Pogaa
10:1-12
10
1 Naopu ee neongkomo i Yesus lako isee nalou ri ngamba Yudea pade ri ngata sambote nu ue Yordan.
Riumba-umba i Yesus nalou,
nasintobu mbiimo tou dea nantikusi-Ya.
Pade nipatuduki-Na ramo ewa kabiasaa-Na oa ee.
2 Narata mbiimo basangkia dua to Farisi namei si Yesus madota mampanawu-Ya.
Nipekutana-ramo i Yesus:
“Ande mantutu atura nu agama-ta,
mamala sadua baleilo mampogaaka bangkele-na?”
3 Nesono i Yesus:
“Parenta nuapa niweika komi ni Musa?”
4 Nesono-ra:
“I Musa nampaliu baleilo mampogaaka bangkele-na,
asala napowia ncala sura pogaa.”
5 Niulikaka-ramo ni Yesus:
“I Musa notulisi parenta ee,
apaa nakaja gaga komi sumawee to Yahudi nipatuduki.
6 Agiana lako ri pamulana,
tempo nu Allatala nopajadi manusia,
niuli ri lolita-Na,
‘Allatala nopajadi-ra baleilo pade bangkele,
7 etumo sabana sadua baleilo kana mampaleisi tuama ante tina-na pade mopasangkani ante bangkele-na,
8 nangkajadika tou rodua mosaongu woto.’
Bona tado-mo rodua-ra,
aga majadi saongu woto-radamo.
9 Etumo sabana,
nuapa nuanu nipasangkani nu Allatala,
tado mamala napopogaa nu manusia.”
10 Nesua-rapa ri sou,
ana-ana guru-Na nampekutana-Ya nuapa batuana nuanu niuli-Mu ee see.
11 Niuli ni Yesus si sira:
“Yema-yema mampogaaka bangkele-na pade mampobangkele bangkele ntanina,
tou ee nobualosi ri bangkele-na to puu.
12 Iweetu mbii ande bangkele mampogaaka baleilo-na pade mampobaleilo baleilo ntanina,
tou ee mbii nobualosi ri baleilo-na to puu.”
I Yesus nantiroi ngana-ngana
10:13-16
13 Naopu ee naria basangkia dua tou nangkeni ngana-ngana si Yesus,
bona Na-kakamu pade mantiroi-ra.
Agiana ana-ana guru-Na namposodo tou-tou ee.
14 Nangkalio ee,
nasodomo i Yesus pade niuli-Namo ri ana-ana guru-Na ee:
“Palambakamo ngana-ngana etu mamei si Yaku.
Nemo ratagi-ra,
apaa tou ewa isira eimo todea nu Allatala.
15 Ku'ulikaka komi:
Kakono-konona,
yema-yema tado mantarima Allatala ewa inggu nu ngana kodi,
tou ee tado mamala majadi todea nu Allatala.”
16 Naopu-Ya nanguli iwee,
nikalipuimo ni Yesus ngana-ngana ee,
pade nountu pale-Na ri koro-ra pade nantiroi-ra.
To nasugi nakaja mesua ri Poparentaa nu Allatala
10:17-27
17 Ranca ni Yesus nolumako lako isee,
naratamo sadua baleilo nokukumbeno nampoberataka-Ya.
Tou ee notumbukotu ri ngayo ni Yesus pade nepekutana:
“Guru to nabelo,
nuapa ntoto-da kupowia bona mamala-ku mantarima tuwu liu-liu?”
18 Nesono i Yesus:
“Nuapa sabana niulikaka-mu Ku to nabelo?
Tado naria tou nabelo sangadina Allatala ngkola.
19 Nincani-mumo parenta-parenta nu Allatala:
‘Nemo mepatesi,
nemo mobualo,
nemo mangio,
nemo maboa,
nemo mebagiu,
pade mu bila tuama-mu pade tina-mu.’ ”
20 Pade nangulimo tou ee si Yesus:
“Guru,
Sumawee parenta etu nipowia-kumo lako ri kanguraa-ku.”
21 Niololemo ni Yesus tou ee ante towe-Na,
nanguli-Ya:
“Sangayapa nuanu to kana mu-powia.
Malouko mobalu sumawee gagu-mu,
weikakamo doina ri tou netowei,
bona iko kana mamparata gagu ri suruga.
Maopu-ko mowia ee,
mameimo-ko pade mantutu-Ku.”
22 Nironge-napa i Yesus nanguli ewa elouria,
nasuemo rara-na,
pade nalou-yamo ante susa rara-na apaa nadea mpuu gagu-na.
23 Niololemo ni Yesus ana-ana guru-Na,
pade niuli-Namo si sira:
“Nakaja mpuu to nasugi majadi todea nu Allatala.”
24 Ana-ana guru-Na namolearaa namparonge nuapa niuli ni Yesus.
Pade nanguli mbiimo i Yesus:
“Ana-ana-Ku,
nakaja ami majadi todea nu Allatala.
25 Magampangi-pa saongu unta mesua ri kamboa nu jaru pade to nasugi mesua ri Poparentaa nu Allatala.”
26 Nuanu niuli ni Yesus elouria nowia ana-ana guru-Na nakioma,
nangkajadika nombepekutana-ramo:
“Ande iwee,
yemada wea to mamala masalama?”
27 Niolole-ramo ni Yesus pade nisonoi-Na:
“Nuanu to tado mamala napowia nu manusia,
mamala napowia nu Allatala.
Apaa Allatala mamala mowia nuapa-pa.”
Tombo mantutu i Yesus
10:28-31
28 Pade nangulimo i Petrus si Yesus:
“Beiwa ante ikami ei.
Nipawiakamo ngila-ngayana pade nantutu-Ko,
nuapamo kami ka-rata!”
29 Nesono i Yesus:
“Ku'ulikaka komi,
kakono-konona butu dua tou nampaleisi sou-na,
ba sarara-na baleilo,
ba sarara-na bengkele,
ba tina-na ba tuama-na,
ba ana-ana-na,
ba bonde mpuu-namo,
apaa nantutu-Ku pade nampopowole Kareba Belo lako ri Allatala,
30 tou ee kana mantarima melabi-labipa kadeana ri eo ngkapurina,
mantarima mbii-yapa satuu ngkani kadea nu sou-na,
sarara-na baleilo,
sarara-na bangkele,
tina-na,
ana-ana-na,
pade bonde-na.
Agiana ia mbii kana nawesoki nu singkapada manusia.
Pade ri eo ngkapurina ngoni,
tou ee kana mantarima tuwu liu-liu.
31 Agiana nadea tou ngkapuri ei to nibila nu manusia,
ri eo ngkapurina tado nabila nu Allatala.
Pade nadea tou ngkapuri ei to tado nibila nu manusia ri eo ngkapurina kana nabila nu Allatala.”
Popeparonge katolu ngkanina kapepaa ni Yesus
10:32-34
32 Ranca ni Yesus pade ana-ana guru-Na nolumako nalou ri ngata Yerusalem,
i Yesus nolumako nokoulu,
pade naekamo ana-ana guru-Na.
Pade tou-tou to nantutu-ra naeka mbii.
Nipokiomo ni Yesus ana-ana guru-Na pade niulikaka-Na kana maria ngoni nuanu majadi ri woto-Na.
33 Niuli-Na:
“Ronge,
ikita ei malou ri ngata Yerusalem.
Radou ngoni,
Yaku,
Ana Manusia kana rawei ri tobalia-tobalia ri matana pade topande ri Buku Taurat.
Pade kana rasuku-ra duu-na mamate-Kumo,
pade rawei-ra ri tou tado to Yahudi.
34 Pade kana rakanene-ra Ku-mo,
rateilusi-ra,
rasalapea-ra,
pade rapatesi-Kumo.
Agiana ri eo katolu eona kana matuwu mpanculi-Ku.”
Perapia ni Yakobus pade i Yohanes tado meparenta agiana melayani
10:35-45
35 Naopu ee i Yakobus pade i Yohanes ana-ana ni Zebedeus namei si Yesus,
pade nanguli:
“Guru,
naria sangaya nuanu ka-podota Mu powiaka-ka.”
36 Nesono i Yesus:
“Nuapa nuanu mi-podota Ku powiaka komi?”
37 Nesono-ra:
“Ande Iko moparenta ante kakuasa-Mu,
ikami madota moncunda mbira ri ngkana pade mbira ri ngkabeo-Mu,
bona mamala mbii ka-kami moparenta ante Iko meliu lako ri tou ntanina.”
38 Nesono i Yesus:
“Tado nincani-mi nuapa niperapi-mi.
Mi-pakuleda ngoni mantodosaka kapepaa ewa kapepaa to Ku todosaka pade mamate ewa Yaku?”
39 Nesono-ra:
“Ka-pakule.”
Pade nanguli mbiimo i Yesus:
“Mi-todosaka amida kapepaa ewa kapepaa to nitodosaka-Ku,
pade mamate ewa Yaku.
40 Agiana ande manguli yema moncunda mbira ri ngkana-Ku ba mbira ri ngkabeo-Ku,
tado Yaku mobotusi.
Agiana nibotusimo nu Allatala yema-yema to moncunda ri poncundaa ee.”
41 Nirongepa nu sampulu ana-ana guru ni Yesus ntanina perapia ni Yakobus pade i Yohanes,
nasodo-ramo si Yakobus pade si Yohanes.
42 Nipokio pura-ramo ni Yesus,
pade niulikaka-Na:
“Nincani-mida mbagou-mbagou to tado nanguncani Allatala nampobatua todea-na.
Pade sumawee pangka-pangka bete ee noparenta ante seke-ra.
43 Agiana ikomi tado mamala ewa ee.
Pegoliana,
yema madota rapemabose riolo-mi ei,
ia kana madota mi-pobatua.
44 Pade yema to madota majadi panakouluna riolo-mi ei,
kana madota mi-pobatua pura.
45 Sabana Yaku,
Ana Manusia tado marata bona ralayani.
Agiana Yaku narata bona melayani pade mambei inosa-Ku bona mampakasalama tou dea lako ri jeko-ra.”
I Yesus nampakabelo i Bartimeus
10:46-52
46 Naopu ee naratamo i Yesus bo ana-ana guru-Na ri ngata Yerikho.
Neongkomo i Yesus pade ana-ana guru-Na pade todea nantutu-Ya nampawia ngata ee.
Tempo ee naria sadua toburo noncunda ri soso dala nerapi-rapi.
Sangana i Bartimeus,
ana ni Timeus.
47 Pamparonge-na to poliu ee i Yesus lako ri Nazaret,
nongare-yamo:
“Yesus to nipomulika ni Daud,
potowekua-ku!”
48 Pade nadea tou riolo-ra isee nangontika-ya pade nantudu-ya malino.
Agiana neliu ntotopa karimboso mpongare-na:
“Muli ni Daud,
potowekua-ku.”
49 Pade neuntumo i Yesus pade nanguli:
“Pokio-yamo.”
Pade nipokio-ramo tou naburo ee see.
Niuli-ra:
“Karoo-ko.
Iko nipokio ni Yesus,
pokongkore-ko.”
50 Pade toburo ee see niloncu-namo powaru ndoe-na karolapi-na,
pade nagasi-gasi nokongkore nalou si Yesus.
51 Nipekutana-yamo ni Yesus:
“Nuapa dota-mu Ku powiaka-ko?”
Nesono toburo ee:
“Guru,
yaku madota mekalio!”
52 Nangulimo i Yesus:
“Koumo-ko,
apaa niparisaya-mu Ku-da,
nabelomo mata-mu.”
Bulawee ee mbii nekaliomo tou ee,
pade nitutu-namo i Yesus.