I Yesus nampakabelo tou ri eo Peuntua
3:1-6
3
1 Nalou mbiimo i Yesus ri sou penombaa to Yahudi.
Isee naria to namate pale-na sambira.
2 Basangkia dua to Farisi nangkamata bongo-Ya,
nemo-nemo ngoni Na-pakabelo tou ee ri eo Peuntua,
bona ande Na-pakabelo,
mariamo dala-ra mampanawu-Ya.
3 Nanguli i Yesus ri tou to namate pale-na sambira ee:
“Tumeiko,
pokongkore-ko ri laentongona.”
4 Nipekutamo ni Yesus tou-tou isee:
“Nuapa to mamala rapowia ri eo Peuntua,
nuanu nabeloda,
ba nuanu nadaa?
Mampakasalama tou-da,
ba mampatesi tou-da?”
Tado naria sono-ra.
5 Niolole-ramo ni Yesus ante gigi rara-Na,
pade nadua mpuu rara-Na nangkalio kakoo nu rara-ra.
Naopu ee,
niulikakamo ni Yesus to namate sambira pale-na ee:
“Ulumo pale-mu.”
Pade niulu-namo pale-na,
nangkajadika nabelomo pale-na.
6 Pade nesuwumo to Farisi-to Farisi lako ri sou penombaa ee,
nalou nolibu ante to namposambira i Herodes,
nopasaongu wotu mopatesi i Yesus.
I Yesus nampakabelo tou dea
3:7-12
7 Naopu ee,
nangkosumo i Yesus bo ana-ana guru-Na nalou ri rano Galilea.
Nadea tou lako ri ngamba Galilea nantutu-Ya.
Naria mbii to narata lako ri ngamba Yudea,
8 lako ri ngata Yerusalem,
lako ri ngamba Idumea,
lako ri sambote nu ue Yordan,
pade to lako ri ngata Tirus bo Sidon.
Nadea mpuu tou namei si Yesus,
apaa nironge-ra nadea kadupaa nipowia-Na.
9 Nitudumo ni Yesus ana-ana guru-Na mampasadiaka-Ya saongu duanga,
bona tado rapolimu-limui-Ya nu tou dea ee.
10 Nadea mpuu tou to nipakabelo-Na,
nangkajadika sumawee tou to naria dua-na nombegompa-gompa nokakamu-Ya bona mabelo-ra.
11 Pade tou-tou to nipesua nu wao tuwu,
butu ngkanina-ra nangkalio-Ya,
nenomba oa-ra ri ngayo-Na pade nongare:
“Ikomo Ana nu Allatala.”
12 Agiana i Yesus notagi pura wao tuwu ee bona nemo manguli yema-Ya.
Yesus nampokio sampulu rodua suro
3:13-19
13 Naopu ee nompandakemo i Yesus ri pobuluana,
pade nipokio-Namo to nipodota nu rara-Na.
Pade namei-ramo si-Ya.
14 Nipelisi-Namo sampulu rodua tou.
NanguliYa:
“Yaku nampelisi komi,
bona Ku-poroa,
pade Ku-posuro mampopowole Kareba Belo lako ri Allatala,
15 pade Kuweikaka komi kuasa mowura seta-seta.”
16 Ei-mo sanga-sanga nu tou sampulu rodua nipelisi-Na ee:
I Simon to nipokio mbii-Na i Petrus,
17 i Yakobus bo i Yohanes sarara-na,
to nisanga-Na Boanerges batuana ana nu berese.
Isira ei ana ni Zebedeus,
18 pade i Andreas,
i Filipus,
i Bartolomeus,
i Matius,
i Tomas,
i Yakobus ana ni Alfeus,
i Tadeus,
i Simon to Zelot,
19 pade i Yudas Iskariot to mampobalu i Yesus.
I Yesus pade Beelzebul
20 Naopu ee nanculimo i Yesus ri sou.
Narata mbiimo tou dea nampolimu-limui-Ya,
nangkajadika tado-mo namala kawa ni Yesus bo ana-ana guru-Na nangkondi.
21 Ee-mo sabana pade tou-tou ee nanguli:
“Tadomo nanoto pekiri-Na.”
Pamparonge nu sarara-sarara-Na nuanu elouria,
nalou-ramo nangala-Ya.
22 Topande ri Buku Taurat lako ri ngata Yerusalem nanguli ri tou dea:
“Ia ei nipesua ni Beelzebula.
Mbagou nu Seta to nambei-Ya kuasa nowura wao tuwu.”
23 Pade nipokiomo ni Yesus tou dea ee,
pade nangulikaka-ra ante porapaika:
“Beiwa mbii wao tuwu mowura wao tuwu?
24 Wao tuwu-wao tuwu ee,
nirapaika ewa saongu kambagoua.
Ande saongu kambogua tado masintundu,
kambagoua ee ngoni kana mosimpogaara.
25 Pade mamala mbii rarapaika ewa poncamboko.
Ande poncamboko tado masintundu,
tado masae poncamboko ee ngoni.
26 Iweetu mbii ante Mbagou nu Seta.
Ande Mbagou nu Seta mowura dodo topantutu-ya bo seta-seta-na mombepobali dodo,
kambagoua ee ngoni kana mosimpogaara pade maropu.
27 Tou naroso ee ewa Mbagou nu Seta.
Agiana tado-namo saduaa to mamala mampesua sou tou naroso pade mangala gagu-na,
ande tado na-silu ncala tou naroso ee.
Maopu ee-da pade mamala-yada mangala gagu nu tou ee.
28 Ku'ulikaka komi,
kakono-konona ande maria tou mowia jeko pade mangkanene singkapada manusia-na,
mamalada ra'ampungi.
29 Agiana ande maria tou mangkanene Inosa Gasa,
tou etu tado mamala ra'ampungi.
Sabana pekanenena ee-mo jekona duu-na masae-sae.”
30 I Yesus nanguli ewa ee,
apaa niuli-ra i Yesus ei nipesua nu wao tuwu.
I Yesus pade sarara-sarara-Na
3:31-35
31 Naopu ee naratamo tina ni Yesus pade sarara-sarara-Na.
Nopea-ramo ri sawalikuna,
pade nitudu-ramo tou mampokio i Yesus.
32 Tempo ee nadea tou noncunda nantikusi i Yesus.
Nanguli-ra si Yesus:
“Guru,
tina-Mu bo sarara-sarara-Mu ri sawalikuna,
nangonco-Ko.”