Bangkele ante ule naga
12:1-6
12
1 Naopu ee, nikaliomo ri langi sangaya nuanu mpuu-mpuu nepakakioma. Naria sadua bangkele to nampopowaru eo, nokongkore ri wongko nu wula, pade nampomakota sampulu rongkou betue ri woo-na. 2 Bangkele ee ranca-na notiana. Apaa tempona-yamo moana, nongare-yamo apaa nadua nirasai-na. 3 Pade nikalio mbii ri langi sangaya nuanu nepakakioma. Naria samba ule naga nalei to nabete mpuu, nowoo papitu bo notondu sampulu. Butu woo-na nampake makota. 4 Lelo nu ule naga noumbusei sabagia lako ri tolu bagia lako ri sumawee betue ri langi pade nitadiaka-na ri dunia. Ule naga ee nokongkore ri ngayo nu bangkele to moana ee ante patuju madota mangome ana nu bangkele ee ande rapoanakapa. 5 Pade nipoanakamo nu bangkele ee sadua ana baleilo to kana moparenta sumawee manusia ri dunia ante tioko ase. Agiana ana ee niago lako ri bangkele ee, pade nikeni ri ngayo nu Allatala bo ri ngayo nu poncundaa-Na. 6 Nanganimo bangkele ee ri tongo mpada bei, pearia to nipasadiaka-yamo nu Allatala. Isee-yamo nipiara rarana sanjobu roatu aono mpulu eo kasaena.Ule naga nidagi
12:7-9
7 Pade najadimo poiwali ri suruga. I Mikhael ante malaeka-malaeka-na noiwali nangewa ule naga ee. Pade ule naga ee mbii ante sumawee malaeka-na noiwali nangewa i Mikhael. 8 Agiana ule naga ee nadagi nangkajadika ia ante sumawee malaeka-na tadomo nipaliu neari ri suruga. 9 Ule naga bete ee nitadiaka ri sawalikuna. Ia-mo ule tua to nisanga Mbagou Seta ba Wao Tuwu, to nampabagiu sumawee dunia. Ia ante sumawee malaeka-na nitadiaka ri dunia.
Dodia pedagi
12:10-12
10 Naopu ee nironge-kumo wotu narimboso ri suruga nanguli:
“Ei-mo tempona
Allatala nampakasalama todea-Na.
Tempo ei nipopakaliomo nu Allatala kuasa-Na najadi Mbagou.
Tempo ei Mbagou Topepakasalama to nitipa ee mbii nampopakalio kakuasaa-Na.
Apaa to namparei sarara-sarara-ta ri ngayo nu Allatala eo bengina,
nitadiakamo lako ri suruga.
11 Sarara-sarara-ta nampadagimo Mbagou Seta ante raa nu Ana Bimba ee,
pade ante kareba to nakono lako ri Allatala to nipopowole-ra.
I sira tado nampotowe inosa-ra duuna mamate.
12 Ee-mo sabana suruga bo sumawee to neari ri rarana kana madonu.
Agiana mawesomo dunia bo tasi,
apaa Mbagou Seta nasompomo si komi
ante nasodo mpuu,
apaa nincani-na bakote loga-na mebagiu saodi ngkola damo.”
Ule naga nampadapa bangkele ee
12:13-18
13 Nanotopa rara nu ule naga ee bakote nitadiaka ri dunia ya-mo, nopamula-yamo nampadapa bangkele to nampoanakamo ana baleilo ee. 14 Agiana bangkele ee niwei rongkou kapi nu tonci lowe bete, bona mamala-ya meworo malou ri pearia-na ri tongompada bei, pearia popiara-ya rarana tolu mpae bo santongo, to natetalendusi lako ri pewesoki nu ule naga. 15 Nisopurakamo nu ule naga ee ue nadea mpuu lako ri ngaga-na bona mampakawaro bangkele ee. 16 Agiana dunia nampangawa bangkele ee. Nibeamo nu dunia nganga-na pade nangome ue to nesuwu lako ri nganga nu ule naga ee. 17 Ule naga ee nasodo mpuu ri bangkele ee, nangkajadika-ya nalou nampangaesi mulia ntani nu bangkele ee, i sira ee sumawee tou to natundu ri parenta-parenta nu Allatala, pade to nambei posabiti nancambelai i Yesus bo kuasa-Na. 18 Naopu ee nokongkoremo ule naga ee ri soso ntasi.