Pololita ante i Nikodemus
3
1 Naria sadua to Farisi nisanga i Nikodemus. Ia ee sadua panakoulu nu topantutu agama Yahudi. 2 Namei-yamo kawengina si Yesus pade nanguli: “Guru, nincani-kada bakote Iko to nitudu nu Allatala. Apaa tado namo saduaa to mamala mowia kadupaa ewa to nipowia-Mu, ande Allatala tado mamporoasi-ya.” 3 Nesono i Yesus: “Kakono-konona Ku'ulikaka-ko, tado namo saduaa to mamala majadi todea nu Allatala, ande tado rapoanaka mpanculi-ya.” 4 Nanguli-mo i Nikodemus si-Ya: “Beiwa mbii to natoualumo rapoanaka mpanculi? Mamala-ya mesuaki mpanculi ri rara ntei nu tina-na, pade rapoanaka mpanculi?” 5 Nesono i Yesus: “Nakono mpuu-da lolita-Ku ei. Ande tou tado rapoanaka lako ri ue bo lako ri Inosa Gasa, tou ee tado mamala majadi todea nu Allatala. 6 Manusia natuwu ri dunia ei sabana nipoanaka nu totua-na. Agiana katuwu nabou najadi lako ri kuasa Inosa Gasa. 7 Jadi nemo mamoleara ande Ku'uli: I komi sumawee kana rapoanaka mpanculi. 8 Ngolu newuru riumba kadota-na mewuru. I kita aga kawule namparonge sorona, agiana tado nincani-ta lako riumbaya narata pade riumba kalouaana. Iwee mbiimo ante tou to nipoanaka nu Inosa Gasa.” 9 Nesono i Nikodemus: “Beiwa pade majadimo nuanu ee?” 10 Nesono i Yesus: “Iko ei guru nto Israel, nuapa pade tado nincani-mu? 11 Kakono-konona Ku'ulikaka-ko: I kami nololita nancambelai nuanu to nincani-ka, pade i kami nosabiti kawule nancambelai nuanu to nikalio-ka, agiana tado nadota komi nantarima nuanu to nisabiti-ka. 12 Niulikaka-Ku komi nuanu to najadi ri dunia ei, tado niparisaya-mi. Beiwamo pamparisaya-mi ande Ku'ulikaka komi nuanu to najadi ri suruga? 13 Tado namo saduaa to naria-yamo nentode ri suruga, sangadina Ia to nesompo ri dunia lako ri suruga, ee-mo Ana Manusia.14 Nasimbei ewa pampakalangko ni Musa ule ngkala ri sampole kou ri tongompada bei, iwee mbii Ana Manusia kana rapakalangko, 15 bona sumawee tou to mamparisaya-Ya mamparata tuwu liu-liu. 16 Apaa nabete mpuu towe rara nu Allatala ri manusia ri dunia ei, nangkajadika-Ya nambei Ana-Na to sadudua ngkola ee, bona butu dua tou to namparisaya Ana-Na ee tado maropu, agiana kana mamparata tuwu liu-liu. 17 Apaa Allatala nantudu Ana-Na namei ri dunia, tado bona mosuku dunia ei, agiana bona mampakasalama dunia. 18 Tou to neparisaya si-Ya tado rasuku. Agiana tou to tado neparisaya nibotusimo nu Allatala suku-na, apaa tado niparisaya-na Ana nu Allatala to sadudua ee. 19 Ana nu Allatala narata ri dunia ewa kabaasa to nampawanta kadedia, agiana manusia nisuku sabana nipobelo-rapa kadedia pade kabaasa, apaa inggu-ra nadaa. 20 Butu dua tou to nowia nuanu nadaa, nampodaa kabaasana. Tado nadota-ra namei ri kabasaana, bona nuanu nadaa to nipowia-ra tado manoto rakalio. 21 Agiana tou to nowia dota nu Allatala, namei ri kabaasana bona manoto rakalio bakote nuanu to nipowia-ra ee nantutu dota nu Allatala.”
Posabiti ni Yohanes nancambelai i Yesus
3:22-36
22 Naopu ee naloumo i Yesus ante ana-ana guru-Na ri ngamba Yudea. Natida-Yamo isee noroa ante isira pade nebaptis. 23 Tempo ee i Yohanes mbii nebaptis ri Ainon, to najungku Salim, apaa isee nadea ue, pade tou-tou namei isee bona rabaptis. 24 Tempo ee tadopa nitarungku i Yohanes.
25 Naria basangkia dua ana guru ni Yohanes nombebili ante sadua to Yahudi nancambelai ada mampakarawa koro mantutu atura nu agama Yahudi. 26 Nalou-ramo si Yohanes pade nanguli: “Guru, nitora-mu dapa tou to noroa ante iko ri sambote ue Yordan, to nitudoka-mu ka ee mpia? Tempo ei Ia mbii nebaptis, pade sumawee tou nalou si-Ya.” 27 Nisonoira-mo ni Yohanes: “Manusia tado mamala mamparata banuapa-pa ande tado raweikaka-ya nu Allatala. 28 Nironge dodo-mi ku-mo nanguli bakote yaku tado Mbagou Topepakasalama. Yaku kawule nitudu mampokoului-Ya. 29 To mamponcambokoka pongante bangkele aga pongante baleilo. Wega nu pongante baleilo kawule mokongkore ri siawe-na pade mamparonge. Nadonu mpuu-ya tempo-na namparonge wotu nu pongante baleilo. Iwee mbii ante yaku. Tempo ei nadonu mpuu-ku. 30 Ia kana mantambei rabila, agiana yaku tado gagamo rabila.
31 Ia to narata lako ri suruga neliu lako ri sumawee tou. To narata lako ri dunia noinggu ewa tou-tou to naria ri dunia ei, pade nololita nancambelai sumawee nuanu najadi ri dunia ei. Ia to narata lako ri suruga, mpuu-mpuu neliu lako ri sumawee tou ntani. 32 Ia nampololita nancambelai nuanu to nikalio bo nironge-Na ri suruga, agiana nadea mpuu tou to tado namparisaya lolita-Na ee. 33 Tou to namparisaya lolita-Na ee, nampangaku bakote Allatala nakono. 34 Tou to nitudu nu Allatala, noparata lolita nu Allatala, apaa Inosa Gasa niweikaka pura-Yamo. 35 Allatala, Tuama-ta nampotowe Ana-Na, pade nambeimo sumawee kuasa ri Ana-Na. 36 Tou to neparisaya ri Ana ee kana mamparata tuwu liu-liu. Agiana tou to tado natundu ri Ana ee tado mamparata tuwu liu-liu. Sodo nu Allatala kana maria oa si-ya.”