Yema to nabete ri rara Poparentaa nu Allatala
18:1-5
18
1 Tempo ee naratamo ana-ana guru ni Yesus namei si-Ya pade nepekutana: “Yema-da to nabete ntoto ri rara Poparentaa nu Allatala?” 2 Namparonge ee, nipokiomo ni Yesus sadua ngana kodi, pade nipopokongkore-Na ri ngayo-ra. 3 Pade nangulimo i Yesus: “Parisayamo! Ande tado mi-bali inggu-mi pade majadi ewa ana kodi ei, tado mamala komi majadi todea ri rara Poparentaa nu Allatala. 4 Yema to mampakaede rara-na pade majadi ewa ana kodi ei, ia-mo to nabete ri rara Poparentaa nu Allatala. 5 Yema mantarima ana kodi ewa ei sabana peparisaya-na si-Yaku, ia mbii nantarima-Ku.”Yema to nampakapusa tou
18:6-11
6 “Yema mampakapusa sadua lako ri ngana-ngana kodi ei mangkajadika tado-mo meparisaya-ra si Yaku, nabeloupa ande watu pogilia raloe ri tambolo-na pade ralome-yamo ri rara ntasi. 7 Maweso mpuumo dunia ei sabana nowia ngila ngaya nuanu to mampakajeko tou. Maria ami-da nuanu ewa ee oa, agiana mawesomo tou to nowia ewa ee.
8 Ande pale-mu ba paa-mu mampowia-ko majeko, tompomo pade tadiakamo. Nabeloupa-ko matuwu ante Allatala tado maria pale-mu bo paa-mu sambira, aga nemo ante pale-mu bo paa-mu rombira-ko ratadiaka ri rara nu apu naraka. 9 Pade ande mata-mu mowia-ko majeko, sungkimo pade tadiakamo. Nabeloupa-ko momata sambira matuwu ante Allatala, aga nemo momata rombira-ko ratadiaka ri rara apu naraka.
10 Jadi pakabelo-belo! Nemo mampandaente noudamo sadua ngkola lako ri ngana-ngana kodi ei. Apaa malaeka-malaeka to nojagai-ra naria oa ri ngayo nu Tuama-Ku ri suruga. 11 [Sabana Ana Manusia narata bona mampakasalama tou to napusa.]”
Porapaika nancambelai bimba to naronto
18:12-14
12 “Beiwa pamparata-mi? Rapana maria sadua tou to naria bimba-na saatu mbaa kadeana, pade sambaa lako ri bimba-na ee maronto, nuapamo to kana napowia nu tou ee? Natantu-mo ia kana mampawia bimba to siompulu sasio mbaa ee ri bulu pade malou mangonco to naronto ee. 13 Pade ande narata nculi-pa bimba ee, madonu ntoto-pa rara-na mangkalio bimba-na to sambaa ee pade mangkalio bimba to siompulu bo sasio to tado naronto ee. 14 Iwee mbiimo Tuama-mi ri suruga. Tado madota-Ya ande sadua lako ri ngana kodi ei mapusa peparisaya-na.”
Pepatuduki ri sarara mboto
18:15-20
15 “Ande sarara-mu mowia jeko siko, koumo-ko siya pade ulikaka-yamo kasalaa-na. Powiamo ee ante bongo-bongo riolo-mi rodua ngkola. Ande natarima lolita-mu, mabelo mpanculi posarara-mi. 16 Agiana ande tado, kenimo sadua ba rodua tou ntanina mosabiti lolita-mu ante ia. Powiamo ewa ee apaa ri rara Buku Nagasa naria nitulisi: Ande maria tou rapangaduka, kana maria rodua ba totolu sabi bona manoto bakote mpuu-mpuu nasala-ya. 17 Ande tado na-tarima pepatuduki nu tou-tou ee, ulimo nuanu ee ri todea nu Allatala. Pade ande tado mbii madota-ya mantarima pepatuduki nu todea nu Allatala ee, ia kana rareke nasimbei ewa tou to tado nanguncani Allatala bo ewa topedusu balasitee to nadaa.” 18 “Bona mi-ncani, nuapa to nipetagii-mi ri dunia, ee mbii nipetagii ri suruga. Pade nuapa to nipomakono-mi ri dunia, nipomakono mbii ri suruga. 19 Pade bona mincani mbii, noudamo rodua ngkola komi, ande mosaongu rara komi mosambaya merapi banuapa-pa, nuanu to niperapi-mi ee kana raweikaka komi nu Tuama-Ku ri suruga. 20 Apaa riumba maria tou mosintobu sabana Yaku, noudamo kawule rodua ba totolu, kana maria-Ku ri tongo-tongo-ra.”
Porapaika nancambelai peampungi
18:21-35
21 Naopu ee namei-mo i Petrus si Yesus pade nepekutana: “Pue, ande sarara-ku mowia jeko si yaku, sangkia ngkani-ku kana moampungi-ya? Papitu ngkani?” 22 Nesono i Yesus: “Tado, tado kawule papitu ngkani, agiana pitumpulu ngkani pitu ngkani!
23 Apaa Poparentaa nu Allatala tarina ewa to niuli ri rara nu porapaika ei: Sadua mbagou madota mopabila inda nu batua-batua-na. 24 Tempona nopamula-yamo moparesa, nikenimo si-ya sadua batua to noinda nadea mpuu. 25 Agiana tadomo nipakule nu batua ee nobayari inda-na. Jadi nipetuduimo nu mbagou ee bona batua ee rabalu sangkani-ngkani ante ana-na bo bangkele-na, ante sumawee gagu-na bona rapopobayari inda-na. 26 Pade notumbukotumo batua ee ri ngayo nu mbagou ee pade nerapi: Pancabara-ko ulu maradika. Sumawee inda-ku kana ku bayari. 27 Natowemo rara nu mbagou ee si-ya, nangkajadika nipakaopu pura-namo inda nu batua ee.
28 Tempo nu batua ee nesuwu ri sawalikuna, nipotomu-namo roa-na sadua batua mbii, to noinda saatu dinar siya. Nisoko-namo roa-na ee, nibaga-na, pade nanguli: Bayari sumawee inda-mu! 29 Pade notumbukotumo roa-na ri ngayo-na, pade nerapi: Pancabara-ko ulu abi, sumawee inda-ku kana kubayari! 30 Agiana batua ee tado nadota nantarima perapia nu roa-na ee, aga nipasua-na ri rara ntarungku-da roa-na ee duuna naopu sumawee inda-na nibayari-na.
31 Pangkalio nu batua-batua ntanina kajadia ee, nentuumo rara-ra, pade nalou-ramo nopasibali kajadia ee ri mbagou. 32 Namparonge pangadua-ra ee, nipokiomo nu mbagou batua nadaa ee pade nanguli si-ya: Batua to nadaa! Kawule ante perapia ngkola-mu, sumawee inda-mu nipakaopu-kumo. 33 Nuapa pade tado natowe rara-mu ri roa-mu, ewa yaku natowe rara-ku siko? 34 Nasodo mpuu mbagou ee. Batua to nadaa ee nipasua-na ri rara ntarungku bona ranampa duuna maopu sumawee inda-na nabayari.”
35 Nipakaopumo ni Yesus porapaika-Na ee ante nanguli: “Iwee mbiimo to kana napowia nu Tuama-Ku ri suruga si komi, ande tado madota komi moampungi sarara-mi ante rara mpuu-mi.”