Ana-ana guru ni Yesus nopudu gando ri Eo Peuntua to Yahudi
12
1 Sauatu eo, ri Eo Peuntua to Yahudi, ranca ni Yesus noliu ri bonde gando, ana-ana guru-Na nopudu gando, pade nikondi-ra apaa ranca-ra naoro. 2 Nikalio-pa nu to Farisi nuanu ee, nanguli-ramo si Yesus: “Kalio! Ana-ana guru-Mu nowia nuanu to nipetagii rapowia ri Eo Peuntua-ta.” 3 Nesono i Yesus: “Tadopa naria nibasa-mi nuanu to nipowia ni Daud ante topantutu-ya tempo-ra naoro? 4 Ia nesua ri rara Sou nu Allatala, pade nangkondi roti to nipopenombamo ri Allatala. Bo ee ande mantutu parenta nu agama-ta, ia bo topantutu-ya tado mamala mangkondi roti ee. Kawule tobalia-tobalia ngkola-da to mamala mangkondi. 5 Ba tadopa naria mbii nibasa-mi ri rara nu parenta Taurat bakote butu Eo Peuntua-ta, tobalia-tobalia ri rara Sou ni Pue, nobago dodo-rada, agiana tado nipomasala-ra? 6 Peiraramo nuanu niuli-Ku ei: Isei naria Sadua to neliu kabetena lako ri Sou ni Pue. 7 Ri rara Buku Nagasa nitulisi: Aga towe rara-da to nipodota-Ku, tado penomba lako ri binata. Ande mpuu-mpuu nincani-mida batua nu lolita ee, ikomi kana tado mampomasala tou-tou to tado nasala. 8 Apaa, Ana Manusia nakuasa mobotusi nuapa to masipato bo to tado masipato rapowia ri Eo Peuntua-ta.”I Yesus nampakabelo tou ri Eo Peuntua to Yahudi
12:9-15
9 Nipaleisimo ni Yesus pearia ee pade nalou ri sou penombaa to Yahudi. 10 Isee naria tou namate pale-na sambira. Basangkia dua tou to madota mangonco-ngonco kasala ni Yesus, nampekutana-Ya: “Mamala-da mampakabelo tou ri Eo Peuntua-ta?” 11 Nesono i Yesus: “Ande rapana maria bimba-mi sambaa, pade ri Eo Peuntua bimba ee manawu ri lowu nandala, nuapa to mipowia? Tantu kana mi-ore bimba ee ri eo ee mbii. 12 Agiana, nasulipa oli nu manusia pade bimba. Jadi mamala-da mantulungi tou ri Eo Peuntua-ta.” 13 Pade nangulimo i Yesus ri tou namate sambira pale-na ee: “Ulumo pale-mu.” Niulu-mo nu tou ee pale-na, pade bulawee ee mbii nabelomo pale-na ewa pale-na to sambirana, 14 Agiana tou-tou to Farisi nangkosu lako ri sou penombaa ee, pade no libui bona mopatesi i Yesus. 15a Agiana nincani-da ni Yesus patuju-ra. Jadi nangkosu-Yamo lako isee.
I Yesus batua ni Pue
12:15b - 21
15b Nadea tou nantutu i Yesus. Pade Ia mbii nampakabelo sumawee tou to nadua. 16 Agiana nitagi mpu-mpuu-ra ni Yesus nemo manguli ri tou ntanina bayema-Ya, 17 bona madupamo lolita nu Allatala to niparata ni nabi Yesaya:
18 “Ei-mo batua-Ku to nipelisi-Ku,
Tou to nipotowe-Ku pade to nampakawoe rara-Ku.
Inosa-Ku kana Ku-weikaka-Ya,
kanoaa-Ku kana Na-popowole ri sumawee tou ri dunia.
19 Ia tado maria mombebili ba mongare,
ba mopangara ri dala-dala bete.
20 Lolo nu tawa to nolue tado nipakakotu-Na
pajanaa to namao tado nipatesi-Na.
Ia kana mentida duuna ra rata kanoaa;
21 pade sumawee tou ri dunia mesarumaka si-Ya.”
I Yesus pade i Beelzebul
12:22-37
22 Naopu ee, nikeni-mo si Yesus to naburo bo nawojo apaa nipesua nu wao tuwu. Nipakabelomo ni Yesus tou ee nangkajadika namala-yamo nololita pade nekalio. 23 Sumawee tou namoleara pade nanguli: “Ba Ia ei-mo Mbagou Topepakasalama, muli ni Mbagou Daud, to nitipamo ee?” 24 Pamparonge nu tou-tou to Farisi nuanu ee, nesono-ramo: “Tou ei namala nowura wao tuwu, sabana i Beelzebul, Mbagou nu Seta, to nambei-Ya kuasa ee” 25 Agiana nincanida ni Yesus pekiri nu to Farisi ee. Pade nanguli-Yamo si sira: “Ande saongu kambagoua mosimpogara pade mombepobali, tantu kambagoua ee ngoni tado masae. Pade ande saongu ngata ba tou sancou mosimpogara pade mombepobali, tantu kana mogaampota. 26 Iwee mbii ri rara kambagoua nu seta, ande mosimpogara-damo pade mombepobali, kambagoua ee kana maopu. 27 Niuli-mi Yaku nowura wao tuwu ante kuasa ni Beelzebul. Ande iweetu wea ante kuasa ni yema ana-ana guru-mi nowura wao tuwu? Tantu ante kuasa nu Allatala. Ana-ana guru-mi etu dodomo to nopanotosi kasalaa-mi. 28 Agiana Yaku nowura wao tuwu ante kuasa nu Allatala. Ee batuana bakote nopamulamo Allatala moparenta ri tongo-tongo-mi. 29 Beiwamo tou mamala mesua ri rara sou nu tou naroso bona mangago gagu-na, ande tado nasilu ncala ulu tou naroso ee? Maopu ee-da, pade mamala-yada mangago gagu-na. 30 Tou to tado namposambira-Ku, ia nangewa-Ku. Pade tou to tado nampangawa-Ku, ia-mo to nampakagero pobago-Ku. 31 Jadi Ku'ulikaka komi: Ande tou mowia jeko bo mekanene, mamala-yadapa ra'ampungi. Agiana ande tou mangkanene Inosa Gasa, tado mamala-ya ra'ampungi! 32 Ande tou manguli lolita nangewa Ana nu Manusia, mamala-yadapa ra'ampungi, agiana ande ia mangkanene Inosa Gasa, tado mamala-ya ra'ampungi, mopamula lako ri eo ei duuna masae-sae.”
33 “Ande kou mabelo, mabelo mbii wuana. Ande kou tado mabelo, tado mbii mabelo wuana. Kabelo nu kou nikalio lako ri wuana. 34 Ikomi tou nadaa, beiwamo kamala-mi manguli nuanu mabelo ande rara-mi madaa? Nuanu to niuli nu wiwi, ee nesuwu lako ri rara. 35 Tou to nabelo, nanguli nuanu nabelo apaa rara-na naponu ante nuanu nabelo. Pade tou to nadaa, nanguli nuanu nadaa apaa rara-na naponu ante nuanu nadaa. 36 Jadi, toramo: Ri Eo Kaopua nu dunia, butu dua tou kana mangkolo dodo lolita-lolita-na to tado naria lotuna. 37 Apaa lolita-lolita dodo-mi ee-mo to rapake mobotusi ba nakonoda-ko ba nasalada-ko.”
Kadupaa si Yunus
12:38-42
38 Naopu ee basangkia dua topande ri Buku Taurat pade to Farisi nanguli si Yesus: “Guru, ikami madota mangkalio-Ko mowia nuanu madupa” 39 Agiana nesono i Yesus: “Nadaa mpuu komi to natuwu ngkapuri ei! Tado natundu komi ri Allatala! Ikomi namperapi-Ku mampowia kadupaa. Agiana tadomo maria kadupaa raweika komi, aga kadupaa to najadi ewa si Yunus-damo. 40 Rarana tolu eo bo tolu mbengi i Yunus ri rara ntei nu bou bete. Iwee mbii, Ana nu Manusia kana meari tolu eo bo tolu mbengi ri rara nu dayo. 41 Ri Eo Kaopu nu dunia, todea nu ngata Niniwe kana rapatuwu mpanculi moroa-roa ante ikomi to natuwu tempo ei pade isira mampomasala inggu-mi, apaa isira nancoromo lako ri jeko-jeko-ra apaa namparonge lolita nu Allatala to niparata ni Yunus. Agiana ngkapuri ei, riolo-mi ei naria to neliu kabete-Na lako si Yunus! 42 Ri Eo Kaopua nu dunia, mbagou bangkele lako ri ngamba Syeba kana rapatuwu mpanculi moroa-roa ante tou to natuwu tempo ei. Pade ia mbii kana mampomasala inggu-mi, apaa bona mamparonge ngkola pepatuduki ni Salomo to nabija ee, mbagou bangkele ee nolumako lako ri ngata to nakawao mpuu. Agiana ngkapuri ei, riolomi ei naria to neliu kabete-Na lako si Salomo agiana tado niparisaya-mi lolita-Na!”
Panculia nu wao tuwu
12:43-45
43 “Ande wao tuwu mangkosu lako ri sadua tou, ia kana welou tumei ri tongompada bei mangonco peuntua-na, agiana tado naria nirata-na. 44 Ee-mo sabana, nanguli-yamo: Yaku kana manculi ri sou to nipaleisi-kumo. Karata-na isee, sou ee nakaboamo, narawa pade nateatoro. 45 Jadi nalou-yamo nampokio papitu wao tuwu ntani to neliu kadaana lako si-ya. Nesua-ramo ri tou ee, pade neari isee. Kaopuana katuwu nu tou ee neliu ntotomo kadaana lako ri katuwu-na lombona. Iwee mbiimo nuanu to kana majadi ri tou-tou to nadaa ngkapuri ei.”
I Yesus pade sarara-sarara-Na
12:46-50
46 Ranca ni Yesus nololita-dapa ante tou dea ee, naratamo tina-Na ante sarara-sarara-Na. Isira nokokongkore ri sawalikuna pade nampesimbukui bona mamala-ra mololita ante Ia. 47 Sadua lako riolo nu tou dea ee nanguli si Yesus: “Guru, tina-Mu ante sarara-sarara-Mu naria ri sawalikuna. Isira madota mololita ante Iko.” 48 Pade nesono-mo i Yesus: “Yema tina-Ku? Yema sarara-sarara-Ku?” 49 Pade nitudo-Namo ana-ana guru-Na pade nanguli: “Ei-mo tina-Ku pade sarara-sarara-Ku. 50 Tou to nowia dota nu Tuama-Ku ri suruga, ia-mo sarara-Ku baleilo, sarara-Ku bangkele, pade tina-Ku.”