Pombepololitaka ante bangkele to Samaria
4
1 Basangkia dua to Farisi namparonge-mo bakote i Yesus nantarima bo nobaptis topantutu-Ya neliu kadeana lako si Yohanes. 2 Bo ee tado i Yesus nebaptis, ana-ana guru-Nada to nebaptis. 3 Nincanipa ni Yesus bakote nirongemo nu to Farisi sumawee nuanu ee, nangkosu-Yamo lako ri ngamba Yudea, pade nanculiki ri ngamba Galilea. 4 Ri polumakoa-Na malou ri Galilea ee, Ia kana moliu ri ngamba Samaria. 5 Jadi narata-Yamo ri saongu ngata ri Samaria, to nisanga Sikhar. Ngata ee najungku ri tana to niwei ni Yakub impia ri ana-na, i Yusuf. 6 Isee naria tiwuwu ni Yakub. Apaa nalenge mpuu i Yesus nolumako, neuntu-Yamo pade noncunda ri soso nu tiwuwu ee. Tempo ee rapa-rapana tinti sampulu rongu poeyona. 7 Ranca ni Yesus noncunda isee, naratamo sadua bangkele to Samaria manombu ue. Nangulimo i Yesus si-ya: “Weikaka-Ku ue Ku-inu.” 8 Tempo ee ana-ana guru ni Yesus nalou ri rara ngata bona mangoli kondia. 9 Nangulimo bangkele to Samaria ee si-Ya: “Beiwa mbii, Iko to Yahudi, yaku ei to Samaria, nuapa pade nerapi ue-Ko si yaku?” (Apaa to Yahudi tado nadota nampogalo to Samaria.) 10 Nisonoi-yamo ni Yesus: “Ande rapana nincani-mu nuapa to niwei nu Allatala ri manusia pade yema Ku to nerapi ue si-ko, natantumo kana mu-perapi ue si Yaku, pade kana Ku weikaka-ko ue to nambei katuwua.” 11 Nangulimo bangkele ee: “Tado naria potombu-Mu Tuama, pade tiwuwu ei nandala mpuu. Lako riumba Mu rata ue to nambei katuwua ee? 12 Totua-ka, i Yakub, nambei tiwuwu ei si kami. Ia dodo mbii nangala ue ni'inu-na lako ri tiwuwu ei, iwee mbii ana-ana-na bo binata ewua-na. Nipekiri-Mu neliupa bete-Mu lako si Yakub?” 13 Nisonoi-yamo ni Yesus: “Tou to manginu ue ei kana mabei mbiidapa wuu-na. 14 Agiana tou to nanginu ue to niwei-Ku tadomo mabei oa wuu-na duuna masae-sae. Apaa ue to niwei-Ku ee kana majadi ue ntumbu ri koro-na, to kana moili oa pade mambeika-ya tuwu liu-liu.” 15 Nanguli-mo bangkele ee si-Ya: “Tuama, weikaka-kumo ue etu, bona tado-mo mabei mbii wuu-ku pade tadomo mamei oa-ku manombu ue isei.” 16 Nanguli-mo i Yesus si-ya: “Koumo-ko, pokiomo baleilo-mu mamei isei.” 17 Nesono mbii-mo bangkele ee: “Tado nobaleilo-ku.” Pade nangulimo i Yesus si-ya: “Nakono nuanu niuli-mu etu, bakote tado naria baleilo-mu. 18 Apaa alima ngkanimo-ko nobaleilo, pade baleilo to namporoa-ko tempo ei, tado baleilo dodo-mu.” 19 Nangulimo bangkele ee si-Ya: “Tuama, nanotomo rara-ku bakote Iko ei nabi. 20 Totua-ka nampenombai Allatala ri bulu ei, agiana i komi to Yahudi nanguli bakote ri Yerusalem-da penombaa nu tou ri Allatala.” 21 Nanguli-mo i Yesus: “Parisayamo lolita-Ku ei. Kana marata tempona tou menomba ri Allatala, tadomo ri bulu ei, pade tado mbii ri Yerusalem. 22 I komi to Samaria nampenombai Allatala to tado nincani-mi, i kami to Yahudi nampenombai Allatala to nincani-ka, apaa kasalamaa neumba lako ri to Yahudi. 23 Agiana kana marata tempo-na, kakono-konona tempo ee naratamo, tou to mpuu-mpuu nenomba ri Tuama, kana mampenombai-Ya ante penini nu Inosa Gasa mantutu pepatuduki to nakono. Penomba ewa ee-mo to nipodota nu Tuama. 24 Apaa Allatala ee Inosa, jadi tou-tou to menomba ri Allatala kana menomba ante penini nu Inosa Gasa mantutu pepatuduki to nakono.” 25 Nanguli mbii-mo bangkele ee si Ya: “Nincani-kuda bakote Mbagou Topepakasalama to niuli mbii i Kristus ee kana marata. Ande marata-Ya, Ia kana mopanotosi ngila ngayana si kami.” 26 Nangulimo i Yesus si-ya: “Yaku-mo i Kristus ee, to ranca nololita ante iko ei.”27 Ranca-ra nololita, naratamo ana-ana guru ni Yesus. Namoleara-ra nangkalio i Yesus nampololitaka sadua bangkele. Agiana tado namo saduaa-ra nampekutana bangkele ee: “Nuapa paralou-mu?” Pade tado mbii naria-ra nampekutana i Yesus: “Nuapa pade nipololitaka-Mu bangkele etu?” 28 Pade nipawiamo nu bangkele ee panombua-na ue isee, pade nalou nesua ri rara ngata nangulikaka tou-tou ri ngata ee: 29 “Kamei komi mangkalio tou to nangulikaka-ku ngila ngaya nuanu to nariamo nipowia-ku. Ba Ia ee-mo Mbagou Topepakasalama.” 30 Jadi nesuwu-ramo lako ri ngata ee pade nalou si Yesus.
31 Puri nu bangkele ee nalou ri rara ngata, nipasurumo nu ana-ana guru-Na i Yesus mangkondi. Nanguli-ra: “Guru, pangkondimo-Ko.” 32 Agiana nesono i Yesus: “Nariada kondia si Yaku to tado nincani-mi.” 33 Namparonge ee, nombepekutanamo ana-ana guru-Na: “Ba naria-da ngoni tou nangkenika-Ya kondia?” 34 Pade nangulimo i Yesus si sira: “Kondia-Ku ee mowia nuapa to nipodota nu Tuama to nantudu-Ku namei ri dunia ei pade mampakaoupu bago to niwei-Na si Yaku. 35 Biasana i komi nanguli: Aopo mbulapa pade maratada tempo mepae. Agiana Ku'ulikaka komi: Penotomo pae ri bonde to narangkunimo, pade mamalamo rapepae. 36 Topepae nopamulamo nantarima tombo-ra pade nopasintobu uli nu pobago-ra. Uli nu pobago-ra ee-mo manusia to kana mamparata tuwu liu-liu. Jadi, toposawu bo topepae mamala madonu singkeingkani. 37 Nakonomo lolita porapaika ei: To saduana nantuda, tou ntanina nampepae. 38 Yaku nantudu komi malou mepae ri bonde to tado nipobago-mi. Tou ntani nantuda ri bonde ee, agiana i komi mangala uli nu pobago-ra.”
39 Kaopuana nadea to Samaria ri ngata ee namparisaya i Yesus apaa namparonge nuanu niuli nu bangkele ee: “Ia nangulikaka-ku sumawee nuanu to nipowia-kumo.” 40 Naratapa tou-tou to Samaria ee si Yesus, niperapi mpuu-mpuu-ramo bona madota-Ya mesei ri ngata-ra. Jadi nesei mpuumo i Yesus ri ngata-ra rarana roeyo kasaena. 41 Nantambei ntotomo kadea nu tou neparisaya apaa nironge dodo-ramo pepatuduki-Na. 42 Pade nanguli ramo ri bangkele ee: “Niparisaya-kamo, tado sabana lako ri nuanu niuli-mu si kami, agiana nironge dodo-kamo lolita-Na, pade nincani-kamo bakote Ia mpuumo Tomampakasalama manusia.”
Nanculi ri Galilea
4:43-45
43 Naganapa roeyo ri ngata Sikhar, nanculimo i Yesus ri Galilea. 44 I Yesus dodomo nanguli bakote sadua nabi tado rabila ri ngata dodo-na. 45 Agiana narata-Yapa ri Galilea, tou-tou isee nosombo-Ya ante donu rara, apaa isira natida ri Yerusalem sinungka nu Eo Bete Paskah, pade nangkaliomo sumawee nuanu to nipowia ni Yesus radou.
I Yesus nampakabelo ana nu pangkabete to nobago ri mbagou
4:46-54
46 Naopu ee nalou mbiimo i Yesus ri ngata Kana, ri ngamba Galilea, ngata powiaa-Na kadupaa nobali ue najadi anggur. Ri ngata ee naria sadua pangka bete nobago ri mbagou. Ana-na nadua ntomo ri ngata Kapernaum. 47 Pamparonge-na bakote naratamo i Yesus ri Galilea lako ri ngamba Yudea, nalou-yamo nampotomuka i Yesus pade nerapi i Yesus malou ri Kapernaum bona mampakabelo ana-na to nadua ntomo pade kemamatemo ee. 48 Nanguli i Yesus ri tou ee: “Ande tadopa mi-kalio kadupaa-kadupaa, tadopa mi-parisaya.” 49 Nanguli-mo pangka bete ee si-Ya: “Tuama, magasimo-Ko mamei, kambatu tadopa namate ana-ku!” 50 Agiana nanguli i Yesus si-ya: “Panculimo-ko, nabelomo ana-mu.” Niparisayamo nu tou ee lolita ni Yesus, pade nanculi-yamo. 51 Ranca-na ri dala-dapa, naratamo batua-batua-na nantomunaka-ya ante kareba bakote nabelomo ana-na. 52 Pade nipekutana-namo batua-batua-na ee tinti sangkia dua nu ana-na ee nabelo. Nesono-ra: “Poeyona iwengi rapa-rapana tinti saongu, nanoumo kapane-na.” 53 Pade nitoramo nu tuama nu ana ee, bakote ri tempo ee mbiimo i Yesus nanguli si-ya: “Nabelomo ana-mu.” Jadi ia ante sumawee tou ri rara ncouna najadi neparisaya si Yesus.
54 Ee-mo kadupaa karongkanina to nipowia ni Yesus ri Galilea tempo-Na nanculi lako ri ngamba Yudea.