I Yesus ri ngayo ni Pilatus
15:1-15
15
1 Sangkabaa-baa mpisi,
sumawee topotangara agama ante tobalia-tobalia ri matana,
topangkeni-topangkeni to Yahudi pade topande ri Buku Taurat nagasi-gasi nolibu bona mambei i Yesus si Pilatus.
Naopu ee nisilu-ramo i Yesus,
pade nikeni-ra si Pilatus bona ratangara.
2 Nepekutana-mo i Pilatus si Yesus:
“Nakono mpuu Iko ei Mbagou nto Yahudi?”
Nesono i Yesus:
“Iko dodomo nanguli.”
3 Tobalia-tobalia ri matana nanguli nadea nuanu nireika-ra i Yesus.
4 Naopu ee nepekutana mbiimo i Pilatus si Yesus:
“Tado-mo madota-Ko mesono?
Kalio,
nadea mpuu nuanu to nireika-ra Ko!”
5 Agiana tado mpuumo nadota i Yesus nosonoi,
nangkajadika i Pilatus ei namoleara.
6 Butu ngkani karamea Paskah,
i Pilatus mampakabebasi oa sadua to nitarungku mantutu perapia tou dea.
7 Ri rara nu tarungku,
ri olo nu tou-tou daa to nepatesi bula nu ngata nagesoa,
naria sadua to nisanga i Barabas.
8 Pade notobu-mo tou dea,
nerapi si Pilatus bona mampakabebasi sadua to nitarungku ewa kabiasaa-na oa ee.
9 Nipekutana-ramo ni Pilatus:
“Madota komi,
ku-pakabebasika mbagou to Yahudi ei?”
10 Sabana nincani-da ni Pilatus bakote tobalia-tobalia ri matana nambei i Yesus si Pilatus nikeni nu singki rara-ra.
11 Agiana tobalia-tobalia ri matana noasui tou dea bona merapi si Pilatus mampakabebasika-ra i Barabas.
12 Pade nanguli mbiimo i Pilatus ri tou dea ee:
“Ande iweetu wea,
nuapa kupowiaka tou to niuli-mi Mbagou to Yahudi ei?”
13 Nongare-ramo nanguli:
“Salibkan-Yamo!”
14 Nepekutana mbiimo i Pilatus:
“Nuapa nuanu nadaa nipowia-Na?”
Agiana narimboso ntotopa pongare-ra nanguli:
“Salibkan-Yamo!”
15 Apaa i Pilatus ei madota mampakasana rara nu tou dea ee,
nipakabebasi-namo i Barabas.
Naopu ee nitudu-namo tou mosalapea i Yesus,
pade niwei-namo i Yesus rasalibkan.
I Yesus nipowadi-wadi
15:16:20a
16 Nikenimo nu surodado-surodado ee i Yesus ri sou bete,
sou pobotusia kara-kara,
pade nipokio-mo sumawee surodado ntanina motobu.
17 Naopu ee nipasuaka-ramo i Yesus powaru ndoe nakamumu,
pade nowia makota lako ri raa-raa ngkou norui,
nipataka-ra ri woo ni Yesus.
18 Naopu ee nitabe-mo nu surodado-surodado ee i Yesus.
Nanguli-ra:
“Tabe,
Mbagou to Yahudi!”
19 Ninampa-ramo woo ni Yesus ante tioko,
naopu ee niteilusira-Yamo pade notumbukotu-ramo nampenombai-Ya.
20a Naopupa surodado-surodado ee nampopowadi-wadi i Yesus,
niloncu-ramo powaru ndoe nakamumu ee lako ri koro-Na pade nipasuaka nculi-ra powaru dodo-Na.
I Yesus nisalibkan
15:20b:32
20b Naopu ee nikeni mpesuwu-mo nu surodado-surodado ee i Yesus rasalibkan.
21 Tempo ee noliu-mo to nisanga i Simon,
to Kirene tuama ni Aleksander pade i Rufus,
narata lako ri ngata ntanina,
pade tou ee nipasa-ra mosimbu salib ni Yesus.
22 Nikeni-ramo i Yesus ri Golgota,
batuana:
“Bulu Dongke Tomate.”
23 Pade nipanginui-ramo i Yesus ante anggur nigalo-ra ante duu ngkou mur,
agiana tado nadota-Ya nanginu.
24 Naopu ee nisalibkan-ramo i Yesus,
pade nibagi-bagi-ramo powaru-Na ante noundi bona sore matantu bagia-ra.
25 Posalibkan-ra i Yesus ee tinti sasio sangkabaa.
26 Ri wumbu nu salib-Na nipataka tulisia nancambelai nuanu nireika-Ya:
“Mbagou to Yahudi”.
27 Namporoa i Yesus naria mbii tou daa rodua nisalibkan,
sadua mbiira ri ngkana-Na,
sadua mbiira ri ngkabeo-Na.
[
28 Bona ande ewa ei naganamo nuanu nitulisi ri rara Buku Nagasa nanguli:
“Ia nireke tou-tou nadaa.”]
29 Tou-tou noliu isee notatalilo pade nangkanene i Yesus,
niuli-ra:
“He,
Iko to mamala mampakarobo Sou nu Allatala pade mampowiaki nculi rarana tolu eo ngkola,
30 pesompo-Ko lako ri salib etu,
pade pakasalama koro-Mu!”
31 Iwee mbii-da tobalia-tobalia ri matana pade topande ri Buku Taurat nangkanene i Yesus pade nanguli-ramo:
“Tou ntani namala nipakasalama-Na,
agiana koro dodo-Na tado namala nipakasalama-Na!
32 Ande Iko Mbagou nto Israel,
Mbagou Topepakasalama,
pesompomo-Ko lako ri salib-Mu etu bona ka-kalio pade ka-parisayamo Ko.”
Tou rodua nisalibkan namporoa i Yesus ee mbii nangkanene-Ya.
Kamate ni Yesus
15:33-41
33 Tempo tongo eo,
rarana tolu jaa sumawee ngamba ee nadedi mbongo.
34 Pade tinti tolu kinowiana,
nongaremo i Yesus ante wotu narimboso mpuu:
“Eloi,
Eloi,
lama sabakhtani?”
Batuana:
“Allatala-Ku,
Allatala-Ku nuapa pade nipawia-Mu Ku?”
35 Namparonge ee,
basangkia dua tou to nokongkore isee nanguli:
“Kalio,
nampokio i nabi Elia-Ya!”
36 Pade nagasi-gasimo sadua nalou nangala bunga karang,
pade nilolo-na ri anggur podi.
Naopu ee bunga karang ee nitosuka-na ri doe nu tioko,
pade nijuju-na ri wiwi ni Yesus,
nanguli lako:
“Ta-popea,
ta-kalioi ba marata mpuu-da i nabi Elia mosomponaka-Ya lako ri salib edou.”
37 Naopu ee nongaremo i Yesus,
pade namate-Yamo.
38 Tempo kamate ni Yesus,
powide ri rara Sou nu Allatala nogaa ntongo lako ri wumbuna natudu ri lempena.
39 Tadulako to nokongkore ri ngayo salib ni Yesus ee,
nangkalio beiwa dala ngkamate ni Yesus.
Pade niuli-namo:
“Nakono mpuu-da tou ei Ana nu Allatala!”
40 Naria mbii isee basangkia dua bangkele nangkalio ngkawao sumawee kajadia ee.
Riolona ee,
naria i Salome,
i Maria Magdalena,
pade i Maria tina ni Yakobus muda ante i Yoses.
41 Isira ei-mo bangkele-bangkele to nantutu pade nantulungi i Yesus sintou-Na ri ngamba Galilea.
Pade nadea mbii-pa bangkele-bangkele ntani-na isee to narata ri ngata Yerusalem noroa-roa ante i Yesus.
Popatana i Yesus
15:42:47
42 Tempo ee nakinowiamo,
to nikasangai Eo Kasadia mopea Eo Peuntua to Yahudi.
43 Etumo sabana i Yusuf,
to Arimatea,
sadua lako ri topotangara Agama to nibila,
to nampopea mbii Poparentaa nu Allatala,
nampedaki-dakii nalou si Pilatus pade merapi bata ni Yesus.
44 Namoleara-mo i Pilatus namparonge apaa namatemo i Yesus.
Pade nitudu-namo tou nampokio tadulako pade nampekutana-ya ba nakono mpuumo i Yesus namate.
45 Nirongenapa nuanu niuli nu tadulako ee,
nipoio-mo ni Pilatus i Yusuf mangala bata ni Yesus.
46 Pade niolimo ni Yusuf sompu lako ri kae linen nalusu,
naopu ee nisomponaka-namo bata ni Yesus pade nibungu-na ante kae ee see.
Naopu ee niboli-namo bata ee ri rara nu dayo to nipowia ri rara nu bulu watu.
Pade niduli-namo saongu watu bete nipopowunta-na wombo nu dayo ee.
47 Tempo ee mbii i Maria Magdalena pade i Maria tina ni Yoses nangkalio riumba bata ni Yesus niboli.