yusuf, lako ri Nazaret.” 46 Nanguli i Natanael si Filipus: “Beiwa pade mamala nuanu nabelo meumba lako ri Nazaret?” 47 Nesono i Filipus: “Tumei-ko pade kalio dodo-mo!” Pangkalio ni Yesus i Natanael namei si-Ya, nololita-Yamo nancambelai i Natanael: “Kalio, etumo koro poko to Israel. Tado naria boa-na.” 48 Nanguli i Natanael si-Ya: “Beiwa pade nincani-Mu ku?” Nisonoi-ya ni Yesus: “Tadopa nipokio-ko ni Filipus, nikalio-Kumo ko riunde nu puu ngkou ara emei.” 49 Pade nanguli-mo i Natanael si Yesus: “Guru, Iko-mo Ana nu Allatala, Iko-mo Mbagou nto Israel!” 50 Nesono i Yesus: “Iko neparisaya, sabana panguli-Ku bakote nikalio-Kumo ko riunde nu puu ngkou ara ee? Nuanu to neliu ntotopa lako ri nuanu ee kana mu-kalio.” 51 Pade niuli mbii ni Yesus si-ya: “Kakono-konona Ku'ulikaka-ko, iko kana mangkalio langi matebea, pade malaeka-malaeka nu Allatala manou bo mompandake mamei ri Ana Manusia.”