Ana Bimba pade topantutu-Ya to nitolosi-Na
14:1-5
14
1 Naopu ee naria mbiimo nuanu nikalio-ku. Nanoto nikalio-ku Ana Bimba ee nokongkore ri wumbu Bulu Sion. Noroa ante Ia naria saatu aopo mpulu aopo njobu tou to nitulisika sanga-Na bo sanga nu Tuama-Na ri wingke-ra. 2 Pade nironge-kumo wotu lako ri langi nogundu ewa wotu nu ue bose pade ewa guru nu berese to narimbuku mpuu. Agiana wotu ee nironge ewa oni nu kasapi nikado nu topokasapi. 3 Ri ngayo poncundaa nu mbagou pade ri ngayo nu binata aopo bo totua-totua nantikusi poncunda ee, tou saatu aopo mpulu aopo njobu ee naampododia sangaya dodia bou. Tado namo saduaa mpuumo to namala nampetumbu dodia ee, aga tou saatu aopo mpulu aopo njobu to nitolosimo lako ri dunia. 4 Isira ee tou-tou to nagasa dodo katuwu-ra, apaa tado naria-ra naleta noroa ante bangkele. Isira nantutu Ana Bimba ee riumba-umba kalouaa-na. Lako riolo nu sumawee manusia, isiramo to nitolosi lako ri olo nu manusia najadi penomba paramulana ri Allatala bo ri Ana Bimba. 5 Tado naria-ra naboa, pade tado namo saodia kasalaa-ra. Pepopanguncanika nancambelai petangara
14:6-13
6 Pade nikalio-ku sadua malaeka neworo ri laerawa. Malaeka ee nangkeni Kareba Belo to tado naria kaopuana bona raparata ri manusia ri dunia bo ri sumawee ngata, mulia, bo ringila ngaya nu basa ri dunia. 7 Malaeka ee nongare ante wotu narimbuku nanguli: “Kaekamo ri Allatala pade pemabose-Yamo, apaa naratamo tempo-Na mantangara manusia. Penombai-Yamo to nopajadi langi, dunia, tasi bo sumawee mata ue.”
8 Naopu ee malaeka karoduana nantutu malaeka paramulana ee ante nongare lako nanguli: “Nageromo! Nageromo ngata Babel! Apaa todeana nampakalangu sumawee manusia ri dunia ante anggur, pade isira mbii nampakeni tou nantutu inggu-ra nogou sala.”
9 Naopu ee naria malaeka katotoluna nantutu malaeka rodua ee, nongare lako ante wotu narimbuku nanguli: “Tou to nenomba ri binata ee ante pinotou-na, pade pampetonondi nu binata ee ri wingke ba ri pale-na, 10 tou ee kana manginu anggur to nampoporapaika sodo bete nu Allatala, to tado naria galona to nidua amimo nu Allatala ri panginua. Tou ee kana raduasi ri rara nu apu bo watu mporiri ri ngayo nu malaeka-malaeka nagasa pade ri ngayo nu Ana Bimba ee. 11 Rambu nu apu to noduasi-ra ee kana motumambusa oa duuna masae-sae. Eo bengina tado naria kaopua mpoduasi-ra, sabana nenomba ri binata nadaa ee, pade naria pampetonondi sanga nu binata ee si sira.”
12 To najadi pokona isei todea nu Allatala kana mancabara. Isiramo tou-tou to natundu ri parenta nu Allatala pade to naroso dodo peparisaya-ra si Yesus.
13 Pade nironge-kumo wotu lako ri suruga nanguli: “Tulisimo ei: Mopamula eo ei, masanamo tou-tou to namate sabana nampobagoka i Yesus.” Nesonomo Inosa Gasa nu Allatala: “Nakono, Isira kana meuntumo mobago ntomo, apaa uli nu pobagoa-ra, kana mamporoasi dodo-ra oa.”
Pepae ri dunia
14:14-20
14 Naopu ee nikalio-kumo gawu nabula. Ri wongko nu gawu ee naria sadua tononcunda, ewa lence nu Ana Manusia. Ri woo-Na naria makota bulawa topangkeni, pade ri pale-Na naria samata sangki natada. 15 Naopu ee naria sadua malaeka nesuwu lako ri Sou nu Allatala. Ante wotu narimboso, nongare-yamo ri Tou to noncunda ri wongko nu gawu ee: “Toyamo sabi-Mu etu pade posombemo, apaa naratamo tempona mepae, sabana nuanu rapepae ri dunia nalontomo.” 16 Jadi toponcunda ri wongko nu gawu ee, nitoya-Namo sangki-Na nosombe isi nu dunia.
17 Naopu ee nikalio-ku sadua malaeka ntanina mbii nesuwu lako ri Sou nu Allatala ri suruga. Ia mbii nangkakamu samata sangki natada. 18 Pade sadua malaeka ntanina to nokuasai apu, narata lako ri meja penombaa. Ante wotu narimboso nongare-yamo ri malaeka to nangkakamu sangki natada ee: “Toyamo sangki-mu etu pade sombemo wua-wua nu anggur ri dunia, apaa natasa puramo wuana.” 19 Jadi nitoyamo nu malaeka ee sangki-na pade nosombe wua-wua nu anggur lako ri puuna, pade nitadiaka-na ri rara popieaa anggur. Popieaa anggur ee nampoparapaika sodo nu Allatala to nabete mpuu. 20 Wua-wua nu anggur ee nipie ri sawaliku nu ngata, pade lako ri popieaa anggur ee noilimo raa ewa poili nu salu bete, kawaona noili toluatu kilo mete, pade kandalana makape romete.