Nepakabelo ri eo Peuntua to Yahudi ri wusu Betesda
5:1-18
5
1 Naopu ee naloumo i Yesus ri ngata Yerusalem mantutu susa eo bete to Yahudi. 2 Najungku wombo pesuaa ri rara ngata Yerusalem to nisanga Wombo Bimba, naria saongu wusu to ri basa Ibrani niuli Betesda. Ri wusu ee naria alima kandawari nipowia. 3 Ri kandawari-kandawari ee nadea todua nengkadampa. Naria to naburo, naria to nalope, pade naria mbii to napungku. [Isira sumawee nampopea ue nu wusu ee mogonta. 4 Apaa sangkani-sangkani malaeka ni Pue nesompo ri wusu ee pade nogonta uena. Yema mokoulu ntoto mesompo ri ue tempo nu ue ee mogonta, mabelo pura sumawee dua-na.] 5 Isee naria sadua baleilo tolu mpulu uwalu mpae-mo kasae-na nadua. 6 Nikalio-yamo ni Yesus nengkadampa isee. Nincani-Nada bakote nasae mpuu-yamo nadua. Jadi nipekutana-yamo ni Yesus: “Madota-ko mabelo dua-mu?” 7 Nesonomo tou nadua ee: “Tuama, tado naria tou nangkeni-ku mesompo ri wusu tempo nu uena mogonta. Pade bula-ku malou ri wusu-dapa, bila tou ntanimo nampokoului-ku.” 8 Nanguli-mo i Yesus si-ya: “Pematamo-ko, ongkomo ali-mu pade polumakomo-ko.” 9 Bulawee ee mbii tou ee nabelomo dua-na. Niongko-namo ali-na pade nolumako.Agiana eo ee, eo Peuntua to Yahudi. 10 Ee-mo sabana basangkia dua topangkeni to Yahudi nangulikaka tou to nipakabelo ee: “Eo ei Eo Peuntua. Jadi, tado mamala-ko mosimbu ali-mu.” 11 Agiana nesono tou ee: “Tou to nampakabelo-ku ee see, Ia-mo to nantudu-ku mo'ongko ali-ku pade molumako.” 12 Pade nepekutana-ramo si-ya: “Yema nantudu-ko mo'ongko ali-mu pade molumako?” 13 Agiana tou to lako nipakabelo ee tado nanguncani yema to nampakabelo-ya, apaa nekilipomo i Yesus riolo nu tou dea ee. 14 Naopu ee notomumo i Yesus ante tou ee ri Sou nu Allatala, pade nangulikaka-ya: “Tempo ei nabelomo dua-mu. Nemo mowia jeko oa, bona tado mantodosaka nuanu nadaa ntotopa lako ri dua-mu ee.” 15 Jadi nanculi-mo tou ee pade nanguli ri topangkeni to Yahudi bakote i Yesus-da to nampakabelo-ya. 16 Ee-mo sabana pade nopamula-ramo mampakasusa i Yesus, apaa Ia nampakabelo tou ri eo Peuntua. 17 Agiana nanguli-Ya si sira: “Tuama-Ku nobago oa duuna eo ei, jadi Yaku mbii kana mobago oa.” 18 Bunturu nu lolita-Na ee, sumawee topangkeni to Yahudi nampesimbukui nangonco dala mopatesi-Ya. Apaa tado kawule nancalumbu atura ri eo Peuntua-Ya, agiana Ia mbii nanguli Allatala ee Tuama-Na. Jadi Ia nampasimbei koro-Na ante Allatala.
Posabiti ni Yesus nancambelai koro-Na
5:19-47
19 Nisonoimo ni Yesus tou-tou ee ewa ei: “Kakono-konona Ku'ulikaka komi, Ana tado mamala mowia nuapa-pa ante kuasa dodo-Na. Ia kawule mowia nuanu to nikalio-Na nipowia nu Tuama-Na. Sabana nuapa nipowia nu Tuama, ee mbii to kana rapowia nu Ana-Na. 20 Sabana Tuama nampotowe Ana-Na, pade nopanotosika Ana-Na sumawee to nipowia-Na dodo. Peliu ntotonapa Tuama kana mopanotosika Ana-Na ngila ngaya kadupaa to neliupa kabetena, bona mamoleara komi. 21 Tuama ee nampakatuwu mpanculi tou namate, pade nambeika-ra tuwu liu-liu. Iwee mbiimo Ana nambei tuwu liu-liu ri tou to madota Na-weikaka katuwua. 22 Tuama dodo mbii tado mantangara beyema-yema. Sumawee kuasa bona metangara niwei-Namo ri Ana-Na. 23 Tuama nowia ewa ee bona sumawee tou mampabila Ana ewa pampabila-ra Tuama. Tou to tado nampabila Ana tado mbii nampabila Tuama to nantudu Ana.
24 Kakono-konona Ku'ulikaka komi: Tou to nampeirara lolita-Ku, pade namparisaya Allatala to nantudu-Ku, kana mantarima tuwu liu-liu. Tadomo rasuku-ya, nipakabebasi-yamo lako ri kamatea pade namparata katuwua. 25 Kana marata tempona, kakono-konona naratamo tempona ee, tou to namate kana mamparonge wotu nu Ana nu Allatala. Pade tou to namparonge wotu ee kana matuwu. 26 Nasimbei ewa Tuama to najadi puu nu katuwua, Ia mbii nopajadi Ana-Na puu nu katuwua. 27 Niweikaka-Namo Ana-Na kuasa bona metangara, apaa Ana ee, Ana nu Manusia. 28 Nemo mamoleara komi mamparonge nuanu ei, apaa kana marata tempona sumawee tou to namatemo mamparonge wotu-Na, 29 pade membao lako ri dayo. Tou to nowiamo nuanu to nabelo kana matuwu mpanculi bona mamparata tuwu liu-liu. Agiana tou to nowiamo nuanu to nadaa kana rapatuwu mpanculi bona rasuku.
30 Tado mamala-Ku mowia nuapa-pa mantutu dota dodo-Ku. Yaku kawule metangara mantutu nuanu to nipeparentai nu Tuama. Pobotusi-Ku nanoa, apaa tado nantutu dota dodo-Ku, agiana nantutu dota nu Tuama to nantudu-Ku. 31 Ande rapana Yaku dodo nosabiti koro-Ku, posabiti ee tado mamala raparisaya. 32 Agiana naria tou ntanina to nambei posabiti nancambelai-Ku. Tuama-Kuda toposabiti ee, pade nincani-Ku bakote posabiti-Na nakono. 33 Nitudu-mimo tou malou si Yohanes, pade niwei-namo posabiti to nakono nancambelai-Ku. 34 Yaku tado namparalou posabiti lako ri manusia, agiana mampopatora komi bakote nuanu to niuli ni Yohanes ee nakono bona rapakasalama komi. 35 I Yohanes ee ewa poindo to nampopewanta kabaasana. Agiana nadonu singoni ngkola komi nantarima pewantana ee. 36 Agiana naria posabiti ntani nancambelai-Ku to neliupa karosona lako ri posabiti ni Yohanes, ee-mo bago to niwei nu Tuama si Yaku. Bago ee-mo to nipowia-Ku tempo ei, to nopadupa bakote Tuama-da to nantudu-Ku. 37 Pade Tuama to nantudu-Ku ee mbii nambei posabiti nancambelai-Ku. Tadopa naria nironge-mi wotu-Na ba nangkalio lence-Na. 38 Lolita-lolita-Na tado niboli-mi ri rara-mi, apaa tado niparisaya-mi Ku to nitudu-Na. 39 I komi nampeguru isi nu Buku Nagasa apaa niuli-mi ri rara Buku Nagasa ee i komi kana mamparata tuwu liu-liu. Agiana noudamo Buku Nagasa ee nambei posabiti nancambelai-Ku, 40 tado nadota komi namei si Yaku bona mamparata tuwu liu-liu.
41 Yaku tado namparalou pebila lako ri manusia. 42 Agiana nincani-Kuda rara-mi, bakote tado mpuu naria towe-mi ri Allatala. 43 Yaku narata ante kuasa nu Tuama-Ku, tado nadota komi nantarima-Ku. Agiana ande tou ntani marata ante kuasa dodo-na, nadota komi nantarima-ya. 44 Beiwamo kamala-mi mamparisaya-Ku, ande i komi aga mangonco pebila lako ri manusia? Tado nadota komi nampesimbukui mangonco pebila lako ri Allatala to Sadua ngkola ee. 45 Nemo mi-uli Yaku kana mampomasala komi ri ngayo nu Tuama. To kana mampomasala komi ee i Musa to nisarumaka-mi ee. 46 Ande niparisaya-mi i Musa, i komi kana mamparisaya-Ku, apaa nuanu to nitulisi ni Musa ee nuanu nancambelai-Ku. 47 Agiana ande tado niparisaya-mi nuanu to nitulisi ni Musa, beiwamo kamala-mi mamparisaya nuanu to niuli-Ku?”