Pogaa
19:1-12
19
1 Naopu-pa i Yesus nanguli sumaweena ee, neongko Yamo lako ri Galilea nalou ri ngamba Yudea to ri sambote nu ue Yordan. 2 Nadea mpuu tou nantutu-Ya, pade isee-Ya nampakabelo tou to nadua. 3 Pade namei-mo tou-tou to Farisi si-Ya bona mopanawu-Ya. Nepekutana-ramo: “Ande mantutu atura nu agama-ta, mamala-da tou mampogaaka bangkele-na ante ngila ngaya nu tance?” 4 Nesono i Yesus: “Tadopa naria nibasa-mi ri rara Buku Nagasa bakote lako ri paramulana Allatala nopajadi manusia baleilo bo bangkele?” 5 Pade naopu ee nanguli-Yamo: “Ee-mo sabana baleilo kana mampaleisi tina-na bo tuama-na pade mopasangkani ante bangkele-na, bona isira majadi saongu woto. 6 Jadi tado-mo rodua-ra, agiana nosaongu woto-damo. Ee-mo sabana nuanu to nipasangkani-mo nu Allatala tado mamala napopogaa nu manusia.” 7 Pade nepekutana mbiimo to Farisi si Yesus: “Ande iwee-da wea, nuapa sabana i Musa nantudu tou mambei sura pogaa ri bangkele-na to nipogaaka-na?” 8 Nesono i Yesus: “I Musa nampaliu komi mampogaaka bangkele-mi apaa nakaja gaga komi nipatuduki. Agiana lako ri paramulana tado ewa ee. 9 Jadi rongemo lolita-Ku ei: Yema mampogaaka bangkele-na, bo ee bangkele ee tado nobualo pade mampobangkele mbii-yamo bangkele ntani, tou ee nobualo.” 10 Pade nangulimo ana-ana guru ni Yesus si-Ya: “Ande iweeda wea kakajana atura nu mponcamboko, agilounamo tado-mo moncamboko.” 11 Nesono i Yesus: “Tado sumawee tou mamala mantarima lolita-lolita etu, kawule tou-tou nipakatantu nu Allatala. 12 Apaa naria tou tado namala-ya moncamboko apaa iwee ami-mo to nipakatatapuka-ya lako ri pampoanaka-ya. Naria mbii tou tado namala noncamboko sabana nuanu to nipowia nu tou si-ya. Pade naria mbii tou tado noncamboko sabana dota dodo-na, bona mamala-ya mampowia bago nu Allatala. Tou to mampakule mantarima pepatuduki ei, palambaka-yamo mantarima.”I Yesus nantiroi ngana-ngana
19:13-15
13 Naria basangkia dua tou nangkeni ngana-ngana kodi si Yesus bona Na-untu pale-Na ri woo-ra pade mosambayani-ra. Agiana ana-ana guru ni Yesus namposodo tou-tou ee. 14 Pade nangulimo i Yesus ri Ana-ana guru-Na: “Palambaka-mo ngana-ngana etu mamei si-Yaku! Nemo ratagi-ra, apaa tou-tou ewa ei-mo to majadi todea nu Allatala.” 15 Pade niuntumo ni Yesus pale-Na ri woo nu ngana-ngana ee pade nantiroi-ra. Naopu ee nangkosu-Yamo lako isee.
Kabilasa to nasugi
19:16-26
16 Sauatu eo nameimo sadua kabilasa si Yesus. Nanguli-ya: “Guru, nuapa nuanu nabelo to kana ku-powia bona mamala-ku mantarima tuwu liu-liu?” 17 Nesono i Yesus: “Nuapa pade nepekutana-ko si-Yaku nancambelai nuapa to nabelo? Kawule Allatala ngkola-da to nabelo. Ande madota-ko matuwu, iko kana matundu ri parenta-parenta nu Allatala.” 18 Nanguli kabilasa ee si-Ya: “Parenta to umbana ee?” Nesono i Yesus: “Nemo mepatesi, nemo mobualo, nemo mangio, nemo maboa, 19 bila-mo tuama pade tina-mu, pade potowe-mo singkapada manusia-mu ewa pampotowe-mu koro dodo-mu.” 20 Nesono kabilasa ee: “Sumawee parenta etu nitutu pura-kumo, nuapa mbii-pa to raparalou?” 21 Nanguli i Yesus si-ya: “Ande mpuu-mpuuko natundu ri Allatala, koumo-ko mobalu sumawee gagu-mu. Weimo doina ri to netowei, iko kana mamparata gagu ri suruga. Maopu ee, kamaeimo-ko mantutu-Ku!” 22 Namparonge lolita-lolita ee, nanculimo kabilasa ee ante susa rara-na, apaa nadea mpuu gagu-na.
23 Naopu ee nololitamo i Yesus ri ana-ana guru-Na: “Ku'ulikaka komi, nakaja mpuu to nasugi majadi todea nu Allatala. 24 Pade ei mbii-pa to madota Ku'uli si komi: Nagampangi-pa saongu unta mesua ri kamboa nu jaru, pade to nasugi mesua ri Poparentaa nu Allatala.” 25 Pamparonge nu ana-ana guru-Na lolita-Na ee, naingu-ramo, pade nanguli: “Ande iwetu wea, yema-da to mamala masalama?” 26 Niolole-ramo ni Yesus pade nanguli: “Ande ri manusia, nuanu ee tado mamala. Agiana ri Allatala, sumawee kana mamala.”
Tombo mantutu i Yesus
19:27-30
27 Pade nanguli-mo i Petrus: “Kalio, ikami ei nipawia pura-kamo ngila ngayana bona mantutu-Ko. Jadi nuapa-mo to kana ka-tarima?” 28 Nanguli i Yesus si sira: “Parisayamo. Ana Manusia moparenta ante kuasa ngoni tempo nu Allatala mampakabou ngila ngayana. Ikomi topantutu-Ku moparenta moroa-roa ante i Yaku pade moncunda ri sampulu rongkou poncundaa nu mbagou bo mantangara todea Israel, muli nu sampulu rodua ana ni Yakub. 29 Pade butu dua tou to nampaleisimo sou-na, ba sarara-na baleilo, ba sarara-na bangkele, ba tina tuama-na, ba ana-ana-na, ba bonde-na sabana ia nantutu-Ku, tou ee kana mantarima saatu ngkani kadeana. Pade ia mbii kana mantarima tuwu liu-liu.
30 Agiana nadea tou to natepokoulu ngkapuri ei majadi matepopuri, pade to ngkapuri ei natepopuri kana majadi matepokoulu.”