Porapaika nancambelai sadua toposawu
4:1-20
4
1 Naopu ee,
nopamulamo i Yesus nopatuduki ri soso ntalinti rano Galilea.
Naratamo tou dea nantoleliki-Ya.
Nangkajadika nencawi-Yamo ri saongu duanga to nencowe pade noncunda-Yamo,
pade tou dea ee see nokongkore ri soso ntalinti.
2 Naopu ee nipatuduki-ramo ni Yesus ngila ngayana ante porapaika,
nanguli-Ya:
3 “Ronge!
Nariamo sadua topolida nalou nosawu.
4 Ranca-na nosawu,
naria saganta sawua ee nanawu ri dala.
Pade naratamo tonci notilo sawua ee duu-na naopu.
5 Saganta mbii sawua-na nanawu ri tana nawatua.
Sawua ee nagasi pencubena,
apaa tanana nanipi,
6 agiana neindopa eo,
nabangimo pade namate,
sabana tado nandala larina.
7 Saganta mbii sawua nanawu ri kawoko mporui.
Nalangkopa kawoko ee,
nitabosininamo lolo nu sawua ee nangkajadika tado namala nowua.
8 Saganta mbii sawua nanawu ri tana narudu.
Sawua ee narudu katuwuna,
pade nadeamo wuana,
naria to nowua tolu mpulu,
aono mpulu,
naria mbii saatu ngkani kadeana.”
9 Naopu-Yapa nanguli porapaika ee see,
niuli-Namo:
“Yema notalinga kana meronge!”
10 Bula ni Yesus sadudua-Nadamo,
nipekutana-Yamo nu topantutu-Ya bo sampulu rodua ana guru-Na,
nuapa batua nu porapaika ee.
11 Nesonomo i Yesus:
“Ikomi nipopanguncanikamo ntoliro beiwa Allatala moparenta.
Agiana tou to tado namparisaya Allatala nipatuduki-Na ante porapaika,
12 bona:
Noudamo rakalio oa-ra agiana tado nincani-ra nuapa najadi,
isira namparonge oa,
agiana tado nipetalingai-ra,
bona nemo mogoli-ra ri Allatala pade Allatala moampungi-ra.”
13 Naopu ee niuli-Namo si sira:
“Ande tado mamala komi mopaha batua nu porapaika ei,
beiwamo panguncani-mi batua porapaika-porapaika ntanina?
14 Tou to nosawu ee ia-mo to noparata lolita lako ri Allatala.
15 Sawua to nanawu ri dala najadi porapaika ri tou-tou to namparonge lolita nu Allatala,
agiana Mbagou nu Seta narata pade nangala lolita nu Allatala lako ri rara-ra.
16 Sawua to nanawu ri tana nawatua najadi porapaika ri tou-tou to namparonge lolita nu Allatala,
isira nagasi nantarima ante donu rara.
17 Agiana lolita ee tado nolari ri rara-ra,
singoni-ngoni ngkola nalipomo.
Maratapa kasesaa sabana nantutu lolita nu Allatala,
nipesapuka-ramo Allatala.
18 Sawua to nanawu ri kawoko mporui ee,
najadi porapaika ri tou-tou to namparonge lolita nu Allatala,
19 agiana samata nokantabu pade nampekiri kagana ngkatuwu ri dunia-damo pade madota masugi,
pade dota-dota ntanina nesua ri rara-ra.
Sumawee ee nolawa lolita nu Allatala ri rara-ra,
nangkajadika tado-mo nowua.
20 Sawua to nanawu ri tana narudu najadi porapaika ri tou-tou to namparonge pade nantarima lolita nu Allatala,
isira ee-mo to nowua nadea,
naria tolu mpulu,
aono mpulu,
pade naria saatu ngkani kadeana.”
Porapaika nu pajana pade posuka
4:21-25
21 Naopu ee,
nangulimo i Yesus si sira:
“Yema to nopatuwu pajana pade niladu-na nu batili ba niboli-na riunde nu paletaa?
Tantu tado naria.
Ia kana mamboli pajana ee ri kalangkoana bona mewanta.
22 Tado naria nuanu niwunika,
tado rapopakalio,
pade tado naria nuanu nipontoliro,
tado rapopeumba.
23 Yema notalinga,
kana meronge-ya.”
24 Naopu ee nanguli mbiimo i Yesus:
“Peiraramo nuanu to nironge-mi ei!
Posuka to nipake-mi nosuka tou ntani,
ee mbii rapake nu Allatala mosuka komi,
pade kana meliu ntotopa kadeana.
25 Yema nanguncani pade nantutu lolita nu Allatala,
ratambeika mbii-yapa,
agiana yema to tado madota manguncani pade tado nantutu lolita nu Allatala,
noudamo saodi ra'ala pura loumo lako siya.”
Porapaika nancambelai sawua to natuwu
4:26-29
26 Nanguli mbiimo i Yesus:
“Ande Allatala moparenta majadi Mbagou,
mamala rarapaika ewa to posawu ri lida-na.
27 Noudamo poyo ba kawengina pade noudamo nemata-ya ba naleta-ya,
agiana sawua ee natuwu dodo duu-na nabete.
Ba beiwa dala ngkatuwu nu sawua ee tado nincani-na.
28 Tana ee dodo to nampopowua-ya,
nopamula lako ri kouna,
bulina,
tudu ri wuana.
29 Ande malontopa wuana rasombemo,
apa tempo-namo rapepae.”
Porapaika nancambelai besa nu sesawi
4:30-34
30 Nanguli mbiimo i Yesus:
“Ande moparentamo Allatala,
ante nuapa-ta mamala mampopasimbeika?
Nuapa porapaika rapake moparapaikaya?
31 Ande moparentamo Allatala,
nirapaika ewa porapaika ei:
Besa nu sesawi niala nu tou pade nituda ri tana.
Besa nu sesawi ei neliu kanetena ri dunia.
32 Agiana ande matuwupa besa nu sesawi ei,
ia mbiimo neliu kabetena lako ri tinuda ntanina.
Pade nopanga narumbu nangkajadika tonci-tonci narata nowia podumuara.”
33 Iweemo popatuduki ni Yesus ri tou,
ante ngila-ngaya porapaika ewa ee,
nantutu pampakule-ra nampekiri.
34 I Yesus nampake porapaika oa ande mopatuduki tou-tou ntanina.
Agiana ande ri ana-ana guru dodo-Na,
nipanotosika pura-Na si sira.
Ngolu mpamburu nipopeuntu
4:35-41
35 Kinowiana ee mbii,
niulimo ni Yesus ri ana-ana guru-Na:
“Tumei-tamo mewote ri sambote nu rano.”
36 Jadi nencawimo i Yesus bo ana-ana guru-Na ri rara nu duanga,
pade nipaleisi-ramo tou dea ee see ri soso ntalinti.
Naria mbii isee duanga-duanga ntanina namporoasi-ra newote.
37 Tadopa nasae naratamo ngolu mpamburu.
Pade narata mbiimo balumba notampe duanga-ra pade nencawimo ue,
nangkajadika duanga-ra kemaponu ante ue.
38 Ri guli nu duanga ee,
i Yesus ranca-Na naleta naluru ante namboli woo-Na ri wongko luna.
Nilike-Yamo nu ana-ana guru-Na,
nanguli-ra:
“Guru,
tado niparaduli-Mu,
malome-tamo ei.”
39 Pade nematamo i Yesus,
noparenta ngolu pade balumba ee,
niuliNa:
“Peuntumo,
karoomo!”
Neuntumo ngolu pade namparoomo rano ee.
40 Pade niulikaka-Namo ana-ana guru-Na:
“Nuapa pade naekamo komi?
Nuapa pade tado niparisaya-mi Ku?”
41 Naeka-ramo,
pade nombeulikakaka-ramo:
“Yema gagada tou ei,
pade nangkajadikamo ngolu bo balumba natundu si-Ya.”