Papitu ngaya suwa
16:1-21
16
1 Naopu ee nironge-kumo wotu narimboso lako ri rara Sou nu Allatala nangulikaka malaeka papitu ee: “Koumo komi pade buremo isi nu panginua papitu to naponu ante sodo nu Allatala etu ri wongko dunia.”2 Pade naloumo malaeka paramulana nobure isi nu panginua-na ri wongko dunia. Ncamole-mole neongamo dua bisu to nepakaekai bo nadua mpuu ri sumawee tou to naria pampetonondi lako ri binata ee, bo ri tou-tou to nenomba ri pinotou-na.
3 Naopu ee malaeka karoduana nobure isi nu panginua-na ri wongko ntasi. Ue ntasi ee najadi ewa raa ntomate, pade namatemo sumawee nuanu to natuwu ri rara ntasi.
4 Malaeka katotoluna nobure isi nu panginua-na ri salu-salu bete bo ri mata-mata ue, nangkajadika sumawee ue najadi raa.
5 Pade nironge-kumo malaeka to nakuasa ri wingko ue ee nanguli:
“Iko to Nagasa mpuu,
Allatala to nariamo pade to naria amimo.
Suku to ninawu-Mu ri wongko dunia nanoro.
6 Isira nampakabubumo raa ntodea nu Allatala bo nabi-nabi.
Tempo ei-Ko nampanginui-ra ante raa.
Masipato amimo suku ee ratarima-ra!”
7 Pade nironge-kumo wotu lako ri meja penombaa nanguli:
“O Pue, Allatala To Nakuasa mpuu, nakono bo nanoa sumawee suku to ninawu-Mu.”
8 Naopu ee niburemo nu malaeka kaopona isi nu panginua-na ri wongko nu eo, nangkajadika eo mbii nipaliu mampakapumpu manusia ante kapanena to neliu mpuu ee. 9 Manusia nipakapumpu nu kapanena to nasarepa, pade isira nangkanene sanga nu Allatala to nakuasa ri sumawee suwa ee. Noudamo iwee, tado nadota-ra nancoro lako ri jeko-jeko-ra pade tado nadota nampemabose Allatala.
10 Pade niburemo nu malaeka ka'alimana isi nu panginua-na ri wongko poncundaa nu binata ee. Sumawee kambagouaa nu binata ee najadi nadedi mbongomo, pade manusia nobenci dila-ra sabana kadua nuanu nirasai-ra. 11 Isira mbii nangkanene Allatala ri suruga, sabana dua pade bisu to nitodosaka-ra. Agiana tado mbii nadota-ra nancoro lako ri inggu-inggu-ra to nadaa.
12 Naopu ee niburemo nu malaeka ka'aonona isi nu panginua-na ri Ue Efrat to nabete ee. Pade nabangimo ue ee, nangkajadika nariamo dala nu mbagou-mbagou lako ri mata eo. 13 Naopu ee nikalio-ku totolu wao tuwu ewa lence nu tumpa, nesuwu lako ri nganga nu ule naga, lako ri nganga nu binata, pade lako ri nganga nu nabi-nabi to tado nakono. 14 Isira ee-mo wao-wao tuwu to nampowia kadupaa-kadupa. Nalou-ramo ri mbagou-mbagou ri sumawee dunia pade nopasintobu-ra bona moiwali ri Eo bete, eo nu Allatala To Nakuasa mpuu.
15 Nangulimo i Pue: “Rongemo! Yaku marata ewa topangio. Masanamo tou to nainga dodo bo nojagai powaru-na, bona tado molumako mpolendo-ya pade majadi maeya ri ngayo nu tou dea.”
16 Jadi nipasintobumo nu wao-wao tuwu ee sumawee mabgou ee ri pearia to ri rara basa Ibrani nisanga Harmagedon.
17 Naopu ee niburemo nu malaeka kapapituna isi nu panginua-na ri laerawa. Nirongemo wotu narimboso lako ri Sou nu Allatala ri suruga nanguli: “Naopumo.” 18 Pade nombesangkemo kila bo wotu nuberese noguru, pade linu to nabete mpuu. Tadopa naria najadi linu ewa ee sinungka nu manusia nipajadi. Ei-mo linu to nabete mpuu. 19 Ngata to nabete ee nogaa najadi tolu bagia, pade naroga mbii ngata-ngata ntanina to tado nanguncani Allatala ri sumawee dunia. Pade natetoramo Allatala ri Babel to nabete ee, pade nipanginui-yamo nu Allatala ante Anggur lako ri panginua nu Allatala to naponu ante sodo-Na to nabete mpuu. 20 Sumawee lewuto pade bulu najadi nalipo. 21 Uda bete mpowua, to kantomona alima mpulu kilo, nanawu lako ri langi namparuncu manusia. Pade nikanene-ramo Allatala sabana uda mpowua to nabete mpuu ee.