I Yesus nampakabelo batua nu tadulako ri ngata Kapernaum
7:1-10
7
1 Naopu-pa i Yesus nopatuduki sumawee ee ri tou dea, nalou-Yamo ante ana-ana guru-Na ri ngata Kapernaum. 2 Ri ngata ee naria sadua batua nu tadulako Roma to nipotowe mpuu-na. Batua-na ee nadua ntomo pade kemamate. 3 Pamparonge nu tadulako ee kareba ni Yesus, nitudu-namo basangkia dua topangkeni to Yahudi nalou si Yesus nerapi bona mamei-Ya mampakabelo batua-na ee. 4 Narata-rapa si Yesus, niperapi-ramo ante rara mpuu-ra bona Na-tulungi tadulako ee. Nanguli-ra si Yesus: “Tadulako ei masipato Mu-tulungi, 5 apaa ia ei nampotowe-ta to Yahudi pade nampangawa-ka nopatinda sou penombaa-ka.”6 Pade nalou-mo i Yesus noroa ante isira. Mapara marata-ramo ri sou ee, nitudumo nu tadulako ee wega-wega-na mantomunaka i Yesus manguli petetesi-na ewa ei: “Weetumo Mu-pesimbukui mamei ri sou-ku. Tado masipato-ku mantarima-Ko ri sou-ku. 7 Etumo sabana tado masipato-ku mampotomuka-Ko. Jadi weimo parenta-Mu bona maori dua nu batua-ku. 8 Sabana yaku ei to niparenta-kuda, pade ri mpanou-ku naria mbii surodado-surodado to kana matundu ri parenta-ku. Ande ku-tudu sadua surodado: Kou-ko, malou mpuu-yamo, pade ande ku'ulikaka tou ntani: Tumei-ko isei, mamei mpuu-yamo. Pade ande ku-parenta sadua batua-ku: Powiaka-ku ei, napowia mpuu-mo.”
9 Pamparonge ni Yesus lolita ee, namoleara-Yamo. Pade niolole-Namo tou dea to nantutu-Ya ee pade nanguli: “Nangepe mia tou ei. Lako riolo nu sumawee to Israel, tadopa naria nikalio-Ku kaparisayaa to nabete ewa kaparisayaa nu tou ei.”
10 Panculipa nu tou-tou to nitudu ee ri sou nu tadulako ee, nirata-ra batua ee nabelo-mo.
I Yesus nopatuwu mpanculi ana kabilasa ri ngata Nain
7:11-17
11 Tadomo nasae naopu ee, nalou-mo i Yesus ri ngata Nain. Ana-ana guru-Na pade tou dea nalou pura namporoa-Ya. 12 Naratapa i Yesus ri wombo pesuaa ri ngata ee, naria tomate nikowa nu tou nesuwu lako ri ngata ee. Tomate ee sadua ana baleilo, ana sadudua ngkola nu tobalu ri ngata ee. Nadea tou ri ngata ee namporoasi tobalu ee.
13 Pangkalio ni Yesus tobalu ee, natowemo rara-Na pade niuli-Namo: “Nemo mokeo-ko!” 14 Naopu ee nijungkukimo ni Yesus pokowa tomate ee pade nitui-Na. Neuntumo tou to nokowa tomate ee pade nangulimo i Yesus: “Hee, kabilasa, Ku'ulikaka-ko, pembao-ko.” 15 Pade natuwu nculi-mo tomate ee, noncunda pade nopamula-yamo nololita. Naopu ee niwei-yamo ni Yesus ri tina-na.
16 Sumawee tou isee namoleara bo naeka, pade nopamula-ramo nangune Allatala. Nanguli-ra: “Ntano Ia ei sadua nabi bete to nitudumo nu Allatala ri tongo-tongo-ta.” Pade nanguli mbii tou ntanina: “Naratamo Allatala mampakasalama todea-Na.” 17 Pade nowolemo kareba nancambelai i Yesus ri sumawee ngamba Yudea pade ngata riolona isee.
I Yesus pade i Yohanes Topebaptis
7:18-35
18 Ana-ana guru ni Yohanes noparata sumawee kajadia ee si Yohanes. Pade nipokiomo ni Yohanes rodua ana guru-na, 19 pade nitudu-na malou si Pue Yesus bona mampekutana: “Iko-mo to kana marata ewa to nitipa nu Allatala, ba mariadapa tou ntani to kana ka-popea?”
20 Nipomberatakapa nu rodua ana guru ni Yohanes ee i Yesus, nanguli-ramo: “I Yohanes Topebaptis nantudu-ka mampekutana-Ko: Ba Iko-mo tou to kana marata ewa to nitipa nu Allatala, ba mariadapa tou ntani to kana ka-popea?’ ” 21 Tempo ee, i Yesus bula-Na nampakaori nadea tou to nantodosaka ngila ngaya nu dua, pade nowura wao tuwu to nampesua tou pade nampopekalio nadea toburo. 22 Jadi, nisonoi-ramo ni Yesus: “Panculimo komi si Yohanes pade ulikaka-ya nuapa to nironge-mi pade nikalio-mi ei: To buro najadi nekalio, topungku najadi nolumako, to nadua bose najadi naori, to wongo najadi neronge, tomate natuwu mpanculi, pade Kareba Belo lako ri Allatala niparata ri sumawee tou to netowei katuwu-ra. 23 Madonu mpuu-mo tou to tado naronto kaparisayaa-na si Yaku.”
24 Nanculipa suro ni Yohanes rodua ee, nopamulamo i Yesus nololita ri tou dea nancambelai i Yohanes: “Nuapa to nalou nikalio-mi ri tongo mpada bei? Nangkalio sancila kawoko to nowenta niwuru nu ngolu? 25 Pade nuapa to nalou nionco-mi tempo ee? Tantu tado nalou nangkalio tou to nowaru belo. Apaa tou-tou to nowaru belo ewa ee pade to nabelo katuwu-na tado neari ri tongo mpada bei, agiana neari ri sou bete nu mbagou! 26 Nangonco nuapa komi radou? Nangonco nabi? Nakonomo, Ku'ulikaka komi i Yohanes ei neliupa kantomo nu bago-na lako ri nabi ntanina. 27 Apaa i Yohanes eimo to niuli ri rara Buku Nagasa ewa ei:
Kalio, Yaku, Allatala nantudu suro-Ku mampokouluka-Ko,
bona ia mampasadia dala-Mu.
28 Ku'ulikaka komi: Ri dunia ei tado naria tou to neliu kabete nu pangka-na lako si Yohanes Topebaptis. Agiana ande ri poparentaa nu Allatala, sumawee tou to najadi todea-Na neliu-pa bete nu pangka-ra lako si Yohanes Topebaptis. Noudamo to neliu mpuu kakodi nu pangka-na.”
29 Sumawee tou to namparonge lolita-Na ee, pade sumawee topedusu balasitee, nangune Allatala ante nanguli: Ande iweetu wea, nakono mpuuda i Yohanes Topebaptis nitudu nu Allatala pade nuanu to nipepatudukii-na nakono mbii. Apaa natundu-ramo ri dota nu Allatala tempo-ra nibaptis ni Yohanes. 30 Agiana to Farisi pade topande ri Buku Taurat namporou nuapa patuju nu Allatala ri koro-ra, apaa tado nadota-ra nibaptis ni Yohanes.
31 Naopu ee nanguli mbiimo i Yesus: “Ante nuapa Ku-poporapaika tou-tou tempo ei, pade ante nuapa mamala rapopasimbeika-ra? 32 Isira ei ewa rontaguna ngana to noncunda ri potomu. To santagunana nongare ri to santaguna ntanina,
Ikami notawusika komi lalowe, agiana tado nogale-gale komi. Ikami nododia ewa to notumangisi tomate, agiana tado nokeo komi.
33 Tempo ni Yohanes Topebaptis nolayani i Pue riolo-mi, naoso-ya nopuasa pade tado nanginu nuanu to nepakalangu. Agiana niuli-mi: Nipesua nu seta-yada. 34 Naopu ee i Yaku, Ana Manusia, narata mbii, pade Yaku nangkondi bo nanginu ewa tou ntanina. Agiana niulikaka mbii-mi: Kalio! Ia nangkondi pade nanginu ante jumpu-na! Ia mbii nowega ante topedusu balasitee pade tou-tou najeko ntanina.’ 35 Noudamo iwee, kapandea lako ri Allatala nadupa oa kakonona nikalio lako ri inggu nu tou to nantarima.”
I Yesus nilanai nu bangkele najeko
7:36:50
36 Naria sadua to Farisi, sanga-na i Simon, nampagaga i Yesus mangkondi ante ia ri sou-na. Naloumo i Yesus ri sou-na pade noncunda ri ngayo nu meja pangkondia. 37 Ri ngata ee naria sadua bangkele to natuwu ri rara nu jeko apaa nobalu koro-na. Pamparonge-na i Yesus nangkondi ri sou ni Simon, narata-yamo ri sou ee nangkeni sabutolo lana wongi, butolo ee nipowia lako ri watu pualam. 38 Bula ni Simon pade torata-na nangkondi, nameimo bangkele ee nokongkore ri bengo ni Yesus, najungku ri paa-Na nokeo lako apaa nancoso jeko-jeko-na. Ue mata nu bangkele ee natiti nomentasi paa ni Yesus, pade niparisi-na ante wulua-na. Pade niekimo nu bangkele ee paa ni Yesus, nilanai lako-na ante lana wongi ee.
39 Pangkalio ni Simon nuanu to nipowia nu bangkele ee, nanguli-yamo ri rara-na: “Ande nakono mpuu i Yesus ei nabi, Na-ncanida bangkele ewa nuapa to nangkakamu-Ya edou! Bangkele ei to natuwu ri rara nu jeko apaa nobalu koro-na.”
40 Pade nanguli-mo i Yesus si Simon: “Simon, naria nuanu Ku'ulikaka-ko.”
Nesono i Simon: “Ulimo Guru.”
41 Pade nilolitamo ni Yesus porapaika ei: “Naria rodua tou noinda ri topopagoli doi. To sadua noinda alimatu mpeka doi salaka, pade to sadua mbii-na noinda alima mpulu mpeka doi salaka. 42 Apaa tou rodua ee tadomo nipakule-ra nobayari inda-ra ee, nangkajadika ante towe rara-na topopagoli doi ee nopakaopu inda-ra. Yema riolo-ra rodua ee to neliu mpuu pampotowe-na topopagoli doi ee?”
43 Nesono i Simon: “Ande pamparata-ku, to nadea inda-na.”
Nanguli i Yesus si Simon: “Nakonomo pamparata-mu etu.” 44 Ante nangolole lako bangkele ee, niulimo ni Yesus si Simon: “Nikalio-mumo nuapa to nipowia nu bangkele ei! Pesua-Ku ri rara nu sou-mu, tado niwei-mu ue Ku-popoelasi paa-Ku. Agiana bangkele ei noelasi paa-Ku ante ue mata-na pade niparisi-na ante wulua-na. 45 Tempo-Ku nesua ri sou-mu, tado nieki-mu, agiana bangkele ei tado naria peuntua-na nangeki paa-Ku. 46 Tado nilanai-mu woo-Ku ante lana zaituna, agiana ia ei nolanai paa-Ku ante lana wongi. 47 Etumo sabana, Ku'ulikaka-ko jeko-jeko-na to nadea mpuu ee, niampungimo. Apaa nabete mpuu pampotowe-na Ku. Agiana tou to saodi niampungi lako ri jeko-na, saodi ngkola mbii pepotowe-na.”
48 Pade nangulimo i Yesus ri bangkele ee: “Niampungi-Kumo jeko-jeko-mu.”
49 Naopu ee torata-torata ntanina to ranca nangkondi noroa-roa isee nololita ri rara dodo-ra: “Yema ntoto-da tou ei pade namala-yamo nanguli ewa ee! Tado naria saduaa to mamala moampungi jeko nu manusia, sangadina Allatala ngkola.”
50 Agiana nanguli mbiimo i Yesus ri bangkele ee: “Apaa niparisaya-mu Ku-da nipakasalamamo-ko. Koumo-ko ante woe rara.”