I Yesus niwei si Pilatus
Kamate ni Yudas
27:1-10
27
1 Sangkabaa-baa mpisi dapa, sumawee tobalia ri matana pade topangkeni to Yahudi notobu pade nobotusi bakote i Yesus kana rapatesi. 2 Jadi nisilu-ramo i Yesus pade nikeni-ra nalou si Pilatus, Gubernur Roma.3 Panguncani ni Yudas to nampobalu-Ya ee pobotusi bakote rasuku matemo i Yesus, nisoso-namo rara-na. Pade nipopanculi-namo tolu mpulu mpeka doi salaka ee ri tobalia-tobalia ri matana bo ri topangkeni-topangkeni to Yahudi. 4 Pade nanguli-yamo: “Najeko-kumo nampobalu tou to tado nasala, kaopuana nisuku mate-Yamo.” Agiana nesono-ra: “Tado urusia-ka etu. Urusia dodo-mu.” 5 Namparonge ee, nitadiakamo ni Yudas doi ee ri rara Sou nu Allatala, naopu ee nangani-yamo lako isee pade noloe koro-na. 6 Tobalia-tobalia ri matana nantima doi ee pade nanguli: “Doi ei doi sula nu raa. Mantutu atura nu agama-ta, doi ei tado mamala rapasua ri rara nu peti penombaa ri Sou nu Allatala.” 7 Naopu ee nibotusi-ramo, doi ee rapopangoli-ra tana to niuli Tana nu Topowia Kura. Tana ee rapake bona rapajadi dayo nu torata. 8 Ee-mo sabana duuna eo ei, tana ee nisanga “Tana Raa.” 9 Ante nuanu ee, madupamo nuanu to niuli ni nabi Yeremia: “Isira nantarima tolu mpulu mpeka doi salaka, doi ee nipasitujuimo nu to Israel majadi doi pobayari-Ya. 10 Pade doi ee nipopangoli-ra Tana nu Topowia Kura, ewa to nipeparentai ni Pue si yaku.”
I Yesus ri ngayo ni Pilatus
27:11-26
11 Tempo ni Yesus ri ngayo ni Pilatus, Gubernur nu ngamba ee, nipekutana-Yamo ni Pilatus: “Ikomo mbagou nu to Yahudi?” Nesono i Yesus: “Iko dodomo nanguli.”
12 Agiana tempo nu tobalia-tobalia ri matana bo topangkeni-topangkeni to Yahudi namparei i Yesus, tado namo sampamaa nisonoi-Na. 13 Ee-mo sabana pade nangulimo i Pilatus si-Ya: “Tado nironge-Mu sumawee nuanu nireika-ra Ko etu?”
14 Agiana tado namo sampamaa nisonoi ni Yesus, nangkajadika Gubernur ee namoleara mpuu.
15 Najadi kabiasaamo ri butu karamea Eo Bete Paskah, Gubernur kana mampakabebasi sadua to nitarungku mantutu konoa nu tou dea. 16 Ri tempo ee naria sadua tou nitarungku to nakancangaa mpuu. Sanga-na i Yesus Barabas. 17 Jadi, bula nu tou dea notobu, nipekutana-ramo ni Pilatus: “Yema to mi-podota ku-pakabebasika komi? I Yesus Barabas-da ba i Yesus to niuli Kristus-da?” 18 I Pilatus nanguli ewa ee, apaa nincani-namo bakote topangkeni-topangkeni to Yahudi nambei i Yesus si-ya, sabana singki rara-ra. 19 Tempo ni Pilatus noncunda ri Poncunda Potangaraa, nipakatumo nu bengkelena petetesi si-ya: “Nemo mu-galo kara-kara nu tou to tado naria sala-Na etu, sabana Ia etu, nadaa pangipi-ku sambengi.”
20 Agiana tobalia-tobalai ri matana bo topangkeni-topangkeni to Yahudi noasui oa tou dea ee bona merapi si Pilatus bona i Barabas rapakabebasi pade i Yesus rasuku mate. 21 Pade nepekutana mbiimo Gubernur ee si sira: “Lako ri tou rodua ee, yema to nipodota-mi ku-pakabebasika komi?” Nesono-ra: “I Barabas.” 22 Nanguli i Pilatus si sira: “Ande iweetu wea, nuapa to kana ku-powia si Yesus to niuli i Kristus?” Nongare-ramo: “Ia Kana rasalibkan!”
23 Nepekutanamo i Pilatus: “Agiana nuapa kasalaa-Na?” Agiana narimboso ntoto mbiipa pongare-ra nanguli: “Ia kana rasalibkan!” 24 Kaopuana nikalio ni Pilatus tadomo naria lotuna mampololitaka-ra, apaa aga nantambei-da pongare-ra, pade mbelakana ngoni tou-tou ee mampakagesoa ngata. Jadi niala-namo ue ri batili, pade ri ngayo nu tou dea ee nimbanoi-namo pale-na pade nanguli: “Tado madota-ku mogalo-galo kamate nu tou ei! Etu urusia dodo-mi!” 25 Sumawee tou dea ee nesono: “Iyo, palambakamo ikami bo ana-ana-ka mangkolo suku lako ri kamate-Na!” 26 Naopu ee nipakabebasika-ramo ni Pilatus i Barabas, pade nantudu tou mosalapea i Yesus, pade niwei-na bona rasalibkan.
I Yesus nipopowadi-wadi
27:27-31
27 Naopu ee surodado-surodado ni Pilatus nangkeni i Yesus nesua ri sou bete nu Gubernur, pade sumawee surodado notobu nantikusi i Yesus. 28 Niloncu-ramo powaru ni Yesus, pade nopasuaka-Ya powaru ndoe nakamumu. 29 Nipowia-ramo sangkou makota lako ri raa-raa ngkou norui, pade nipataka-ra ri woo ni Yesus. Naopu ee niboli-ramo sangkou tioko ri pale ngkana-Na, pade notumbukotu ri ngayo-Na pade nampopowadi-wadi-Ya. Nanguli-ra: “Tabe, Mbagou to Yahudi.” 30 Isira nanteilusi-Ya, pade nangala tioko ee, naopu ee nipoponampa-ra woo-Na. 31 Naopu-ra nampopowadi-wadi-Ya, niloncu-ramo powaru ndoe nakamumu ee, pade nopasuaka nculi-Ya powaru dodo-Na. Naopu ee nikeni-Yamo ri sawalikuna bona rasalibkan.
I Yesus nisalibkan
27:32-44
32 Ri laentongo dala, notomu-ramo ante sadua tou lako ri Kirene to nisanga i Simon. Nipasa-ramo tou ee mosimbu salib ni Yesus.
33 Pade narata-ramo ri saongu pearia to nisanga Golgota, to nibatuasi: “Bulu Dongke Woo Tomate.” 34 Isee nipanginui-ramo i Yesus ante anggur to nogalo ante apou. Agiana nitomi-pa ni Yesus anggur ee, tadomo nadota-Ya nanginu. 35 Naopu ee nisalibkan-ramo i Yesus, pade nampobagi-bagi powaru-Na ante noundi ncala. 36 Pade noncunda-ramo isee nopajaga-Ya. 37 Ri wongko nu woo-Na nipataka-ra tulisia nancambelai nuanu nireika-Ya:
“Eimo i Yesus, Mbagou to Yahudi.”
38 Tempo ee naria mbii rodua topangio nisalibkan noroa-roa ante Ia. Sadua mbira ri ngkana-Na pade sadua mbii mbira ri ngkabeo-Na.
39 Tou-tou to noliu isee samata notalilo, pade nokanene i Yesus. 40 Nanguli-ra: “Niuli-Mu mamala-Ko mampakarobo Sou nu Allatala, pade mopantindaki mpanculi rarana tolu eo. Ande mpuu-mpuu Iko Ana nu Allatala, pesompomo-Ko lako ri salib etu, pade pakasalamamo koro-Mu!” 41 Iwee mbii tobalia-tobalia ri matana pade topande-topande ri Buku Taurat bo topangkeni-topangkeni to Yahudi, nokanene i Yesus. Nanguli-ra: 42 “Tou ntani nipakasalama-Na, agiana koro dodo-Na tado namala nipakasalama-Na! Ande mpuu-mpuu-Ya Mbagou nu to Israel, palambaka-Ya mesompo lako ri salib, pade madota-kada mamparisaya-Ya. 43 Ia nancarumaka Allatala, pade nanguli Ia-mo Ana nu Allatala. Jadi, ta-kalio-damo, ba madota-da Allatala mampakasalama-Ya bulawee ei.” 44 Topangio-topangio to nisalib noroa ante Ia ee, nangkanene mbii-Ya ewa ee.
I Yesus namate
27:45-56
45 Tongo eo-pa, rarana tolu jaa, sumawee ngamba ee najadi nadedi mbongo. 46 Tinti tolu kinowiana-pa, nongaremo i Yesus ante wotu narimbuku:
“Eli, Eli, Lama Sabakhtani?” To nibatuasi: “Oh Allatala-Ku, oh Allatala-Ku, nuapa pade nipaleisi-Mu Ku-mo?” 47 Namparonge pongare-Na ee, basangkia dua tou to nokongkore isee nanguli: “Ia nampokio i Elia!” 48 Nagasi-gasimo sadua lako riolo-ra isee nalou nangala bunga karang, pade nilolo-na ri anggur podi. Naopu ee nitosuka-na ri wuntu nu tioko, pade nijuju-na ri wiwi ni Yesus. 49 Agiana tou-tou ntani nanguli: “Popea ulu, bona ta-kalio ba marata mpuu-da i Elia mampakasalama-Ya.” 50 Naopu ee nongare mbiimo i Yesus ante wotu narimbuku, pade naposumo inosa-Na.
51 Powide to niloe ri rara Sou nu Allatala nogaa ntongo lako ri wumbuna duuna narata ri undena. Pade najadi mbii linu pade bulu-bulu watu nogaa. 52 Dayo-dayo nateungke, pade nadea todea nu Allatala to namatemo nipatuwu mpanculi. 53 Pade natuwu mpanculi-pa i Yesus lako ri kamatea, nesuwu-ramo lako ri dayo-dayo ee, pade nesua-ramo ri ngata Yerusalem. Pade isee nadea tou to nangkalio-ra.
54 Tadulako ante surodado-surodado to nojaga i Yesus najadi naeka mpuu-mpuu tempo-ra namparasai linu bo nangkalio sumawee nuanu najadi ee. Pade nanguli-ramo: “Nakono mpuu-da, Ia ei Ana nu Allatala.”
55 Isee nadea mbii bangkele to nekalio ngkawao. Isira ee-mo to nantutumo i Yesus bona mantulungi-Ya nopamula lako ri Galilea. 56 Riolo-ra ee naria i Maria Magdalena, i Maria tina ni Yakobus bo i Yusuf, pade tina nu ana-ana ni Zebedeus.
Popatana i Yesus
27:57-61
57 Mapara madedi-pa, naratamo sadua to nasugi lako ri Arimatea, to nisanga i Yusuf. Ia mbii topantutu i Yesus. 58 Nalou-yamo si Pilatus namperapi bata ni Yesus. Pade nipeparentaimo ni Pilatus bona bata ni Yesus raweikaka-ya. 59 Niala-mo ni Yusuf bata ni Yesus ee, pade nisompui-na nu kae linen to nabou. 60 Pade nidule-namo bata ni Yesus ee ri rara nu dayo dodo-na to tadopa naria nipopatanai to nipowia ri rara bulu watu. Naopu ee niduli-namo saongu watu bete nowunta wombo nu dayo ee, pade nanculi-yamo.
61 Agiana i Maria Magdalena pade i Maria to ntanina naboli isee, noncunda ri ngayo nu dayo ee.
Dayo ni Yesus nijaga
27:62-66
62 Kaneile-na, tempo nu Eo Peuntua to Yahudi, tobalia-tobalia ri matana pade tou-tou to Farisi noroa-roa nalou si Pilatus, 63 pade nanguli: “Maradika, nitora-ka tempo nu topebagiu ee natuwu-dapa, naria-Ya nanguli: Maliu tolu eo Yaku kana matuwu mpanculi. 64 Ee-mo sabana, tudu-mo tou mojaga mpakabelo-belo dayo ee duuna ri eo katolueo-na, bona ana-ana guru-Na tado mamala mangio bata-Na pade manguli ri tou bakote nipatuwu mpanculi-Yamo lako ri kamatea. Pebagiu-Na kaopuana ei meliu ntotopa ngoni kadaana lako ri pebagiu-Na paramulana.” 65 Nanguli i Pilatus si sira: “Naria-dododa surodado topojaga niweiku si komi, keni-ramo malou mojaga mpuu-mpuu dayo ee.” 66 Jadi nalou-ramo ri dayo nampakapia watu powunta wombo nu dayo ee, pade nitudu-ramo surodado mojaga wombo nu dayo ee bona tado maria tou mamala moungke wombona.