Binata to neumba lako ri rara ntasi
13:1-10
13
1 Naopu ee nikalio-kumo sambaa binata neumba lako ri rara ntasi. Binata ee notondu sampulu pade nowoo papitu. Ri butu ngkou tondu-na naria sangkou makota, pade ri butu ongu nu woo-na naria sangaya tulisia pangkanene Allatala. 2 Binata to nikalio-ku ee ewa pendongo bete naragi, paa-na ewa paa nu beruang, pade ngudu-na ewa ngudu nu singa. Pade niweimo nu ule naga ee karosoa-na, bo poncunda nu mbagou-na, bo kuasa-na to nabete ri binata ee. 3 Saongu lako ri papitu woo nu binata ee kalioaana ewa bela to nagaga mpuu, agiana bela ee naorimo. Sumawee dunia namoleara pade nantutu binata ee. 4 Pade niune-ramo ule naga ee sabana niwei-namo kuasa-na ri binata ee. Pade i sira mbii nangune binata ee. Nanguli-ra: “Tado naria to namposimbei binata ei. Tado naria to mamala mangewa-ya moiwali.” 5 Binata ee niwei loga manguli lolita nelumbu bo nangkanene Allatala. Ia mbii niwei loga moparenta aopo mpulu rombula kasaena. 6 Pade nopamula-yamo nangkanene Allatala, bo sanga nu Allatala. Iwee mbii pearia nu Allatala, pade sumawee to neari ri suruga mbii nikanene-na. 7 Ia mbii niwei loga mangewa todea nu Allatala bo mampadagi-ra. Pade kakuasaa ri sumawee ngata, mulia, samposararaa bo basa ri dunia niweikaka-ya. 8 Binata ee mbii kana napenombai nu sumawee tou to natuwu ri dunia, tou to tado nitulisi sanga-ra ri rara Buku Katuwua sintou tadopa nipajadi dunia. Buku ee naria ri Ana Bimba to nisambalemo. 9 Jadi, yema-yema naria talinga-na, ia kana meronge!
10 Yema to nipakatatapumo bona ratawani, ia kana ratawani. Yema to nipakatatapumo bona rapatesi ante guma, ia kana rapatesi ante guma.
Ee-mo sabana, todea nu Allatala kana mancabara bo matundu.
Binata to neumba lako riunde dunia
13:11-18
11 Naopu ee, nikalio mbii-kumo sambaa binata ntanina neumba lako riunde dunia, notondu rongkou ewa tondu nu ana bimba. Wotuna ewa wotu nu ule naga. 12 Sumawee kuasa bete to nitarima-na lako ri binata to paramulana ee nipowia-na ri ngayo nu binata paramulana ee. Sumawee dunia bo sumawee to neari ri wongkona, nipasa-na menomba ri binata paramulana ee, to naorimo bela-na to nagaga ee. 13 Binata karombaana ee nampowia kadupaa-kadupaa bete. Ri ngayo nu sumawee tou ia nampopesompo ri dunia apu lako ri langi. 14 Pade sumawee tou to natuwu ri dunia nibagiu-na ante kadupaa-kadupaa to namala nipowia-na ri ngayo nu binata paramulana ee. Pade i sira sumawee nitudu-na mampowia pinotou ewa binata bona mampabila binata to nibelai nu guma, agiana natuwu dodo ee. 15 Binata karombaana ee mbii niwei kuasa mambei inosa ri pinotou ee, nangkajadika pinotou ee namala nololita bo nopatesi sumawee tou to tado nadota nenomba si-ya. 16 Sumawee tou, betena bo kodina, to sugi bo to netowei, batua bo tou nabebasi, nipasa nu binata ee mantarima pampetonondi ri pale ngkana-ra ba ri wingke-ra. 17 Tado namo saduaa to mamala mangoli ba mobalu banuapa-pa, ande tado maria pampetonondi sanga nu binata ee dodo, ba lamoro to nopanotosi sanga nu binata ee.
18 Isei niparalou kapandea. Tou to nabija mamala mobatuasi lamoro nu binata ee, apaa lamoro ee sanga nu sadua manusia. Lamoro ee aonoatu aono mpulu aono.