Topungku nipopolumako
2:1-12
2
1 Naliupa basangkia eo,
nanculi mbiimo i Yesus ri Kapernaum.
Nowolemo kareba bakote naria-Ya ri sou.
2 Naratamo tou dea nampolimu-limui-Ya,
naponunduu ri rara ncou narata ri mata wombo.
Sintou ni Yesus nampololita Kareba Belo ri tou dea ee see,
3 naratamo tou aopo nokowa topungku.
4 Agiana tado namala-ra narapa si Yesus,
apaa nadea gaga tou.
Nigoli-ra nogea ata ncoudamo ri toto ni Yesus,
pade niulu-ramo topungku ee see ante paletaa-na.
5 Pangkalio ni Yesus nabete mpuu kaparisaya-ra,
pade niuli-Namo ri topungku ee:
“Ana-Ku niampungi-Kumo pura jeko-mu.”
6 Basangkiadua topande ri Buku Taurat to noncunda isee nepekutana ri rara-ra:
7 “Yemada tou ei pade nabia-Yamo nololita ewa edou.
Nokanene Allatala-da tou edou.
Tado ngoni naria tou ntanina mamala moampungi jeko,
aga Allatala.”
8 Agiana nincanida ni Yesus pekiri-ra,
pade niuli-Namo:
“Nuapa pade iweetumo pampekiri-mi?
9 Umbapa nagampa mangulikaka topungku ei:
Jeko-mu niampungimo,
ba manguli:
Pematamo-ko,
ongkomo paletaa-mu pade polumakomo-ko?
10 Bona mi-ncani,
ri dunia ei,
Yaku,
Ana Manusia nakuasa moampungi jeko.”
Pade niulikaka-Namo topungku ee see,
11 “Pematamo-ko,
ongkomo paletaa-mu pade panculimo-ko ri sou-mu!”
12 Nemata mpuumo see tou ee,
niongko-namo paletaa-na pade nolumako-yamo ri tongo-tongo nu tou dea.
Nasaleo ntoto rara-ra.
Niune-ramo i Pue Allatala,
pade nanguli:
“Tadopa naria nikalio-ta kajadia ewa ei.”
I Lewi topedusu balasitee nantutu i Yesus
2:13-17
13 Naopu ee,
nalouki mbiimo i Yesus ri soso ntalinti rano Galilea,
nadea mpuu tou namei si-Ya,
pade nipatuduki-Na ra-mo.
14 Ranca ni Yesus nolumako noliu isee,
nikalio-Na i Lewi ana ni Alfeus topedusu balasitee noncunda ri sou pedusua balasitee.
Pade niuli-Namo si Lewi:
“Tumeimo-ko mantutu-Ku.”
Nokongkore-yamo pade nitutu-namo i Yesus.
15 Ranca ni Yesus nangkondi ri sou ni Lewi,
nadea topedusu balasitee pade tou-tou to najeko namei namporoasi-Ya nangkondi ante ana-ana guru-Na.
Apaa nadea mpuu-ra nantutu-Ya.
16 Basangkiadua topande ri Buku Taurat lako ri to Farisi nangkalio i Yesus nangkondi namporoa topedusu balasitee ante to najeko ee see.
Nepekutana-ramo ri ana-ana guru-Na:
“Nuapa pade guru-mi edou nangkondi namporoa topedusu balasitee bo tou najeko?”
17 Namparonge pepekutana ee,
niulikaka-ramo ni Yesus:
“Tado tou naseha namparalou dokutoro,
agiana to nadua.
Yaku ei narata tado nampokio to nanoa,
aga tou to najeko.”
Nancambelai kapuasa
2:18-22
18 Naria sangkani tempona,
ana-ana guru ni Yohanes Topebaptis pade to Farisi bula-ra napuasa.
Naratamo basangkiadua tou si Yesus nampekutana:
“Nuapa pade ana-ana guru ni Yohanes bo ana-ana guru to Farisi napuasa,
ana-ana guru-Mu tado?”
19 Nisono-ramo ni Yesus ante porapaika:
“Mamala wea wega-wega nu pongante baleilo mopuasa ande bula nu pongante baleilo mamporoasi-ra?
Ande bula nu pongante baleilo mamporoasi-ra,
tado mamala-ra mopuasa.
20 Agiana naria dododa tempona pongante baleilo ra'ala lako si sira,
bula ee-da pade mapuasa-ra.a
21 Tado naria saduaa to motampalangi powaru dengko ante panteiya bou.
Sabana panteiya bou ee mengkuru pade mantambeimo kasempaa nu powaru ee.
22 Iweetu mbii,
tado naria saduaa tou modua anggur bou ri pamboliab nausa.
Apaa ande iwee,
anggur ee-mo ngoni mampakabongka pambolia ee pade maburemo.
Nangkajadika anggur pade pambolia ee matetadi pura.
Agiana anggur bou kana raboli ri pambolia to nabou.”
Ana-ana guru ni Yesus nopudu gando ri Eo Peuntua
2:23-28
23 Sauatu eo,
ri Eo Peuntua to Yahudi,
noliumo i Yesus ante ana-ana guru-Na ri bonde gando,
pade ana-ana guru-Na nopudu gando.
24 Pade nangulimo to Farisi si Yesus:
“Kalio,
nuapa pade nowia nuanu ni petagii ri eo Peuntua-ramo edou?”
25 Nesono i Yesus:
“Apaa tadopa naria nibasa-mi nuapa to nipowia ni Daud ante topantutu-ya sintou-ra nakapuncia pade naoro?
26 Tempo ee i Abyatar newali Tobalia Bete ri Sou nu Allatala,
nesuamo i Daud ri Sou ee pade nangkondi roti pampemabose i Pue,
niweikaka mbii-nadapa ri topantutu-ya.
Bo ee wule tobalia-tobalia ngkolada mamala mangkondi.”