I Yesus nampokio sampulu rodua suro
10:1-4
10
1 Nipokiomo ni Yesus sampulu rodua ana-ana guru-Na pade nambei-ra kuasa bona mowura wao tuwu pade mampakabelo ngila ngaya nu dua bo ngila ngaya kakeruta nu woto. 2 Ei-mo sanga nu sampulu rodua suro ni Yesus ee: To paramulana i Simon to nisanga mbii i Petrus bo i Andreas sarara-na, pade i Yakobus ana ni Zebedeus ante sarara-na i Yohanes. 3 Naopu ee i Filipus pade i Bartolomeus, ante i Tomas bo i Matius topedusu balasitee, pade i Yakobus ana ni Alfeus, bo i Tadeus, 4 kaopuana i Simon to Zelot pade i Yudas Iskariot to kana mampobalu i Yesus ngoni.I Yesus nantudu sampulu rodua suro
10:5-15
5 Naopu ee, sampulu rodua suro ee nitudu ni Yesus ante petetesi-petetesi ei: “Nemo malou komi ri ngata nu tou-tou tado to Yahudi ba ri ngata-ngata nu to Samaria. 6 Agiana koumo komi ri to Israel, peliu-liuna to Israel to napusa. 7 Ulikaka-ra bakote tadomo masae Allatala moparenta majadi Mbagou. 8 Pakabelomo tou-tou to nadua, patuwu mpanculi tou-tou to namate, pakaorimo tou-tou to nadua bose, pade wuramo wao-wao tuwu. Sumawee kuasa ee niwei babayangi si komi. Jadi wei mbii ante babayangi ri tou ntanina.
9 Nemo mangkeni doi bulawa, doi salaka, ba doi ngkala. 10 Pade nemo mbii mangkeni batutu, ba mangkeni rontonga powaru, ba sapatu, ba tioko mpuumo. Apaa tou to nobago, masipato mantarima tombo-na. 11 Ande mesua komi ri ngata bete ba ngata kodi, oncomo sadua to madota mantarima komi. Pearimo komi si-ya duuna mi-papolaki mbii polumako-mi. 12 Ande mesua komi ri sou, ulikakamo tumpu sou ee, i Pue mantiroi komi. 13 Ande mabelo rara nu tumpu sou ee pade ratarima-ra komi, petiroi to niperapi-mi lako si Pue ee kana ratarima-ra. Agiana ande tado mabelo rara-ra si komi, petiroi to niperapi-mi ee tado ratarima-ra. 14 Ande maria sou ba ngata tado madota mantarima komi ba tado madota mamparonge komi, pangkosumo komi lako isee pade tampeasimo rambu nu tana lako ri palata nu paa-mi. 15 Toramo! Ri Eo Kaopu nu Dunia, meliupa suku nu Allatala to kana ratarima nu tou-tou ee lako ri suku to nitarima nu tou-tou ri ngata Sodom pade Gomora!”
Kapepaa ri eo ngkapurina pade popangaku i Yesus
10:16-33
16 “Peiraramo ei: Yaku nantudu komi ewa bimba nalou ri tongo-tongo nu serigala. Jadi, ikomi kana mapande ewa ule pade malusu ewa tonci banggebodo.
17 Maingada komi, apaa ikomi kana rasoko pade rakeni ri ngayo nu topotangara. Ikomi kana raduasi ri sou-sou penombaa. 18 Ikomi kana rakeni ri ngayo nu topoparenta-topoparenta pade mbagou-mbagou, sabana ikomi to pantutu-Ku. Iseemo loga-mi manguli peparisaya-mi si Yaku si sira bo ri tou tado to Yahudi. 19 Ande rakeni bona ratangara, nemo mokantabu rara-mi mancambelai nuapa to kana mi-uli, pade beiwa komi mololita. Sabana nuanu to mi-uli ee, kana raulikaka komi tempo ee mbii. 20 Apaa to mololita tempo ee ikomi, agiana lolita to miuli ee lako ri Inosa nu Tuama-mi ri suruga. Ia kana mowia komi mololita mantutu nuanu to nipodota-Na.
21 Kana majadi bakote tou kana mambei sarara dodo-na bona rapatesi. Nuanu ee mbii to kana majadi riolo nu tuama ante ana-na. Ngana-ngana kana mangewa tina tuama-na, pade mambei-ra bona rapatesi. 22 Ikomi kana napodaa nu sumawee tou, sabana ikomi topantutu-Ku. Agiana tou to mentida duuna kaopuana kana rapakasalama. 23 Ande raduasi komi ri saongu ngata, panganimo komi ri ngata ntanina. Ku'ulikaka komi: Tadopa maopu komi mangkaloui ngata-ngata ri Israel, maratamo Ana Manusia.
24 Ana guru tado neliu lako ri guru-na, pade batua tado neliu lako ri maradika-na. 25 Maganamo ande sadua ana guru majadi ewa guru-na, pade sadua batua ewa maradika-na. Ande tumpu sou niuli i Beelzebul, nedamorauli sumawee to ri rara ncou-na. Madaa ntotopa sanga rapoposanga-ra.”
26 “Jadi nemo maeka komi ri manusia. Tado naria nuanu to niwunika, tado rapopakalioka, pade tado naria nuanu nipontoliro tado rapopanguncanika. 27 Nuapa to niuli-Ku si komi to tado nironge nu tou, kana mi-uli ri ngayo nu tou dea. Pade nuapa to nitewei-Ku ri talinga-mi, kana mi-parata ri tou dea. 28 Nemo maeka komi si sira to kawule mamala mopatesi koro, agiana tado nakuasa mopatesi inosa. Kaekamo komi ri Allatala to nakuasa mopatesi koro bo inosa-mi ri rara apu naraka.
29 Rombaa tonci rone mamala raoli ante sampeka mata doi to nakodi mpuu. Noudamo iwee tado namo sambaa mpuu to manawu ri tana ande tado napodota nu Tuama-mi. 30 Kadea nu wulua ri woo-mi mbii nibila puramo. 31 Ee-mo sabana, nemo maeka komi! Apaa neliupa pampotowe komi nu Allatala pade tonci-tonci rone ee.
32 Yema-yema mangaku ri ngayo nu tou dea bakote ia topantutu-Ku, Yaku mbii mampangaku-ya ri ngayo nu Tuama-Ku ri suruga. 33 Agiana yema-yema mesapu ri ngayo nu tou dea bakote ia topantutu-Ku, Yaku mbii kana mampesapuka-ya ri ngayo nu Tuama-Ku ri suruga.”
I Yesus nangkeni pombe'ewa
Beiwa dala mantutu i Yesus
34 “Nemo mi-uli bakote i Yaku nangkeni posingkabelo ri dunia ei. Tado nangkeni posingkabelo-Ku, agiana nangkeni pombe'ewa. 35 Bunturu nu kamei-Ku, ngana baleilo mangewa tuama-na, ngana bangkele mangewa tina-na, pade mania bangkele mangewa matua-na bangkele. 36 Pade to majadi bali bete, tou ri rara ncou dodo.
37 Tou to nampotowe tuama-na ba tina-na neliu lako ri pampotowe-na Ku, tado masipato majadi to pantutu-Ku. Iwee mbii-da tou to nampotowe ana-na baleilo ba ana-na bangkele neliu lako ri pampotowe-na Ku, tado masipato-ya majadi topantutu-Ku. 38 Pade tou to tado madota mosimbu salib-na pade mantutu-Ku tado masipato majadi topantutu-Ku. 39 Tou to madota mampakasalama inosa-na, kana malali inosa-na. Agiana tou to nalali inosa-na sabana nantutu-Ku, ia kana mamparata tuwu liu-liu.”
40 “Tou to nantarima komi, ia mbii nantarima-Ku. Pade tou to nantarima-Ku, nantarima mbii Allatala to nantudu-Ku. 41 Tou to nantarima nabi pade nincani-na bakote tou ee nabi, kana mantarima tombo nu nabi. Pade yema mantarima sadua tou nabelo pade nincani-na bakote tou ee to nabelo, kana mantarima tombo nu tou nabelo. 42 Yema-yema mambei ue, noudamo ue lengi mpuumo kambana ri sadua tou to netowei mpuu ei, apaa ia topantutu-Ku, parisayamo ia kana mantarima tombo-na!”