Potangara Babel
17:1-18
17
1 Naopu ee sadua lako ri malaeka papitu to nangkakamu papitu panginua ee namei si yaku pade nanguli: “Tumei-ko, ku-popakalioka-ko beiwa posuku bangkele to nobalu woto-na ee, ia-mo ngata bete to nipatinda najungku ue-ue bete. 2 Mbagou-mbagou nu dunia nogou sala ante ia, pade topeari ri dunia nipalangu-na ante anggur pogou sala-na.” 3 Naopu ee nikuasai-kumo nu Inosa Gasa nu Allatala, pade nikeni-kumo nu malaeka ee nalou ri tongompada bei. Isee nikalio-ku sadua bangkele nencawi binata to nalei jore wuluna. Ri sumangkoro nu binata ee nitulisi lolita-lolita to nangkanene Allatala. Binata ee nowoo papitu bo notondu sampulu. 4 Bangkele ee nampake powaru nakamumu nogalo nalei, pade nipoparikai ramba-ramba bulawa, watu nasuli olina, pade mutiara. Ri pale-na naria sangkou panginua bulawa to nakeisia ante sumawee nuanu nadaa bo narumu, uli nu pogou sala-na. 5 Ri wingke-na nitulisi sanga to nipontoliro batuana. Sanga ee: “Ngata Babel To Nabete, tina nu sumawee bangkele to nobalu woto-na pade to nadaa mpuu inggu-na ri dunia.” 6 Pade nikalio-ku bangkele ee nalangu ante raa nu todea nu Allatala bo raa nu tou-tou to nipatesi sabana natundu nampangaku i Yesus najadi Pue-ra.Pangkalio-ku bangkele ee, najadi namoleara mpuu-ku. 7 Nangulimo malaeka ee si yaku: “Nuapa pade namoleara-ko? Ku'ulikakaloumo-ko ntoliro nu bangkele bo ntoliro nu binataa nowoo papitu bo notondu sampulu to nisawi-na ee.
8 Binata ee mpia naria amida natuwu, agiana ngkapuri ei tadomo natuwu-ya. Tadomo masae-ya meumba lako ri ngemba kamatea pade malou ri karopua. Tou-tou to natuwu ri dunia, to tado naria sanga-ra nitulisi ri rara Buku Katuwua sintou tadopa nipajadi dunia, kana mamoleara ande mangkalio binata ee. Apaa binata ee mpia nariada natuwu. Ngkapuri ei tadomo natuwu-ya, agiana ia kana meonga mpanculi. 9 Ri rara nu sumawee ei to niparalou pekiri nabija bo kapandea. Woo papitu ee batuana papitu bulu to nipearii nu bangkele ee. 10 Pade woo papitu ee mbii batuana papitu mbagou. Alima lako rioloa-ra papitu ee nanawumo, sadua noparentadapa, sadua mbii tadopa narata. Ande marata-yadamo ngoni, ia kana moparenta singoni ngkola. 11 Pade binata to natuwudapa impia, agiana ngkapuri ei tadomo natuwu-ya, ia-mo mbagou kauwaluna. Ia ei mbii sadua lako riolo nu mbagou papitu ee, to tempo ei rancana nolumako nalou ri karopua. 12 Sampulu ngkou tondu to nikalio-mumo ee, ee-mo sampulu mbagou to tadopa nopamula noparenta. Agiana isira kana rawei kuasa moparenta majadi mbagou moroa-roa ante binata ee rarana sajaa kasaena. 13 Mbagou sampulu ei nasimbei pura patuju-ra. Isira sumawee nambei pura karosoa bo kakuasa-ra ri binata ee. 14 Isira kana mampoiwalika Ana Bimba ee. Agiana Ana Bimba ee ante sumawee topantutu-Ya to natundu, to nipokio-Na bo nipelisi-Na ee kana mampadagi mbagou-mbagou ee, apaa Ia-mo Pue nu sumawee maradika, pade Mbagou nu sumawee mbagou.”
15 Pade nanguli mbiimo malaeka ee: “Ue bete to nikalio-mumo ee, to nipeari nu bangkele to nobalu woto-na ee, ee-mo ngata-ngata ri dunia, todea-todea, mulia bo ngila ngaya nu basa ri dunia. 16 Sampulu ngkou tondu to nikalio-mumo pade binata ee kana mampodaa bangkele to nobalu woto-na ee. Isira kana mangago sumawe nuanu to naria si-ya, pade molendoi-ya. Isira kana mangkondi isi ngkoro-na pade mampakaropu-ya ante apu. 17 Apaa nipopembinisimo nu Allatala rara-ra bona mampowia liwo nu Allatala. Allatala nampakasintundu-ra bona mambei kakuasaa-ra ri binata ee, bona binata ee moparenta duuna madupa sumawee nuanu to niuli nu Allatala. 18 Pade bangkele to nikalio-mu ee, ia-mo ngata to noparentai mbagou-mbagou ri dunia.”