I Yesus nepakabelo mbiimo ri Eo Peuntua to Yahudi
14:1-6
14
1 Sauatu ri Eo Peuntua nto Yahudi naloumo i Yesus nangkondi ri sou nu topangkeni to Farisi. Isee tou-tou nangkamata mpuu-mpuu i Yesus. 2 Pade naratamo sadua to nengkamba paa bo palena namei si Yesus. 3 Pade nepekutana-mo i Yesus ri topande-topande ri Buku Taurat ante to Farisi isee: “Mantutu atura nu agama-ta, mamala-da mampakabelo to dua ri Eo Peuntua ba tado?” 4 Topande-topande ri Buku Taurat bo to Farisi isee nalino pura. Pade nikakamu-Namo pale nu to dua ee, nipakabelo-Na pade nitudu-Na malou. 5 Naopu ee nanguli-mo i Yesus ri tou-tou isee: “Ande sadua lako si komi naria sadua ana-na ba saongu japi-na to nanawu ri rara nu tiwuwu ri Eo Peuntua, tantu kana naore ana-na ee ba japi ee noudamo eo ee Eo Peuntua.”6 Agiana tado-namo sadua to namala nampabili i Yesus nancambelai nuanu ee.
Poncundaa to nibila pade poncundaa to tado nibila
14:7-11
7 Apaa nikalio ni Yesus, naria torata-torata to nampelisi moncunda ri poncundaa to nibila, niuli-Namo porapaika ei si sira: 8 “Ande ikomi rakasowai malou ri susa ponikaa, nemo malou moncunda ri poncundaa to nibila. Sabana nemo-nemo maria sadua tou ntanina to nelabi-pa pampabila-ya nikasowai mbii, 9 nangkajadika tumpu sou to nangkasowai komi rodua ee, kana marata si-ko pade manguli: Merapi ampu, poncundaa ei nipasadiaka-mo torata etu. Pade ante eya-mu maloumo-ko moncunda ri poncundaa ri bengo ntoto-na. 10 Etumo sabana, ande ikomi rakasowai, pelisi-mo poncundaa to ri bengo ntoto-na, bona tumpu sou ee kana marata pade manguli siko: Abi, tumei-ko moncunda ri ngayona semei. Ante ee-mo komi nibila ri ngayo nu sumawee torata ntanina. 11 Sabana butu dua tou to malangko rara-na kana rapakarede, agiana to mampakarede rara-na kana rapakalangko.”
Yema to kana rakasowai
14:12-14
12 Pade nangulimo i Yesus ri tumpu sou ee: “Ande iko mangkasowai tou mangkondi poyona ba mangkondi kawengina, nemo mangkasowai wega ba sarara ngkoro, ba sarara-sarara ntanina, ba tongki-mu to nasugi. Apaa ngoni isira kana mangkasowai mbii-ko, pade ante ee-mo iko nantarima-mo balasia nu parabuata-mu. 13 Agiana, ande iko mowia susa, kasowaimo topetowei, to tado nasingkama katuwuna, topungku, pade toburo. 14 Iko kana ratiroi, sabana tou-tou etu tado mamala mobalasi kabelo-mu. Kabelo-mu etu kana nabalasi nu Allatala ri tempo-na tou-tou to nakono rapatuwu mpanculi lako ri kamatea.”
Poparapaika nancambelai tou-tou to notance
14:15-24
15 Tempo nu sadua tou to nangkondi noroa-roa isee namparonge lolita ni Yesus, nangulimo tou ee: “Norasi mpuu-mo tou to kana mangkondi moroa ante Allatala ri rara Poparentaa nu Allatala ngoni!”
16 Agiana nanguli i Yesus ri tou ee: “Sauatu tempo naria sadua tou nowia susa bete pade nangkasowai tou dea. 17 Mapara rapamula-mo susa, tou ee nantudu batua-na malou ri to nikasowai ee pade manguli: ‘Tumei-tamo, nasadia puramo sumawee-na.’ 18 Agiana isira sumawee, sadua-sadua neranga mpale. To pokoulu-na nanguli ri batua ee: Yaku lako naopu nangoli tana, pade kana malou moparesa. Merapi ampu-ku. 19 Tou ntani-na nanguli: Yaku ei lako naopu nangoli alima pasa japi, pade madota mampesoba-ra ku-pake. Merapi ampu-ku. 20 Tou ntani mbiina nanguli: Yaku ei lako kaopu-ku noncamboko bou, ee-mo sabana tado mamala-ku tulou.
21 Nanculimo batua ee pade nanguli nuanu ee ri tumpu sou-na. Tumpu sou-na ee nasodo mpuu, pade nanguli ri batua-na: ‘‘Kagasi-moko malou ri dala-dala bete pade ri dala-dala kodi ri ngata ei. Keni-mo tumei topetowei, to tado nasingkama katuwu-na, toburo, pade topungku.”
22 Naopu ee nanguli-mo batua ee: ‘‘Maradika, parenta-mu nipowia-kumo, agiana nadea-dapa poncundaa nakaloa.”
23 Pade nanguli-mo tumpu sou ee: ‘‘Kou-moko ri dala bete pade ri dala-dala kodi ri sawaliku nu ngata ei, pade pasamo tou-tou mamei, bona maponu sou-ku. 24 Sabana Ku'ulikaka-ko: Tado-namo saduaa lako ri tou-tou to nikasowai ee kana mangkondi kondia ri susa-Ku ei!”
Sumawee ngila ngayana kana rapawia ande mantutu i Yesus
14:25-35
25 Nadea tou nolumako sangkani noroa ante i Yesus. Neilimo i Yesus pade nanguli si sira: 26 “Ande tou to mamei si Yaku, agiana neliupa pampotowe-na tina-na, tuama-na, bangkele-na, ana-ana-na, sarara-sarara-na, pade koro dodo-na, tado mamala-ya majadi topantutu-Ku. 27 Tou to tado madota mosimbu salib-na pade mantutu-Ku, tado mamala majadi topantutu-Ku.
28 Ande maria sadua lako riolo-mi madota mopatinda saongu menara, tantu kana moncunda ncala-ya ulu mopabila ongkosona bona na-ncani ba magana-da doi-na mampakaopu powia menara ee ba tado. 29 Sabana nemo-nemo ngoni tado mamala na-pakaopu menara ee, bo-ee pandasina nipowiamo, mangkajadika sumawee tou to nangkalio pobagoa-na ee kana mangele-ya. 30 Isira kana manguli: “Hai, tou ei nopatinda, agiana tado namala nipakaopu-na.’
31 Ba, ande sadua mbagou to naria sampulu njobu surodado-na madota moiwali ante mbagou ntanina to naria rompulu njobu surodado-na, tantu mbagou ee kana moncunda ncala motimba ba naroso-yada mangewa bali-na ee. 32 Ande nancani bakote tado naroso-ya, tantu tempo nu bali-na ee makawao-dapa, kana natudumo suro-na bona merapi mosingkabelo.” 33 Kaopuana nangulimo i Yesus: “Iwee mbimo ante ikomi. Tado-namo saduaa lako si komi mamala majadi topantutu-Ku, ande ia tado mamala mampawia sumawee nuapapa-na.”