Katuwu mpanculi ni Yesus
28:1-10
28
1 Naliupa Eo Peuntua to Yahudi, pade ri eo Minggu sangkaba-baa mpisi-dapa, naloumo i Maria Magdalena pade i Maria to ntanina nangkalio dayo ee. 2 Ncamole-mole najadimo linu nabete mpuu. Sadua malaeka ni Pue nesompo lako ri suruga pade noduliaka watu powunta dayo ee, pade noncunda ri wumbuna. 3 Lence nu malaeka ee ewa kila, pade powaruna nabula ngea mpuu. 4 Surodado to nojaga isee, naeka mpuu, nangkajadika-ra nokasiridi, pade najadi ewa tomate. 5 Nanguli-mo malaeka ee ri bangkele-bangkele ee: “Nemo maeka! Nincani-kuda ikomi ei nangonco i Yesus to namate ri kou salib ee. 6 Tadomo naria-Ya isei. Natuwu mpanculi-Yamo ewa to niuli-Na impia ee. Kamei kalio podulea-Ya ei. 7 Bulawee ee, magasi-gasimo komi malou pade ulikaka ana-ana guru-Na, bakote natuwu mpanculi-Yamo. Pade nokoulu-Yamo nalou ri Galilea nampokoului komi. Radou komi kana mangkalio-Ya. Toramo nuapa to niulikumo si komi.” 8 Nagasi-gasimo bangkele-bangkele ee nangkosu lako ri dayo ee. Ante naeka bo nigalo nu donu-ra, nokukumbeno-ramo nalou nampopanguncanika nuanu ee ri ana-ana guru ni Yesus. 9 Ncamole-ncamole naratamo i Yesus nantomunaka bangkele-bangkele ee, pade nanguli: “Tabe!” Pade nalou-ramo nampajungkuki-Ya, pade nokalipui paa-Na bo nampenombai-Ya. 10 Pade nangulimo i Yesus si sira: “Nemo maeka. Koumo komi manguli ri sarara-sararaKu bona malou-ra ri Galilea, radou-radamo kana mangkalio-Ku.”Boa nu Topotangara Agama
28:11-15
11 Ranca nu bangkele-bengkele ee nalou, basangkia dua surodado to nojaga dayo ee nanculi ri ngata, pade nopasibali ri tobalia-tobalia ri matana sumawee nuanu najadi ee. 12 Pade notobumo tobalia-tobalia ri matana ee nolibu ante to pangkeni-topangkeni to Yahudi, naopu ee nambei doi ri surodado topojaga dayo ee, 13 pade nanguli: “Ikomi kana manguli bakote ana-ana guru ni Yesus namei kawengina, pade nampangio bata-Na bula-mi naleta. 14 Pade ande naronge nu Gubernur nuanu ee, ikami-damo mampolitaka-ya bakote tado sala-mi ee, bona tado rakia-kia komi.” 15 Nialamo nu surodado ee doi ee, pade nowia ewa to nitetesika-ra. Nangkajadika jarita ee nowole riolo nu to Yahudi duuna ri eo ei.
Parenta bona mampopowole Kareba Belo
28:16-20
16 Pade naloumo sampulu sadua ana guru ni Yesus ee ri saongu bulu ri Galilea ewa nuanu to niparentaka-ra ni Yesus. 17 Pangkalio-ra i Yesus isee, notumbukotu-ramo nampenombai-Ya. Agiana naria riolo-ra to norandua rara-na. 18 Nijungkuki-ramo ni Yesus, pade nanguli: “Sumawee kuasa ri suruga bo ri dunia niwei puramo si Yaku. 19 Ee-mo sabana koumo komi ri sumawee dunia ei, pajadimo sumawee manusia majadi ana-ana guru-Ku. Baptis-ramo ante mokasangai sanga nu Tuama, pade Ana, bo Inosa Gasa. 20 Patuduki-ramo bona matundu ri sumawee to nipeparentai-Ku si komi. Pade toramo Yaku kana mamporoasi oa komi duuna ri Kaopua nu Dunia.”