Porapaika nancambelai bimba to naronto
15:1-7
15
1 Sauatu eo, nadea topedusu balasitee pade tou-tou najeko, narata si Yesus bona mamparonge lolitaNa. 2 To Farisi pade to pande-topande ri Buku Taurat nopamula-ramo nokangua. Nangulira: “Hi, Tou ei nantarima tou-tou to najeko pade nangkondi noroa ante isira.”3 Ee-mo sabana pade nilolitaka-ramo ni Yesus porapaika ei: 4 “Ande riolo-mi ei naria tou nobimbaa saatu mbaa deana, pade marontomo sambaa bimba-na ee, nuapamo to kana napowia? Tantu kana napawia bimba-na to siompulu sasio mbaa ee ri tongo mpada, pade malou mangonco bimba-na sambaa to naronto ee duu-na narata. 5 Ande narata-pa bimba-na ee, madonu mpuu-yamo pade napondamo bimba-na ee ri awinga-na, 6 pade nakeni mpanculi. Karata-na ri sou-na napokiomo wega-wega-na pade tongki-tongki-na pade manguli si sira: ‘‘Kamei-tamo masana-sana, apaa bimba-ku naronto ee nirata nculi-kumo!’ 7 Ku'ulikaka komi: Iwee mbimo ri suruga kana maria kadonua to neliu mpuu ande sadua to najeko mancoro-yamo lako ri jeko-na lako ri tou siompulu sasio to nanoa, to tado namparalou mancoro lako ri jeko.”
Porapaika nancambelai doi to naronto
15:8-10
8“Ba ande naria sadua bangkele nodoi sampulu mpeka doi salakaa, pade maronto-mo sampeka, nuapamo to kana napowia? Tantu ia kana mopatuwu poindo pade mososeini sou-na pade mangonco riumba-umba duu-na narata doi-na ee. 9 Tempona mamparata doi-na ee, napokiomo wega-wega-na ante tongki-tongki-na pade manguli: Nadonu mpuu-kumo apaa nirata nculi-kumo doiku naronto ee. Tumeita-mo masana-sana! 10 Ku'ulikaka komi: Iwee mbii-mo kana madonu mpuu malaeka-malaeka nu Allatala ande maria sadua tou to najeko mancoro lako ri jeko-jeko-na.”
Porapaika nancambelai ngana to naronto
15:11-32
11 Nanguli mbiimo i Yesus: “Nariamo sadua totua noana rodua ana baleilo. 12 Nanguli-mo to kasupua ri tuama-na: Weikaka-kumo bagia-ku lako ri gagu-ta. Pade nibagi mpuu-mo ntuama-ra gagu-ra ri ana-na rodua ee. 13 Naliupa basangkia eo nibalu pura-mo nu ana kasupua ee bagia-na pade nalou-yamo ri ngata to nakawao. Radou-ya nampakaopu doi-na ante natuwu nalousala.
14 Naopu-pa sumawee doi-na, najadi-mo ri ngata ee oro mpei, nangkajadika nopamula-yamo natuwu netowei. 15 Pade nalou-yamo nobago ri sadua tou ri ngata ee, pade nitudu-yamo nu tou ee malou ri bonde mopakondi boe.b 16 Naoro mpuumo tei-na nangkajadika neilu-yamo kena-kena mangkondi kondia-nu boe-boe ee. Noudamo napepa mpuu oro nteina, tado-namo saduaa tou to nambeikaka-ya kondia.
17 Kaopuana nanoto-mo rara-na pade nanguli-yamo: “Tou-tou to nobago ri tuama-ku nadea mpuu kondia-ra, agiana yaku isei kemamate maoro. 18 Kana malou-ku manculi ri tuama-ku, pade manguli siya: Tuama, najeko-kumo ri Allatala pade siko. 19 Tado-mo masipato-ku rauli ana-mu. Pajadi-kumo sadua batua-mu.” 20 Pade nalou-yamo nanculi ri tuama-na.
Nakawao-dapa lako ri sou-na, nikalio-yamo nu Tuama-na. Ante towe rara ntuama-na, nokukumbeno-yamo nampotomuka-ya, pade nokalipui bo noeki-ya. 21 Nangulimo ana ee ri tuama-na: ‘‘Najeko-kumo ri Allatala pade si-ko. Tado-mo masipato-ku rauli ana-mu.”
22 Agiana nipokiomo ntuama-na batua-batua-na pade nanguli: ‘‘Kagasi! Alaka-ya powaru to nabelo ntoto, pade pasuaka-ya. Pasua-mo sinci ri karawe-na, pade pasuaka-ya sapatu ri paa-na. 23 Maopu ee alamo ana nu japi to narudu pade sambale-mo. Ikita kana mangkondi pade masana-sana. 24 Sabana ana-ku ei namate-yamo agiana natuwu nculi, naronto-yamo agiana nirata nculi!” Pade nopamula-ramo nosusa.
25 Tempo ee ana-na ulumbua sintou-na ri bonde. Nanculi-yapa pade najungku ri sou-na, nironge-namo wotu nu lalowe pade dodia ntopogale-gale. 26 Pade nipokio-namo sadua lako ri batua-batua-na, pade nepekutana: ‘‘Nuapa-da to nipowia ri sou edou?” 27 Nesono batua ee: ‘‘Tuei-mu nanculi-mo! Pade tuama-mu netudu mosambale ana japi to narudu, apaa nanculi nasalama-mo ana-na to naronto!”
28 Pade nasodo mpuu-mo ana ulumbua ee, nangkajadika tado-mo nadota-ya nesua ri sou. Pade nesuwu-mo tuama-na noena-ya bona mesua ri sou. 29 Agiana niuli-na: ‘‘Nompaeka-kumo nobago santongo mate si-ko tuama. Tado-namo sangkania-ku nampabili parenta-mu tuama. Nuapa-mo niweikaka-mu ku? Namo sambaa kebe neweikaka-mu ku bona masana-sana ante wega-wega-ku tado ntoto! 30 Agiana ana-mu lako narata etu to nampakaopumo gagu-mu ante bangkele to nadea jeko-na, ntano nanculi-yapa nisambaleka-mu ana japi to narudu-yada.’