19
1 Naopu ee nitudumo ni Pilatus tou mosalapea i Yesus. 2 Surodado-surodado nampowia sangkou makota lako ri raa-raa ngkou mporui pade nipataka-ra ri woo ni Yesus. Naopu ee nipasuaka mbii-ra Ya powaru ndoe nakamumu, 3 pade namei ri ngayo-Na nanguli: “Tabe, mbagou to Yahudi!” Pade nisapa-ramo peli-Na.4 Naopu ee nesuwuki mbiimo i Pilatus pade nanguli ri tou dea ee: “Kalio, yaku nangkeni mpesuwu-Ya si komi, bona mi-ncani bakote tado naria nirata-ku namo sangayaa mpuu kasalaa-Na.” 5 Pade nesuwumo i Yesus nampake makota mporui pade powaru ndoe nakamumu. Nangulimo i Pilatus si sira: “Kaliomo Tou etu!” 6 Pangkalio nu tobalia-tobalia ri matana bo topojaga-topojaga Sou nu Allatala ee i Yesus, nongare-ramo: “Salibkan-Yamo, salibkan-Yamo!” Nanguli i Pilatus si sira: “Ala-Yamo, pade salibkan dodo, apaa tado naria nirata-ku namo sangayaa kasalaa-Na.” 7 Nisonoi-ya nu tou-tou to Yahudi ee: “Mantutu atura-ka, Ia kana rasuku mate, sabana Ia nampangaku koro-Na Ana nu Allatala.”
8 Nirongepa ni Pilatus lolita-ra ee, nantambeimo eka-na. 9 Jadi nesua mpanculi-yamo ri rara sou pearia-na pade nikeni mpesuanamo i Yesus. Nipekutana-Yamo ni Pilatus: “Tou lako riumba-Ko?” Agiana tado nesono i Yesus. 10 Jadi nanguli mbiimo i Pilatus si-Ya: “Tado madota-Ko mampololitaka-ku? Bona Mu-ncani, yaku nakuasa mampakabebasi-Ko pade nakuasa mbii mosalibkan-Ko.” 11 Nesono i Yesus: “Ande tado raweika-ko nu Allatala kuasa ee, tado maria kuasa-mu si Yaku. Ee-mo sabana tou to nambei-Ku si-ko, neliupa jeko-na lako si-ko.” 12 Namparonge nuanu ee, nipesimbukuimo ni Pilatus bona mampakabebasi-Ya, agiana tou-tou to Yahudi ee nongare: “Ande mu-pakabebasi-Ya, tado wega nu Mbagou Bete-ko. Tou to nampangaku koro-na mbagou, ia ee bali nu Mbagou Bete.”
13 Nirongepa ni Pilatus lolita ee, nipetudui-namo mangkeni mpesuwu i Yesus, pade noncunda-yamo ri kadera potangaraa, ri pearia to nisanga Doula Watu. Ande ri rara basa Ibrani sangana Gabata. 14 Eo ee, eo kasadiaa posusa Eo Bete Paskah to Yahudi, pade tempo ee rapa-rapana tinti sampulu rongu. Nangulimo i Pilatus ri tou-tou to Yahudi ee: “Ei-mo mbagou-mi!” 15 Pade nongare-ramo: “Patesi-Yamo! Patesi-Yamo! Salib-Yamo!” Nipekutana-ramo ni Pilatus: “Nuapa pade kana ku-salibkan mbagou-mi?” Nesonomo tobalia-tobalia ri matana: “Kawule sadudua nu Mbagou Bete ngkolada mbagou-ka!” 16a Kaopuana niweimo ni Pilatus i Yesus si sira bona rasalibkan.
I Yesus nisalibkan
19:16b, 27
16b Pade niala-ramo i Yesus. 17 Nesuwumo i Yesus ante nosimbu dodo salib-Na malou ri bulu to nisanga Dongke Woo, ri rara basa Ibrani sangana Golgota. 18 Isee-Yamo nisalibkan. Pade naria mbii rodua tou ntanina nisalibkan noroa-roa ante Ia, sadua mbira ri ngkabeo, sadua mbira ri ngkana, pade i Yesus ri tongo-tongona. 19 Nipetuduimo ni Pilatus mopataka ri kou salib ni Yesus tulisia ei: “I Yesus To Nazaret, Mbagou nu To Yahudi.” 20 Nadea to Yahudi nobasa tulisia ee, apaa i Yesus nisalibkan tado nakawao lako ri ngata. Tulisia ee nitulisi ri rara tolu ngaya basa, basa Ibrani, basa Latin bo basa Yunani. 21 Nangulimo tobalia-tobalia ri matana si Pilatus: “Nemo ratulisi: Mbagou nto Yahudi, agina tulisimo: Tou ei nanguli, Yaku Mbagou nto Yahudi.” 22 Agiana nesono i Pilatus: “Nuapa to nitulisi-kumo, tado mamala rabali.” 23 Naopupa surodado-surodado ee nosalibkan i Yesus, nialaramo powaru-Na. Powaru ee nibagi-ra najadi aopo bagia pade isira namparata sore-sore sabagia sadua. Pade niala mbii-ra powaru ndoe-Na. Powaru ndoe ee tado naria podousina, apaa nipowia santonga lou. 24 Nombeulikakamo surodado-surodado ee: “Nemo ta-sempa-sempa powaru ndoe ei, agina moundi-ta bona mampakatantu yema to mamala mamparata.” Nuanu ee najadi bona madupa nuanu to nitulisi ri rara Buku Nagasa ewa ei:
“Isira nampobagi-bagi powaru-Ku,
pade noundi powaru ndoe-Ku.”
Nuanu ee nadupa mpuumo nipowia nu surodado-surodado ee.
25 Najungku ri salib ni Yesus nokongkore tina-Na, sarara bangkele nu tina-Na, i Maria bangkele ni Klopas pade i Maria Magdalena. 26 Pangkalio ni Yesus tina-Na pade ana guru to nipotowe-Na nokongkore isee, nanguli-Yamo ri tina-Na: “Nina, ia eimo ana-mu.” 27 Naopu ee nanguli-Yamo ri ana guru-Na ee: “Ei-mo tina-mu.” Nopamula lako isee, ana guru ee nantarima tina ni Yesus bona meari ri sou-na.
I Yesus namate
19:28-30
28 Nincanida ni Yesus bakote tempo ei naopu puramo sumawee bago-Na, pade bona madupa nuanu to nitulisi ri rara Buku Nagasa, nanguli-Yamo: “Nabei wuu-Ku.” 29 Isee naria sangkou lonco naponu ante anggur napodi. Jadi niala-ramo bunga karang pade nilolo-ra ri anggur ee, pade nitosuka-ra ri kou hisop, pade nijuju-ra ri wiwi ni Yesus. 30 Nitomipa ni Yesus anggur ee, nanguli-Yamo: “Naopumo.” Naopu ee notumpa-Yamo pade naposumo inosa-Na.
Usu ni Yesus nitosu ante tawala
19:31-37
31 Eo ee nambela eo kasadiaa eo Peuntua, pade eo Peuntua tempo ee nosintou ante Eo Bete Paskah to Yahudi. Topangkeni-topangkeni to Yahudi tado nadota bata nu tou-tou to nisalibkan ee rapalambaka mateloe dodo ri kou salib duuna ri eo Peuntua. Jadi nalou-ramo nerapi si Pilatus bona mantudu tou mokotu paa nu tou nisalibkan ee pade mosomponaka bata-ra lako ri kou salib. 32 Pade naloumo surodado-surodado ee nokotu paa nu tou rodua to nisalibkan noroa ante i Yesus ee. 33 Narata-rapa si Yesus, nikalio-ra namate-Yamo, jadi tadomo nikotu-ra paa-Na. 34 Agiana naria sadua surodado notosu usu ni Yesus ante tawala-na. Niwutu-napa tawala ee, nesuwumo raa ante ue. 35 Tou to nangkalio mata kajadia ee, ia-mo to nampopowole kajadia ee, bona i komi mbii mamparisaya. Posabiti-na ee nakono, pade nincani-nada bakote nuanu ee nakono. 36 Nuanu ee najadi bona madupa nuanu nitulisi ri rara Buku Nagasa ewa ei: “Tado namo sangkouaa dongke-Na rapakakotu.” 37 Ri rara Buku Nagasa mbii naria nitulisi: “Isira kana mangkalio-Ya to nitosu-ramo.”
I Yesus nitana
19:38-42
38 Naopu ee naloumo i Yusuf lako ri Arimatea nerapi si Pilatus bona mangala bata ni Yesus. I Yusuf ei topantutu i Yesus ante bongo-bongo, apaa naeka-ya ri topangkeni-topangkeni to Yahudi. Jadi nipaliu-yamo ni Pilatus, pade nalou-yamo nangala bata ni Yesus. 39 I Nikodemus to impia naria namei si Yesus kawengina, nalou mbii namporoa i Yusuf. I Nikodemus ei nangkeni rampa wongi lako ri lana nu mur nigalo ante lana nu gaharu, maria tolumpulu kilo kadeana. 40 Isira rodua ee nangala bata ni Yesus pade nisompui-ra ante sabala gandisi, pade ante rampa wongi nantutu ada mpopatana to Yahudi. 41 Najungku ri posalibkan i Yesus ee naria bonde, pade ri rara nu bonde ee naria dayo bou to tadopa naria nipopatanai tou. 42 Apaa dayo ee najungku, pade maparamo eo Peuntua, nitana-ramo i Yesus isee.