11
1 Naopu-pa i Yesus nambei petetesi ri sampulu rodua ana guru-Na, nipaleisi-Namo pearia ee. Nalou-Yamo nepatuduki pade nampopowole Kareba Belo lako ri Allatala ri ngata-ngata to najungku isee.I Yesus pade i Yohanes Topebaptis
2 I Yohanes Topebaptis to rancana nitarungku namparonge kareba nancambelai pobago ni Kristus. Pade nitudu-namo basangkia dua ana guru-na malou si Yesus bona mampekutana: 3 “Iko-mo to kana marata mantutu potipa nu Allatala, ba kana mampopea tou ntani ka-da?” 4 Nesono i Yesus: “Panculimo komi si Yohanes pade ulikakaka-ya nuapa to nironge-mi pade nikalio-mi. 5 Tou naburo najadi nekalio, tou napungku najadi nolumako, tou nadua bose naori, tou nawongo najadi neronge, tou namate natuwu mpanculi, pade Kareba Belo lako ri Allatala niparata ri tou-tou to netowei. 6 Masana mpuu-mo tou to tado nasue rara-na pade namporou-Ku.”
7 Nanculi-pa to nitudu ni Yohanes ee, nopamulamo i Yesus nololita ri tou dea nancambelai i Yohanes. Nanguli-Ya: “Nuapa to nalou nikalio-mi ri tongo mpada bei? Nangkalio sancila kawoko to nowenta niwuru nu ngolu? 8 Ikomi nalou bona mangkalio nuapa? Mangkalio tou nowaru nabelo? Tou-tou to nowaru ewa ee neari ri sou bete nu mbagou! 9 Nuapa pade nalou komi ri tongo mpada bei? Bona mangkalio nabi? Nakono. Pade nakono amida i Yohanes ee neliu lako ri nabi. 10 Apaa i Yohanes ee-mo to niuli ri rara Buku Nagasa ewa ei:
Kalio, Yaku, Pue Allatala nantudu suro-Ku mampokouluka-Ko.
Ia kana mampasadia dala-Mu.
11 Toramo! Ri dunia ei tado naria tou neliu kabete-na lako si Yohanes Topebaptis. Noudamo iwee, tou to nakodi ntoto ri rara nu Poparentaa nu Allatala neliu kabete-na lako si Yohanes. 12 Lako paramula ni Yohanes nampopowole kareba-na duuna ri tempo ei, todea nu Allatala niewa nu tou-tou to nampesimbukui mampadagi-ra ante kaseke-ra. 13 Duuna karata ni Yohanes, sumawee parenta ni Musa pade pepatuduki nu nabi-nabi nampoawili nancambelai Poparentaa nu Allatala. 14 Pade ande ikomi madota mamparisaya, i Yohanes ee-mo i Elia, apaa karata-na nipoawili ami-mo. 15 Yema notalinga, kana meronge!
16 Ante nuapa Kupoparapaika tou-tou ngkapuri ei? Isira ewa ngana-ngana to noncunda ri potomu. To santaguna-na nongare ri to santaguna ntanina:
17 Ikami notawusika komi lalowe, agiana tado nogale-gale komi.
Ikami nododia ewa to notumangisi tomate, agiana tado nokeo komi.”
18 I Yohanes narata nopuasa-yada pade tado nanginu anggur, agiana niulikaka nu tou-tou: “Nipesua nu wao tuwu-yada!” 19 Ana nu Manusia narata nangkondi bo nanginu ewa tou ntani, agiana niulikaka nu tou-tou: “Kalio tou edou! Nadoko, nalangu, wega nu topedusu balasitee pade wega nu tou najeko. Noudamo iwee, kapandea nu Allatala nadupa nikalio lako ri wuana.”
I Yesus nampokaranalaka basangkia ngata
11:20-24
20 Naopu ee, nopamulamo i Yesus nampokaranalaka basangkia ngata-ngata, ngata to nadea ngkanimo i Yesus nowia kadupaa-kadupaa, apaa tou-tou ri ngata-ngata ee tado nadota nancoro lako ri jeko-jeko-ra. 21 Nanguli-Ya: “Mawesomo komi, tou-tou ri Korazim! Pade mawesomo komi tou-tou ri ngata Betsaida. Ande rapana kadupaa-kadupaa to nipowia-Ku ri tongo-tongo-mi ee nipowia-mo ri ngata Tirus bo Sidon, tantu tou-tou radou masae-ramo mancoro lako ri jeko-jeko-ra, pade mopasua powaru pantora tomate bo mamboli pompo ri woo-ra. 22 Toramo, ri Eo Kaopua nu dunia, meliupa kantomo nu suku to mi-tarima lako ri suku to nitarima nu tou-tou ri ngata Tirus pade Sidon! 23 Pade ikomi, tou-tou ri Kapernaum! Nisarumaka-mi ikomi naongko nu Allatala duuna marata ri suruga? Tado! Pegolia-na ikomi kana natadiaka nu Allatala ri naraka! Apaa ande rapana kadupaa-kadupaa to nipowia ri tongo-tongo-mi etu nipowiamo ri Sodom, tantu ngata ee tado rapakaropu nu Allatala pade maria-dapa duuna eo ei! 24 Toramo, ri Eo Kaopua nu Dunia, tou-tou ri Sodom kana mantarima suku to nalingaa lako ri suku to kana mi-tarima!”
Pebawei nu Topepakasalama
25 Tempo ee, nosambayamo i Yesus. Niuli-Na: “Tuama, Pue to nokuasai langi bo dunia. Yaku nosukuru si-Ko sabana sumaweena ee niwunika-Mu ri tou-tou to nabija bo napande, agiana nipopakalio-Mu ri tou-tou to tado nanguncani nuapa-pa, 26 apaa ee-mo dota-Mu Tuama.” 27 Ngila ngayana niweimo nu Tuama si Yaku. Tado namo saduaa tou nanguncani Ana, aga Tuama. Tado namo saduaa mbii to nanguncani Tuama, aga Ana, pade tou-tou to nipopanguncanika nu Ana nancambelai Tuama ee.
28 Kameimo komi si Yaku sumawee komi to nalenge, bo to namparasai kantomo nu kenia-na, Yaku kana mambeika komi kalogaa. 29 Tutu-mo parenta-Ku pade pegurumo komi si Yaku. Apaa Yaku ei nadole bo naede rara, bona ikomi kana mamparata kasanaa. 30 Apaa parenta-parenta-Ku nepakadonu, bo kenia to niwei-Ku si komi nalingaa.”