Dodia nu tou nedagi
15:1-4
15
1 Naopu ee nikalio-ku ri langi naria sangaya kadupa bete to nepakakioma mpuu. Naria papitu malaeka ante papitu suwa kaopuana. Ei-mo kaopua nu Allatala nampopakalio sodo-Na.2 Pade nikalio-ku nuanu ewa tasi newao ewa kaca nogalo apu. Ri soso ntasi ee nikalio-ku tou-tou nokongkore. Isira ee-mo to nampadagi binata nadaa bo pinotou-na, pade nampadagi tou-tou to nipetonondika sanga-ra ante lamoro lako ri binata ee. Tou-tou to nedagi nokongkore ri soso ntasi ewa kaca ee ante nangkakamu kasapi to niwei nu Allatala si sira. 3 Pade nipododia-ramo dodia ni Musa, batua nu Allatala, pade dodia nu Ana Bimba. Iwei dodia ee:
“Oo Pue, Allatala To Nakuasa,
neliu mpuu bo nepakakioma mpuu sumawee nuanu to nipowia-Mu!
Iko-mo Mbagou nu sumawee dunia.
Nanoa mpuu bo nakono sumawee nuanu to nipowia-Mu
4 Yema to tado naeka si-Ko, Pue?
Yema to tado nampemabose sanga-Mu?
Aga Iko ngkola to nagasa.
Sumawee dunia kana mamei menomba si-Ko,
apaa sumawee nuanu to nipowia-Mu nanoa, nikalio puramo nu sumawee manusia.”
Papitu malaeka pade papitu panginua to nakeisia ante sodo nu Allatala
15:5-8
5 Naopu ee nikalio-ku naria tou noungke Sou nu Allatala ri suruga, Sou nu Allatala ee nikasangai mbii Bambaru ni Pue. 6 Pade papitu malaeka ante papitu suwa ee nesuwu lako ri Sou nu Allatala. Powaru-ra lako ri kae linen nabula ngea bo nerangkila, pade polowi bambara-ra nipowia lako ri bulawa. 7 Naopu ee sambaa lako ri aopo mbaa binata ee nambeikaka malaeka papitu ee papitu ngkou panginua bulawa to naponu ante sodo nu Allatala, Allatala to natuwu duuna masae-sae. 8 Pade naponumo Sou nu Allatala ee ante rambu lako ri pampemabose bo kuasa nu Allatala. Tado namo saduaa to namala mesua ri rara nu Sou ee, ande tadopa maopu papitu suwa to nikeni nu malaeka papitu ee.