I Yesus nowura wao tuwu lako ri to Gerasa
5:1-20
5
1 Naopu ee naratamo i Yesus bo ana-ana guru-Na ri sambote nu rano Galilea,
ri ngata to Gerasa.
2 Pesompo ni Yesus lako ri duanga,
naratamo sadua baleilo to nesuwu lako ri kamboa nu dayoa nampotomuka-Ya.
3 Tou ee nipesua nu wao tuwu pade neari ri dayo.
Tado namo saduaa to namala nosilu-ya,
noupa mampake rante.
4 Naosomo nisilu-ra paa bo pale-na,
agiana rante ee nibotusi oa-na,
pade ase ri paa-na nikotu-na.
Tado-namo sadua tou namala nokakamu-ya.
5 Eo bengina welou tumei ri dayo pade ri bulu,
nongare lako pade notitimbolu koro-na ante watu.
6 Pangkalio-na i Yesus lako ri kakawaoana-dapa nokumbeno-yamo pade notumbukotu ri ngayo ni Yesus.
7 Narimboso mpuu wotu-na nongare:
“Yesus,
Ana nu Allatala To Neliu Mpuu Kalangkona!
Mu kia-ku ei?
Ku perapi si-Ko ri rara sanga nu Allatala,
nemo Mu duasi-ku.”
8 Pade iwee panguli nu tou ee,
sabana i Yesus nangulikaka-ya:
“Wao tuwu,
pesuwu-mo lako ri tou ei!”
9 Pade nipekutana-mo ni Yesus tou ee:
“Yema sanga-mu?”
Nesono tou ee:
“Sanga-ku i Legionb,
apaa nadea-ka.”
10 Nadea ngkani niperapi-na,
bona nemo natudu ni Yesus wao-wao tuwu ee mesuwu lako ri ngamba Gerasa.
11 Najungku isee nadea mpuu boe ranca-ra nangonco kondia-ra ri papa bulu.
12 Nerapi-mo wao-wao tuwu ee si Yesus:
“Tudu-kamo mesua ri boe-boe emei.”
13 Pade nipoiomo ni Yesus.
Nesuwu-mo wao-wao tuwu lako ri tou ee pade nampesua boe-boe ee.
Sumawee boe salambara ee nangani pade nekawantu lako ri papa bulu ri rara nu rano pade nalome pura.
Kadea nu boe ee naria ronjobu mbaa.
14 Jadi nokumbenomo topoewu-topoewu boe ee pade nampopowole kareba ee ri ngata bo ri ngata-ngata kodi riolona isee.
Pade nesuwumo sumawee tou nangkalio kajadia ee.
15 Namei-ramo si Yesus,
pade nikalio-ra tou nipesua nu wao tuwu ee,
noncunda-yamo.
Nipasua-namo powaru-na,
pade nanotomo rara-na.
Nangkalio ee naeka pura-ramo.
16 Tou-tou to nangkalio mata kajadia nu to nipesua nu wao tuwu pade boe-boe ee,
nopatuntu kajadia ee ri tou ntanina.
17 Naopu ee niperapimo nu tou dea ri ngata ee si Yesus bona Na-paleisimo ngamba ee.
18 Tempo ni Yesus nencawi ri rara duanga,
to impia nipesua nu wao tuwu ee nerapi si Yesus,
bona mantutu mamporoasi-Ya.
19 Agiana tado nipoio ni Yesus,
niuli-Na:
“Panculimo-ko ri sou-mu pade ulikaka-mo sumawee sarara-mu nuapa to nipowiakamo-ko ni Pue pade beiwa ntoto towe rara-Na siko.”
20 Nalou-mo tou ee,
pade nopamula-yamo nopatuntu ri ngamba Dekapolisc nuapa to nipowia ni Yesus ri koro-na.
Sumawee tou to namparonge-ya namoleara.
I Yesus nopatuwu nculi ana ni Yairus pade nampakaori sadua bangkele to nikabowosi nu raa
5:21-43
21 Newote nculi mbiimo i Yesus ante ana-ana guru-Na ri sambote nu rano Galilea.
Ri soso ntalinti ee,
nadea tou nasiromu nantikusi i Yesus.
22 Naratamo sadua tou,
sanga-na i Yairus.
Ia ei topangkeni ri sou penombaa to Yahudi ri ngata eed.
Pangkalio-na i Yesus,
notumbukotu-yamo ri ngayo ni Yesus,
23 pade nerapi-yamo ante rara mpuu-na:
“Guru,
ana-ku bangkele nadua ntomo.
Masisiasi mamei-Ko motui-ya,
bona maori ana-ku ee pade tado mamate.”
24 Pade naloumo i Yesus bo i Yairus.
Nadea tou netutu pade nomberuri-ruri ri siawe-Na.
25 Ri olo tou dea ee,
naria sadua bangkele to nadua nikabowosi nu raa sampulu rompaemo kasaena.
26 Sumawee gagu-na naopumo nipopobayari-na dokutoro-dokutoro,
agiana tado naria kabeloa-na,
aga nantambei oa-da kantomo nu dua-na.
27 Naria mbii nironge-na kareba pade nuanu ntanina to nipowia ni Yesus,
ee-mo pade narata-ya nencinolo ri tou dea nalou ri bengo ni Yesus,
pade nokakamu powaru ndoe-Na,
28 apaa ri rara bongo-na:
“Asala ku-kakamu ngkolamo powaru ndoe-Na,
maori-kumo.”
29 Pokakamu-na powaru ndoe ni Yesus,
neuntumo pokabowosia-ya nu raa.
Nirasai-na nawoe-mo rara-na pade naorimo dua-na.
30 Tempo ee mbii nirasai ni Yesus naria kuasa nesuwu lako ri koro-Na.
Neili-Yamo ri tou dea pade nepekutana:
“Yema nokakamu powaru ndoe-Ku?”
31 Ana-ana guru-Na nanguli:
“Nikalio dodo-Mu nadea tou nomberuri-ruri ri siawe-Mu.
Nepekutana mbiidapa-Ko,
yema to nokakamu powaru ndoe-Mu.”
32 Agiana i Yesus neili oa ntiku-ntikuna nangonco tou to nokakamu powaru ndoe-Na.
33 Nincanipa nu bangkele ee nuapa to nadupa ri koro-na,
ante nokasiridi bo naeka,
nalou-yamo notumbukotu ri ngayo ni Yesus pade nanguli sumawee nuanu to nipowia-na pade nuanu nadupa ri koro-na.
34 Namparonge sumaweena ee,
nangulimo i Yesus ri bangkele ee:
“Ana-Ku,
kaparisayaa-mu etumo to nampakaori-ko.
Panculimo-ko ante woe rara-mu,
naorimo-ko.”
35 Bula ni Yesus nololita-dapa,
naratamo basangkia dua tou to nitudu lako ri sou ni Yairus.
Nanguli-ra si Yairus:
“Ana-mu namatemo,
wetumo mupakasesa guru-ta.”
36 Agiana tado nipangala ni Yesus nuanu to niuli-ra,
nanguli-Ya si Yairus:
“Nemo maeka-ko,
parisaya-Kumo.”
37 Pade nolumako oamo i Yesus nalou ri sou ni Yairus,
agiana tado nipaliu-Na namo saduaa tou mantutu-Ya,
wule i Petrus,
i Yakobus pade i Yohanes sarara ni Yakobus.
38 Karata-ra ri sou ni Yairus,
nikalio-ra tou nogesi pade nokeo,
notumangi lako.
39 Pesua ni Yesus ri rara ncou,
niulikaka-Namo tou-tou ee:
“Nuapa nipogesii pade nipokeosimi ei?
Ana ei tado namate,
naleta-yada ei.”
40 Namparonge i Yesus nanguli iwee,
nareke-ramo.
Pade nitudu-ramo ni Yesus mesuwu.
Nikeni-Namo tina tuama nu ana ee ante ana guru-Na to tolu,
nesua ri rara ngkamara paletaa nu ana ee.
41 Nikakamumo ni Yesus pale nu ana ee pade nanguli:
“Talita kume.”
Batuana:
“Ana bangkele,
Ku'ulikakako,
pematamo-ko!”
42 Nematamo ana bangkele ee pade nolumako.
Umuru nu ana ee sampulu rompaemo.
Sumawee tou to nangkalio kajadia ee namoleara.
43 Agiana nitagi mpuu-ra ni Yesus nemo rapopanguncanika tou ntanina nuanu to nadupa nipowia-Na ee.
Pade nitudu-ramo ni Yesus mambeikaka ana ee kondia.