I Yesus natuwu mpanculi
16:1-8
16
1 Naliupa Eo Peuntua nu to Yahudi,
i Maria Magdalena,
i Maria tina ni Yakobus,
pade i Salome nalou nangoli rampa-rampa bona rapopolanai-ra bata ni Yesus.
2 Sangkabaa-baa mpisi tempo nu eo nembere,
ri eo pamula nu minggu ee,
nalou-ramo ri dayo.
3 Nombepekutana-ramo:
“Yema-mo bulei to modulika-ta watu powunta wombo nu dayo ee ria?”
4 Agiana najungku-rapa nikalio-ra watu bete ee see naduli-mo.
5 Pade nesua-ramo ri rara nu dayo ee,
nabatoro-ra nangkalio sadua malaeka nu Allatala nampake powaru ndoe nabula noncunda mbiira ri ngkana-ra.
6 Tou ee nanguli:
“Nemo maeka!
Nincani-kuda ikomi nangonco i Yesus to Nasaret to nisalibkan ee.
Tado-mo naria-Ya isei.
Natuwu mpanculi-Yamo.
Kalio-mo,
ei-mo podulea-ra Ya.
7 Bulawee ei,
koumo komi,
parata-mo kareba ei ri ana-ana guru-Na,
paralou ntoto si Petrus.
Ulimo iwei:
‘Naloumo i Yesus nampokoului komi ri ngamba Galilea.
Radou-damo komi mangkalio-Ya,
ewa to niuli-Namo si komi.’ ”
8 Nokasiridimo bangkele-bangkele ee pade nokumbeno lako ri dayo ee,
apaa naeka mpuu-ra pade naingu.
Tado-namo nuapa niuli-ra ri tou to nipotomu-ra ri dala,
apaa naeka-radapa oa.
[Naopu ee niparata-ramo petetesi nu malaeka ee si Petrus pade ri tou-tou to namporoa i Petrus.
Pade i Yesus dodo-mo nantudu-ra nalou ri sumawee pearia,
lako ri mataeyo tudu ri kasoloa.
Pade nipopowole-ramo Kareba Belo to tado maria kaopuana nancambelai kasalamaa duu-na masae-sae ee.]
I Yesus basangkia ngkani nampopesuwu koro-Na pade nantudu ana-ana guru-Na
Yesus nateongko ri suruga
16:9-16
[
9 Natuwuki mpanculipa i Yesus lako ri kamatea-Na,
sangkabaa-baa nu eo Minggu,
lombo-lombo nipopakalioka-Na koro-Na i Maria Magdalena.
Lako si Maria ei mpia i Yesus nowura papitu wao tuwu.
10 Pade nalou-mo i Maria Magdalena ei nampoparonge kajadia ee ri wega-wega ni Yesus,
ranca-ra netora pade nokeo.
11 Agiana nironge-rapa i Yesus natuwu mpanculi pade nikalio-Yamo ni Maria,
tado niparisaya-ra.
12 Naopu ee i Yesus nampopesuwu koro-Na ri rodua ana guru-Na ante tari ntanina.
Nuanu ee najadi ranca nu tou rodua ee nolumako lako ri ngata Yerusalem malou ri ngata ntanina.
13 Nanculi-ramo ri roa-roa-ra pade nampoparonge kajadia ee si sira.
Agiana tado niparisaya-ra.
14 Kaopuana,
nipopesuwu-mo ni Yesus koro-Na ri sampulu sadua ana-ana guru-Na,
ranca-ra nangkondi.
Niontika ramo ni Yesus apaa tado neparisaya-ra pade neliu gaga kakoo nu rara-ra nangkajadika tado niparisaya-ra tou-tou to nangkalio i Yesus natuwu mpanculi.
15 Naopu ee nanguli-mo i Yesus si sira:
“Koumo komi ri sumawee dunia pade pololita-mo Kareba Belo lako ri Allatala ri sumawee manusia.
16 Yema to tado mamparisaya kana rasuku.
Agiana yema to mamparisaya pade rabaptis,
kana masalama.
17 Pade butu dua tou to namparisaya-Ku,
Allatala kana mambeikaka-ra kuasa bona mowia nuanu nadupa ewa ee,
tou-tou etu ngoni kana mamala mowura wao tuwu ri rara nu sanga-Ku.
Isira kana mololita mampake basa-basa to tado nincani-ra.
18 Ande mokakamu-ra ule ba manginu rasu,
tado mamparata suwa-ra.
Ande raboli-ra pale-ra ri tou-tou nadua,
tou-tou ee kana mabelo.”
19 Naopupa i Pue Yesus nololita ante isira,
nateongko-Yamo ri suruga,
pade nocunda mbiira ri ngkana nu Allatala.
20 Pade nalou-mo ana-ana guru-Na nampopowole Kareba Belo lako ri Allatala riumba-umba.
Pade kuasa ni Pue namporoasi oa-ra nowia kadupaa bona mopadupa bakote nuanu nipopowole-ra ee nakono.